Brianip assani atorluarpai

Brian Schultz 20-nik ukiulik Ilulissaneersoq suna attoraluaruniuk - assani tamatigut eqqortumik atortarpai.

Sanasutut ilinniarnermini qularnanngitsumik kaattamik, pilattuummik, qinneriaammillu atuinissani sungiusimalluinnarpaa - nerrivimmilu arsaarartartutut pattaatini arsaararlu 2,7 gramimik oqimaassusilik qularani unamminermini atugarisarlugu.

Brian Schultz timersornermik nuannarisaqarpoq, ajugaarusussuseqarneralu nerrivimmi arsaararnermut inuunermullu nalinginnaasumut aalajageeqataalluinnartartpoq.

Tamanna sapaatip-akunnerata naanerani takutippaa. Brøndbyp timersortarfissuani danskit 2.devisionimi nerrivimmi arsaararnermi tusaamaneqarluartumi "Golden Set"-mik taaneqartartumi, eqquilluartumik arsaaqqamik silussinermigut timersoqatigiiffini Hirtshalsimeersoq B-75-ip ajugaatinneratigut.

Sanasutut ilinniarfissani, sanaartornermik suliffeqarfik FA Tømmer og Snedker Hirtshals-immikkoortuani Tornbymiittumi sapaatip-akunnerani tamatumani ilinniartunngornissani qulakkeerpaa. Tassani ingerlaannaq sulilersinneqarpoq. Taamaasillunilu sapaatip-akunnerani ullaakkut ilinniarfimmini, atuareernerullu kingorna sulinermut piffissaq atortarpaa.

Tamanna peqqutigalugu 2. divisionimi unamminissaq sioqqullugu sungiusartarnissani annerusumik piffissaqarfiginngilaa, Brian Schultzilli unammiuaarnermi ajugaaniutivinnissamut aalajangiisuusumik isertitsinini akiuukkumassutsinilu pissutigalugit ajugaavoq.

Nerrivimmi arsaararnermut soqutiginnilersoq

Brian Schultzi Ilulissani oktoberimi 2017-mi nerrivimmik arsaararnermik perngaamik misiliineraniit ukiut qulit missiliorlugit qaangiussimalerput.

- Ingerlaannaq soqutiginnilerpunga. Tassa uannut timersuutissaq, Sermitsiamut oqarpoq.

- Meeraaninni timersuutit assigiinngitsorpassuit misilittarpakka, nerrivimmilu arsaararneq immikkuullarissuuvoq. Peqatigiilluni timersoqatigiittarneq uannut tulluutinngilaq. Kisimiilluni unammiuarneq uannut pitsaaneruvoq. Nerrivimmilu arsaarneq taamaappoq.

- Nerrivimmi arsaararnermi kisimiittarpugut — illit, pattaatit, arsaaraq unammisassallu. Tassani qanoq pikkoritsiginerit takutinneqartariaqartarpoq – taamaaliortarpungalu. Nuannareqaara - silusseriarnermiili siullermit soqutiginnilerpunga.

Brian Schultz meeraanermini anaanani Karla Olsvig ilagalugu nuttartuarsimapput. Ilaatigut Nuummut – taavalu Hirtshalsimut nuunnerat, inuuneranut annertuumik ilusilersueqataasumik sunniuteqartoq. Ilaatigut Nordsøen Fri Skolemi ilinniartuunermini sanasutut atuartinneqarnerminni aalisartoqarfissuarmi sissamiittussamik saunartarfimmik sananerminni sanasutut ilinniagaqalernissani soqutigisarilerpaa.

Sanasunngorumasoq

- Tamanna uannut tulluarpoq, taamaattumik qularutiginngilara sanasunngorniassallunga, Brian Schultz nassuiaavoq, taanna Sisimiuni KTI-mi tunngaviusumik ilinniarfimmi siorna aallartippoq.

Sisimiunili nerrivimmi arsaarartarneq unamminartoqartinngilaa, taamaattumik Sisimiuni ilinniarnini immikkoortoq siulleq naammassigamiuk Hirtshalsimut uterpoq Hjørringimilu EUC Nordimi ilinniarnini nangillugu, tamatumalu saniatigut B-75-imi 2. divisionimi unammisartunut ilanngulluni.

Arnaanni Helle tassani naapippaa. Marluullutik Hellep angajoqqaavinut nuupput, Hjørringimilu initaaqqammerlutik, ullunilu tulliuttuni initaaminnut nuuttussanngorput.

- Maanna ulapeqaanga. Ilinniartuuffissannit akuerisaavunga, nerrivimmilu arsaarartartutut unammisartuullunga, karsillu iluani maanna najugaqarlunga, Brian Schultz qungujulluni oqarpoq, soorlulusooq arsanik pingasunik ataatsikkut tigummisaqarneq silarsuarmi ajornannginnerpaajusoq.

Misigisat annertuut

Brian Schultz 20-nik ukioqaraluarluni timersornerup iluani misilittagaqarlualereerpoq, Kalaallit Nunaanni nerrivimmi arsaararnermi nunanut allanut unammisartunut ilaavoq. Tassani Malmømi EM-imut 2024-mi peqataavoq ukiullu siuliani Tuluit Nunaata qeqertaani Guernseymi Island Gamesimi unammeqataalluni.

- Ujaminnattaakka tamaasa takutikkusukkaluarpakka, maannakkulli tamarmik karsimiipput, nunanulli allanut unammisartutut timersuutikka naammagiinnartariaqassavatit, Brian Guernseymi unamminermini timersuutini nittarsaallugit nassuiaavoq.

"Greenland – B Schultz“ timersuutip tunuani allassimavoq.

Hjørringimi skills-imi sapaatip akunnerata siuliani  DM-ertoqarnerani Brian Schultz kalaallit aallartitaannut ilaavoq, taakku unamminermut peqataanngillat, Kalaallit Nunaannili ilinniagaqarsinnaaneq pillugu nitsarsaassipput – aamma puisimik pilannermik, kalaallisoornermik, qamuteralannik qaannallu atorlugit Kalaallit Nunaat ussassaarutigaat.

Inuunermini toqqarsimasani aamma oqaluttuaraa. Kalaallit Nunaanni inuusuttorpassuit assigalugit inuunermi aalajagingassarpassuaqarpoq.

- Naak kalaaliugaluarlunga Kalaallillu Nunaat nuannarigaluarlugu, danmarkimi ilinniagaqarnissara aalajangerpara. Pinngitsaalineqanngilanga, kisiannili maani ilinniarninni nerrivimmi arsaarnermik pikkorissunik unammisartuunissamik kissaateqarninnik ataqatigiissinniarlugu tamanna toqqarpara.

- Uanga nammineq aalajangerpunga, uannut eqqortuummat. Allat immaqa allatut isumaqarput, uangali uummatiga malippara.

Timersortartut pikkorissut allat assigalugit Brian Schultz aamma aningaasaliisumik tapersersorteqarpoq, tassa Polar Seafood Danmarkip nerrivimmi arsaarartartoq kalaaleq piginnaanilik tapersersorpaa.

- Nuannaarutigaara, uangaannaanngilarli, aamma qatanngutikka Rune Marcolu aningaasanik taperserneqarput.

Brianip nerrivimmi arsaarnermik soqutiginninnera piginnaaneqarneralu qatanngutinit aamma kingornunneqarput.

- Marco immikkut maluginiassavat. Taanna siunissami annerusumik tusarfigisalissavarput. Nerrivimmi arsaararnermi arfineq pingasunik ukiulinni maannakkut Danmarkimi pitsaanerpaajugallarpoq, angajuusoq tulluusimaartoq oqarpoq.