Timmisartortitseqatigiiffiup SAS-ip ikummatissap akitsoraluttuinnarnera pissutigalugu maajimi timmisartuussinerit 1200-ngajaat taamaatippai.
AeroRoutes-ip tiimisartuutileqatigiiffiit pilersaarutaasa allanngornerat pillugu kisitsisaatai tunngavigalugit, tusagassiorfik Check-in.dk marlunngornermi allappoq.
SAS-ip apriilimi timmisartuussinerit 1000-it missaaniittut taamaatippai, timmisartortitseqatigiiffiup maajimi timmisartuussinernik aamma taamaatitsisoqartassasoq ataasinngormat uppernarsarpaa – taamaatitsinerilli qanoq amerlatigissaneri oqaatigineqanngillat.
Tusagassiorfiulli allaaserisaani maajimi timmisartumik angalasut 24.805-iniit 23.633-nut ikilisinneqarsimasut atuarneqarsinnaavoq.
- Ilaasut eqqugaasut toqqaannartumik nalunaarfigineqartarput, angalanissamullu periarfissaasinnaasunik allaanik neqeroorfigineqartarlutik, SAS ataasinngormat nalunaarpoq, taakku bilitsit akisunerit aamma tuninialerpaat.
Nuummut akit nutaat
SAS-ip Nuummut timmisartuussisarnini siorna aasakkut aallartippaa. SAS-illu inniminniisarfiani akigitinneqartut misissoraanni siorna akigitinneqartuniit akisunerupput.
Københavnimiit Nuummut akikinnerpaaq 7.812 koruuneqarpoq, utimullu bilitsi aamma taamaalluni, tassa siumut utimullu bilitsi 16.000 koruunit missaannik akeqarpoq.
Bilitsi pisiarineqarsinnaasoq siulleq juulip pingajuanniuvoq. SAS-ip timmisartuussinissaa siulleq maajip 28-ani pissasoq Sermitsiami siorna allaaseraarput. Tassa timmisartortitseqatigiiffiup ukioq manna timmisartuussisarnissani qaammat ataaseq sinnerlugu kinguartissimarpasippaa.
Siorna aasakkut akigitinneqartut Sermitsiamiit misissorpavut, ullormilu misissuiffiusumi Københavnimiit Nuummut utimullu SAS-imi pisiarineqarsinnaasut Air Greenlandimiit akikinnerupput. Ukioq mannali killormut pisoqarpoq, tassa Air Greenlandip inniminniisarfiatigut ujarlernermi juulimi bilitsi nalinginnaasoq siumut utimullu maanna 9.500 koruunit missaannik akeqartoq takuneqarsinnaavoq.
SAS-imit Greenland Airportsimiillu oqaaseqartoqarnissaa Sermitsiap sulissutigaa.
Timmisartunut ikummatissap akitsornera sorsunnermit peqquteqartoq
Kangiani Qiterlermi sorsunneq pissutigalugu timmisartunut ikummatissap piffissap sivikitsup ingerlanerani akitsorujussuarmat SAS-ip maajimi timmisartuussinissani taamaatippai.
USA-p Israelillu Iranimut saassussinerisa kingorna qaammatit marluk qaangiuttullu Iranip Hormuzip kangerliumarngani umiarsuarnik angallassineq mattuppaa. Sakkuaatsoqarunnaarallarnera maanna atuuppoq, tatineqaqalunili.
Nunarsuarmi uuliap tallimararterutaa Hormusip kangerliumarngatigut assartuunneqartarpoq.
SAS timmisartortitseqatigiiffinni kisiartaalluni eqqugaanngilaq.
Timmisartut ikummatissaasa akitsoraluttuinnarnerat pissutigalugu timmisartuutileqatigiiffinnut tatisivoq, suliffeqarfissuillu angisuut angallassinissanik taamaatitsiorarlutillu akitsuipput.
Tyskit timmisartortitseqatigiiffiat Lufthansa oktobarip tungaanut timmisartuussinerit 20.000-it taamaatinneqarumaartut apriilip 21-ani nalunaarpoq.
