Landry Heinrichikkuliaqqippoq - nalunaaquttap akunnerani ataatsimi naapisimaarnerminni ukua eqqartorpaat

"Colonizer state of America, you're not welcome here! This is Indigenous land!"

(Kalaallisut: "Nunasiaatillit naalagaaffiat Amerika, maanga tikilluaqqusaanngilasi! Nunamuna inuiisa nunaat!")

Jeff Landry malittaalu Nuummi Qapiarfiusaami Nikolaj Heinrichikkunnut apuutiliinnartut arnaq amerikamiunut akerliusoq nillialluni kisimi nipisiassaavoq. 

Nikolaj Heinrichip pulaartussatik silatiminni tikilluaqquai, akerliusorli suli nilliammat silaannaq eqqumiiginartutut ippoq. Iserniapallappullu.

Ippassaammat pulaartut minutsini 15-ini isersimanikuugamik eqqartuinissamut piffissaqarnikuunngillat. Ullaaq mannali pulaaqqikkamik ulapputissaqannginnerorpaseqaat. 

Landry ataasinngornermi ualikkut pulaartussaanikuugaluarpoq, ualerli taanna takkutinngilaq. Marlunngornermi ullaap tungaani aqqanermut takkutissalluni kingorna nalunaarpoq, ullup qeqqartorli aatsaat takkulluni. Ullaaq manna qulingiluanut, piffissaq aggerfissani eqqorlugu, pulaariartorluni takkuppoq. 

- Trump sioqqullugu USA-p soqutiginninnera annikittuaraasimavoq

Landry kalaallisut oqalussinnaanngimmat Heinrichilu tuluttoorsinnaanngimmat oqaloqatigiinnermi nutserisussaq tassaavoq Trumpimik tapersersuisoq Jørgen Boassen. Landryllu oqaasii siulliit Heinrichimut annguppai. 

- Oqaatigivaa maluginiaqqullugu Trump sioqqullugu USA-p soqutiginninnera annikittuaraasimavoq. Trumpilu takkummat Kalaallit Nunaannut soqutiginninneq amerikamiut..., Jørgen Boassen nutseraluni taama oqalunniartoq Nikolaj Heinrichip isumaqatigalugu ilaliivoq.

- Malugisorujussuuarput, taamaammanuna soqutiginninneq taanna nuannariginga, Nikolaj Heinrich oqarpoq.

Kalaallit Nunaat USA-lu ukiuni arlalinni ilinniarnikkut, ilisimatusarnikkut allatigullu suleqatigiiffeqartareerput.

Joe Bidenip præsidentiunerata nalaani, maajip 20-ani 2021-mi, tassa ukiut tallimarpiaat matuma siorna, USA-p nunanut allanut ministeria Antony Blinken nunatsinniippoq, taamani Naalakkersuisut siulittaasorisimasaat Múte B. Egede nunanullu allanut naalakkersuisuusimasoq Pele Broberg ataatsimeeqatigalugit. 

Donald Trumpip USA-mi præsidentiunerata nalaani USA-p nunanut allanut ministeriusumik nunatsinnut suli tikeraartoqanngilaq.

Trumpimut anngussassanik paasiniaasoq

Oqaloqatigiinneq ingerlaqqippoq. Landryp Henrich Islandimiinnikuunersoq apereriarlugu Island nunatsinnut sanilliullugu ingerlalluarnerunersoq ilanngullugu apeqqutigaa. 

Heinrich isumaqarpoq Island USA-mut toqqaannartumik niueqateqarnini ilaatigut peqqutigalugu ingerlalluarnerusoq. Taava oqaloqatigiinneq aalisarnermut sangoriasaarpoq. 

Nunatsinnilu kapisilinniarnerup qanoq inissisimanera eqqartuleriannguarlugu niueqatigiissinnaaneq sanguffigeqqippaat. Landryp Boassen ima nutsereqquaa. 

- Præsidentigooq oqaloqatigiumaarpaa toqqaannartumik Kalaallit Nunaannik niueqateqarsinnaaneq pillugu, Jørgen Boassen Jeff Landry nutserullugu taama oqarpoq. 

- Trumpimut arlaannik anngussassaqarpit?, Landry nutserisoq naammassiniariartoq taama aperivoq.

- Kalaallit Nunaata niuernera pingaarutilissuaq nikisittariaqarpoq. Niuernerput massakkut ajuuilluni ajorpoq. Tassa taanna nikisittariaqarpoq qaffatsillugu, taavalu Kalaallit Nunaat immineq niuilertillugu. Aalisakkat assersuutigigutsigit qeritiinnariarlugit Danmarkimut nassiunneqartarput, taava Danmarkip nioqqutissiarivai, Nikolaj Heinrich oqarpoq. 

Nakorsaq peqqinnissaqarfik pillugu paasiniaasoq 

Inuit arfineq-pingasut nerrivimmi nerisarfimmi kaffisoqatigiinnerup nalaani issiagaluartut pulaarnerup nalaani oqaloqatigiittut marluinnaapput. Tassa Landry Heinrichilu. 

Landrylli, aamma umiarsuarmik napparsimmaviutigisumik nunatsinnukartitsinissamik siusinnerusukkut pilersaartup, peqqinnissaqarfik pillugu apersuleriannguartoq nakorsaq angalaqatigiinnut ilaasoq Joseph Griffin Nikolaj Heinrichimut aperivoq - peqqinnissaqarfik sukkut kivinneqarsinnaanersoq apeqqutigalugu.

- Sulineranni tunngaviupput aningaasat. Aningaasat ukiumut atugassiissutigineqartartut naammannginnamik, Nikolaj Heinrich oqarpoq. 

Nunarput tamakkerluni imaluunniit nunap immikkoortui aalajangersimasut unammillernartumik inissisimaffiunersut, aamma kalaallit namminneerlutik nakorsaasiortarnersut Joseph Griffinip ilaatigut aamma apeqqutigaa.

Paasissutissat pisani sumut atussanerai pulaarnerup kingorna apeqqutigaarput, apeqqulli avaqqullugu akimmat erseqqissumik akissutisinngilagut.  

Landry aavariarusuttoq 

Minutsini 45-ni kaffisoqatigiinneq naajartulerpoq. Eqqartukkat itinerusut qimallugit Landryp nunatsinnut uteqqikkusunnini eqqaavaa. 

Tuttullu assiga qalipagaq nerisarfimmiittoq tikkuariarlugu tulliani tikikkuni Heinrich aavariaqatigisinnaanerlugu aperaa. 

Landry nammineerluni kuukkooriarniartarnerarpoq, kuukkoorissallu amii puisit amii assigalugit nalikilliartuinnartut eqqaavaa.

Trumpip nunatsinnut immikkut ittumik aallartitaata, aamma Louisianami guvernørip Jeff Landry nunatsinnut uteqqinnissani arlaleriarluni eqqaammagu qaqugu uteqqinnissaminik pilersaarnersoq aperaarput. 

- Qaqugu uteqqissanersunga? Neriuppunga ukiamut, takussavarput. Aammami Louisianami tamakkiisumik suliffeqarpunga. Suliassakka suliarilaariarlugit præsidentilu oqaloqatigilaariarlugu. Kisianni uteqqikkusoqaanga, Jeff Landry Sermitsiamut oqarpoq.

Jeff Landry pulaarfimmini kalaallit kaagisorlunilu inussiarnisaaqisoq allamik aamma suliassaqarpoq. Trumpimmi nunatsinnut immikkut ittumik aallartitaraa, nunattalu USA-mut ilanngunnissaa sulissutigissallugu immikkut ittumik aallartitanngornermini oqaatiginikuuaa. 

Maanna sapaatiummalli maaniissimalluni ullumikkut angerlarluni aallarpoq. Tikeraarnerminillu Trumpimut suut anngutissanerlugit Nikolaj Heinrichikkunit aninnginnermini Sermitsiamut oqaatigai.

- Præsidenti takkutinngikkallarmat USA-p Kalaallit Nunaat sumiginnarsimavaa. Uagut akisussaaffigaarput, kisianni aamma tamanna peqqutigalugu præsidenti aaqqiiniarsarivoq. Taannalu anngussassama ilagaat, Jeff Landry taama oqarpoq ingerlaqqillunilu.