Maajip 20-at. Ulloq taanna aamma tassaavoq Kalaallit Nunaanni naligiissitaanermut ullorititaq. Naligiissitaanerlu meeqqanit utoqqarnut pingaaruteqartuusoq, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Mariane Paviasen Jensen (IA), isumaqarpoq.
- Nunami namminermi Naligiissitaanermut ullorititamut atatillugu erseqqissaatigerusuppara naligiissitaaneq toqqissisimanermut, naapertuilluarnermut, nunamilu innuttaasunut tamanut – meeqqanit utoqqarnut – assigiimmik periarfissaqartitsinissap qulakkeerneqarnissaanut tunngassuteqarmat.
- Ullormi tassani alloriaataareersut akuersaassavagut, unammillernartullu iliuuseqarfigineqartariaqartut eqqumaffigineqarnerat atatiinnassallutigu, Naalakkersuisoq tusagassiorfinnut allappoq.
Akissaatit ilisimasaqarfiginerorusukkai
Naalakkersuisup naliliinera naapertorlugu assigiimmik suliallit assigiimmik akissaasersorneqarnersut pillugu ilisimasat amigarput. Tamakkualu pillugit Naalakkersuisoq paasisaqarnerorusuppoq.
- Tamanna naammanngitsumik ilisimasaqarfigaarput.
Naammattunillu ilisimasaqalernissaq Naalakkersuisup anguniarpaa.
- Assigiimmimmi akissarsiaqartitsinermut tunngatillugu iluamik ilisimasaqanngikkutta, kisitsisillu atorlugit paasissutissaateqanngikkutta assigiimmik suliamut assigiimmik akissarsiaqartitsilernissap anguneqarnissaanut qanoq iliortoqassanersoq nassuiaruminaappoq, Mariane Paviasen Jensen allappoq.
Kaammattuisoq
Naligiissitaaneq ulluinnarni eqqarsaatigineqarnerussasoq taassuma aamma kissaatigaa. Angerlarsimaffimmiugaluarpat, suliffeqarfimmiinnerugaluarpat ulluinnarniluunniit sammisaqartuniinnerugaluarpat.
- Tamatta ulluinnarni annikitsunik, aalajangersimasunillu iliuuseqartarutta ikinnerusut nakuusernermik aamma assigiinngisitsinermik misigisaqartarlutik, amerlanerusut assigiimmik periarfissaqarlutik, suiaassuserlu apeqqutaatinnagu kikkut tamat oqaaseqarsinnaatillugit ataatsimut kulturimik pilersitsissaagut, naalakkersuisoq allappoq.
Suliniutit ersarinnerusariaqartut
Akissarsiatigut assigiinngitsumik akissaasersuisarnerup saniatigut naalakkersuisup kaammattuutigiumavaa tarnikkut persuttaasarnerup pinngitsoortinniarneqarnissaanut suliniutit ersarinnerussasut.
- Tarnikkut persuttaasarnermut tunngatillugu nipangersimaneq, ilisimasaqannginnerlu patsisaallutik pinaveersaartitsinissaq, ikiuiniarnissarlu ajornakusoortippaat. Tarnikkut persuttaaneq ersinngitsunik, sivisuumilli kinguneqakkajuttartoq nalunngilarput – minnerunngitsumik meeqqanut, inuusuttunullu. Kisianni sulisut, oqartussat, innuttaasullu ersiutinik takunnissinnaaniassammata aammalu angerlarsimaffimmi, atuarfimmi, suliffimmi, najukkamilu inuiaqatigiinni tapersersueqataasinnaaniassammata tarnikkut persuttaasarneq pillugu ilisimasaqarnerunissarput pisariaqartipparput.
