Aalisakkerivik nutaaq aalisakkap nerpiinik tunisassiornermigut iluatsitsisoq

Saarulliit Arctic Cods-ip Nuummi aalisakkerivianut pingaarnertut tunineqartarput. Aalisakkerivik saarulliit nerpiinik, ilaatigut Kangiani nunanut assigiinngitsunut avammut tunineqartartunik, pingaarnermik tunisassiortuuvoq. Charlie Olsen naapertorlugu aamma nunaqavissunik sulisussarsiorneq unammillernartorujussuuvoq. Taamaammat Vietnamimiunik Thailandimiunillu sulisoqartarpoq.
Saqqummersinneqarpoq

Aalisakkerivik Greenlandic Seafood ApS 2019-imi Nuummi pilersinneqarsimavoq, Charlie Olsenilli Royal Greenlandimi ukiorpassuarni sulisimasup suliffeqarfik 2025-mi februaarimi pisiaraa, taannalu Arctic Cod ApS-imik taaguuteqalerpoq.

Piffissami tassani Nuummi aalisakkerivinni nipisat suaat akisuut piumaneqarluarput. Arctic Codili, maanna illoqarfiit pingaarnersaanni aalisakkanik tunisassiortut sisamaasut ilaat, saarullinnik tunisassiornermik, pingaartumik saarulliup nerpiinik, tunisassiornermik ukkataqarniarluni aalajangersimavoq.

Charlie Olsen aalikkerinermik misilittagaqarluarpoq, tassami Royal Greenlandip Ilulissani, Sisimiuni Nuummilu aalisakkeriviini ingerlatsisuusimallunilu Uummannami aamma ingerlatsisuusimavoq. Tamatuma saniatigut ilaatigut Royal Greenlandip Danmarkimi Canadamilu aalisakkeriviini sulisimavoq.

Suleqatigiilluarneq allatullu akilersuineq

Charlie Olsenip najukkami ilisimasaqarluarnini iluaqutigalugu Nuummi aalisartut qanimut suleqatigillualersimavai.

- Talittarfimmukarlunga aalisartut oqaloqatigisarlugillu nalunngisarillualertarakkit maanna 60-70-it missaanniittunik aalisakkerivimmut tunisisartoqarpunga.

- Talittarfimmi aalajangersimasumik kivitsissuteqannginnatta lastbilit atorlugit aalisariutit talittarfiannukartarpugut. Bundgarnitik atortutilluunniit allat talittarfimmut qaqissagaangatigit immikkut sullisilaarlugit ikiortarpagut, taanna oqarpoq.

Royal Greenlandip Nuummi tunisassiorfiani saarulliit niaqullit kiilumut 15,50 koruuninik akeqartinneqarput, niaquiakkallu kiilumut 19,85 koruuninik akeqartinneqarlutik. Charlie Olsen naapertorlugu Nuummi tunisisartoqarniarneq unammillernaqaaq, niuerfimmilu unammilleqatigiinneq annertuvoq. Tunisinermili akinut tunngatillugu allatut periuseqartarpoq, taanna oqarpoq.

- Soorunami tunngaviusumik akeqartitsivugut, niuernerli malinnaaffigilluartarlugulu unammillertitsinnit qaffasinnerulaartumik akeqartitsiuaannarpugut.

- Aamma aalisakkat pitsaasuugaangata ataasiakkaanut akigitinneqartut pillugit isumaqatigiissuteqartarpugut.

- Aalisartut aalisakkanik tunitsivimmut tulaasereernerminni sapinngisamik piaarnerpaamik akissarsisinneqarnissaat taamatulli aamma pingaaruteqartigaaq, taanna oqarpoq.

- Maannakkut 60-70-it missaanniittunik aalisakkerivimmut tunisisartoqarpunga, aalisartunullu attaveqarluarneq pingaaruteqarpoq, Charlie Olsen, Arctic Cod ApS-imik Nuummi piginnittoq, oqarpoq.

- Aalisartut aalisakkanik uagutsinnut tunisisimagaangamik aqaguani aningaasarsisinneqarajupput, tamannalu soorunami nuannaarutigisarpaat, taanna oqarpoq.

Ingerlalluartoq

Arctic Cod aalisakkanik ullormut 40 tonsinik tigusisinnaavoq, pingaarnertullu saarullinnik tigooraasarlunilu tulliatut qaleralinnik qeeqqanillu tigooraasarpoq.

- Aalisakkat poortornissaat Kinamullu nassiunnissaat ajornannginnerujussuuvoq. Maanilu akileraartariatta pingaartillugu aalisakkerivimmi tamakkiisumik tunisassiortarniarluta aalajangersimavugut.

- Ullormut saarulliit nerpiinik 5 tonsinik tunisassiorsinnaavugut, Kalaallit Nunaannilu nerpinnik tunisassiortut annersarilersimavaatigut, Charlie Olsen oqarpoq.

Sulisussaaleqineq

Kalaallit Nunaanni sulisussaaleqineq oqallisaangaatsiarpoq, ilaatigut sulisussanik piukkunnaatilinnik pissarsiniarneq sulisitsisutullu attassiinnarneq unamminiarnartuusut, aamma aalisakkanik suliffissuarni.

- Aalisakkeriviit allat assigalugit unammillernartitatta annerpaat ilaat tassaavoq sulisussaaleqineq. Siullertut sulisut najugaqavissut sulisorerusuttarpakka, kisiannili unammillernangaatsiarpoq.

- Soorunami sapinngisamik nunaqavissut sulisorisarpagut. Kommuni suleqatigalugu nunaqavissunik sulisussarsiorniartarnikuuvunga, aamma inuunermi unammillernartitaqartunik sulisoqarnissamik neqerooruteqarsimagaluarpunga, ajoraluartumilli tamanna ajornarsimavoq, taanna oqarpoq.

Taamaammat Charlie Olsen Vietnamimiunik Thailandimiunillu sulisussarsiortariaqarsimavoq, tamannalu misilittagaqarfigilluarpaa. Sulisut nunanit allaneersut najugaqarfissaminnik aamma neqeroorfigineqartarput.

Aalisakkat perlukui pillugit unammillernartut

Arctic Cod ullormut tonserpassuarnik tunisassiorsinnaavoq, tunisassiorfillu sapaatip-akunneri tamaasa aalisakkat perlukuinik igitassarpassuaqartarpoq. Tamannali Charlie Olsen naapertorlugu unammillernartoqangaatsiarpoq.

- Containerimik imermit pitarneqarsinnaanngitsumik Danmarkimi pisivunga, tassungalu aalisakkat perlukui issorartakkakka najukkami assartuisarfimmit aaneqartarput. Tigooqqaavimmi oqimaalutarneqartarput, kingornalu anartaajaaviup eqqaani immamut iginneqartarput.

- Perlukut igitsissagukkit kiilumut 13 øremik akeqartarpoq, aggustillu aallaqqaataanit 95 øremut qaffassaaq. Eqqakkat sapaatip-akunneranut 40 tonsit missaat igittarpakka, taamaammat perlukunik igitsineq akisungaatsiassaaq, taanna oqarpoq.

Aammattaaq Charlie Olsenip containeri atorunnaarlugu aalisakkat perlukui puussianut plastikkiusunut igittalissavai.

Abonnementer

Sermitsiaq.gl – Nittartagaq

  • Sermitsiaq.gl-imi allaaserisat tamakkiisumik atuarsinnaalissavatit
  • Qaammammut kr. 59.00
  • Ukiumut kr. 650.00
Pisigit

Sermitsiaq - E-aviisi

  • Sermitsiaq e-aviisitut tallimanngornerit tamaasa saqqummersartoq atuarsinnaalissavat
  • Sermitsiaq.gl-imi allaaserisat tamakkiisumik atuarsinnaanngussavatit
  • Qaammammut kr. 191
  • Ukiumut kr. 1.677
Toqqaagit

AG - Atuagagdliutit E-aviisi

  • Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
  • Sermitsiaq.gl-mi allaaserisat tamakkiisumik atuarsinnaanngussavatit
  • Qaammammut kr. 191
  • Ukiumut kr. 1.677
Toqqaagit

Sermitsiaq.AG+

  • Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
  • Sermitsiaq e-aviisitut tallimanngornerit tamaasa saqqummersartoq atuarsinnaalissavat
  • Sermitsiaq.gl-imi allaaserisat tamakkiisumik iserfigisinnaalissavatit
  • Arnanut e-magasinatut atuarsinnaalissavat
  • Nutserisoq.gl atorsinnaanngussavat
  • Soqutiginnikkuit abonnement@sermitsiaq.gl-imut allagaqarsinnaavutit
Toqqaagit

Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.