Amerikamiut umiarsuaat napparsimmavik Kalaallit Nunaannut ingerlaartoq USA-p præsidentia Donald Trump inuit attaveqaqatigiittarfianni Truth Socialimi februaarimi allappoq.
Trump naapertorlugu umiarsuaq inuppassuarnik napparsimasunik isumassuiffiussaaq.
Trumpip allagaani umiarsuaq napparsimmavik USNS “Mercy”-mik atilik Amerikamiullu erfalasuannik assiliartalik silassorissuusiamik sanallugu assitaliunneqarsimavoq.
Umiarsuaq 1000-inik siniffissaqarpoq. USA-p sakkutuui imarsiortut umiarsuaq alla 300-nik ilaasoqarsinnaasoq Nuummut aallartinniarlugu periarfissanik misissuisimasut maanna paasinarsivoq.
KNR taama allappoq.
Umiarsuaq Kalaallit Nunaannut nakorsaatitigut ikiuiniarluni atorneqartussaavoq, aviisip Norfolkimi sakkutuut umiarsuaqarfiannit akissutigisaani taama allassimavoq.
- Piumasaqaatit allakkiat sakkutuut imarsiortut aqutsisuisa tigusaat erseqqinngimmata umiarsuaq nunami nakorsanik angallassisuunersoq imaluunniit napparsimmaviusinnaanersoq erseqqissumik oqaatigineqanngilaq: Piumasaqaatit pingaarnersaat tassaavoq minnerpaamik inuit 300-t umiarsuarmi unnuinissaat nerisassaqarnissaallu, sakkutuut imarsiortut pisortaat KNR-imut allakkatigut akissuteqarluni allappoq.
Tamannali ‘pisariaqarunnaarami’ pinngitsoorpoq.
USA-mi umiarsuaq napparsimmavik USNS „Mercy“ Portlandimi Oregonimiittumi amutsivimmut marsimi tikippoq.
Tamanna paasissutissanit AIS-imit (automatic identification system = Kinaassusersinermut atortorissaarut automatiskiusoq, aaqq.), imaatigut radiokkut angallatit kinaassusersiornissaannut atortumit, erserpoq, tusagassiorfik gCaptain allappoq.
