USA-p Iranillu sorsuleqqinniarlutik sioorasaareerneratigut Israelimi sakkutuut qaffasissumik upalungaarsimalerput.
Israelip sakkutuuisa naalagaat, Eyal Zamir, pingasunngornermi taama oqarpoq.
- Maannakkut Israelip sakkutuui qaffasissumik upalungaarsimallutillu qanorluunniitt pisoqarnissaanut piareersimapput, Zamir sakkutooqarfimmit oqaaseqarnermi oqarpoq.
Iran isumaqatigiissummik atsiornianngippat USA-p "suliassani naammassissagaa" USA-p præsidentia Donald Trump pingasunngornermi uteqqiilluni oqarpoq.
- Suut tamarmik peerupput. Sakkutuut imarsiortut peerupput. Sakkutuut timmisartortartut peerupput. Suut tamangapajaamik. Suliaq naammassiartussaneripput apeqqutaaginnalerpoq. Atsiussappat? Qanoq pisoqassanersoq takoriartigu, præsidenti Reuters naapertorlugu oqarpoq.
USA Israelilu saassusseqqippata nunap immikkoortuanut tamarmut sorsunneq siaruaassasoq Iranimi mumisitsinermik illersuisut pingasunngornermi siusinnerusukkut mianersoqqussutigisimavaat.
USA sorsunnermut piareersaleqqilersimasoq Iranip isumaqatiginninniarnermik aqutsisuata, Mohammad Bagher Ghalibafip, pingasunngornermi mianersoqqussutigaa.
- Aningaasatigut politikkikkut tatineqaraluarluni sakkutooqarnikkut anguniagaminik taamaatitsinngitsoq akeqqat ingerlaarnerisa, erseqqissut isertuussallu, ersersippaat. Sorsunnermik nutaamik aallartitsiniarsaraaq, Ghalibaf oqarpoq.
Illuatungeriit sakkuaakkunnaarallarnerat apriilip arfineq-pingajuanili atuuppoq.
/ritzau/AFP
