Siunnersuinermik suliaqarfik VISO kalaallit oqaasiinik kulturiannillu immikkut ilisimasaqartoq ukiup ataatsip ingerlanerani suliat 47-t misissugassat tigusimavaat.
Siunnersuisuunerup Randi Lykoup suliat 16-it naammassineqarsimasut paasissutissiissutigaa. Suliani taakkunani angajoqqaatut piukkunnassutsimut nalilersuutit pissutaallutik kukkusumik nalilerneqarsimasut marluinnaapput.
– Suliani nalilersuutinik atuinermi kukkusumik aalajangiiffigineqarsimasutut inernilerneqartuni, kommuni qulaajaanissamik aamma/imaluunniit siunnersuinissamik oqaloqatigineqarpoq.
Kommunit oqaloqatigineqartut
Suliani angajoqqaatut piukkunnassuseqarnermut nalilersuutit atorneqarnerisigit kukkusumik naliliisoqanngitsutut inernilerneqartuni, siunnersuisarfimmiit kommunit attaveqarfigalugit Randi Lykou meeqqat pillugit inatsit § 171 b naapertorlugu qulaajaanissamik imaluunniit meeqqat pillugit inatsit § 165 naapertorlugu siunnersuinissamik oqaloqatigineqarput. Kommunit kalaallit oqaasii kulturiallu pillugu ilisimasaasa annertusarnissaat siunertarineqarpoq.
Suliat 14-it suli misissorneqarput, sisamat qanoq pineqassanersut suli aalajangerneqanngillat suliallu 13-init itigartitsissutigineqarsimallutik.
– Suliani itigartitsissutigineqartuni angajoqqaajunissamut nalilersuutit atorneqarsimannginnerat tunngavilersuutaanerusarpoq, VISO-miit nassuiaatigineqarpoq.
Inunngorniariartoq arsaarinnissutigineqartoq
Suliat sammineqarnerpaat ilaat VISO-mit naliliiffigineqartoq tassaavoq Keira Kronvoldip paniata Zammip inunngorniariarneraniit Thisted Kommunimiit arsaarinnissutigineqarnikuunera. 2024-mi novembarimi tamanna pivoq.
Angajoqqaajusinnaanermut nalilersuutit kukkusumik aalajangiisoqarneranik kinguneqarsimanngitsut siunnersuisarfimmit nalilerneqarpoq, aamma Thisted Kommunip Keira Kronvoldip panimi piffissami tamakkiisumik paaqqutarinnissinnaannginneranik naliliinera eqqortuusutut ilalerneqarluni.
Taamatut naliliisoqarnera assigiinngitsuniit isornartorsiorneqarpoq, ilaatigut Keira Kronvoldip illersisianit Laila Berthelsenimit. Angajoqqaatut piginnaasat pillugit VISO-p nalunaarusiaa najoqqutassianut naapertuutinngitsoq taanna isumaqarpoq.
Pissutsit nalorninartut
Laila Bertelsen VISO-p naliliinera nalornissutinik tunngavissaqanngitsunillu tunngaveqartoq oqarpoq. Aamma tarnip pissusaanik ilisimasalik qallunaajusoq, Keiralu pingaarnertut kalaallisut oqaaseqartuugaluartoq suliap ingerlanerani oqalutsimik atuisoqarpiarsimanani.
Aamma suliami pissusilersuutit nalilerneqarnerat suleriuseq malinnagu pisoq Laila Berthelsenip tikkuarpaa, assersuutigalugu pisuni assigiinngitsuni "Keira imminut illersorpoq" imaluunniit "eqqarsaatai allamiippasipput" allat pisariaqartitaanik paasinnissinnaassusaanik nammineq inerniliinerit nalunaarusiami tikkuarneqarlutik. Tassa imaappoq Keira imminut allallu pissusilersuutaanik eqqarsartaatsimigut misigissutsinik, eqqarsaatinik, pisariaqartitanik siunertanillu paasinnissinnaassuseqanngitsutut nalilerneqarneranut tunngavilersuutigineqarlutik.
Qallunaat isiginnittaasaanniit nalilersuisoqartoq
Laila Berthelsen VISO-p kalaallit oqaasiinik kulturiannillu paasinninnissamik siunertaqarneq naammassisinnaanngikkaa isumaqarpoq, tassa tarnip pissusaanik ilisimasallit atorfillit qallunaajunerat Kalaallit Nunaanni najugaqarnikuullutik imaluunniit piffissami sikinnerusumi sivisunerusumiluunniit najugaqarnikuuneqarnerat pissutiginnguatsiarlugu.
– Ilaqutariit pineqartut VISO-miit paasineqarluarsinnaanerarput, nalilersuineralli qallunaat isiginnittaasaanniit aallaaveqarlunilu oqaloqatigiinnerniit sivikitsuniit pivoq. Aamma kommunip suliap qanoq ingerlasimaneranik saqqummiinerat, angajoqqaajusinnaanermut nalilersuutit atorneqartussaanngitsut ilanngullugit naliliisoqarluni. Nalilersuutaat kukkusumik inerneqassanngippata kalaallinik kulturip oqaatsillu pillugu paasisimasaqarluartunik sulisoqartariaqarpoq. Kalaallit Nunaanni najugaqarsimanissaq naammanngilaq, Laila Berthelsen oqarpoq, Nuummi peroriartorneq illoqarfinni minnerniit nunaqarfinniillu peroriartornermiit allaanerulluinnartuunera aamma tikkuarpaa.
– VISO-mi atorfillit aamma taanna ilisimasussaavaat, maannalu taamaattoqanngitsutut misigaarput, Laila Berthelsen kalaallinut ilaqutariinnut Danmarkimi najugalinnut qitornaminnik arsaagaanikunut illersisiusartoq oqarpoq.
Meeqqat inuusuttullu kalaallinit kingoqqisut 2023-mi angerlarsimaffiup avataanut inissinneqarnikut 460-iniit 2024-mi 416-inut ikilisimasut Danmarkimi naatsorsueqqissaartarfiup (Danmarks Statistik, aaqq.) kisitsisaataani takuneqarsinnaasoq VISO paasissutissiivoq.
