Clifford Stanleyip, Kalaallit Nunaata USA-mut ilanngunnissaa pillugu atsiornernik katersuiartorluni Nuummiittoq, tikeraaqqanini sivitsorpaa.
Amerikamiup nunatsinniinnini ullunik qulinik sivitsorsimallugu Sermitsiamut oqaluttuaraa, taamaalillunilu maajip naanerani aatsaat aallassalluni.
- Kalaallit Nunaat siunissami ingerlalluassaguni unammillersinnaassuseqartariaqarpoq. Innuttaasut naleqarnertik ilisimassavaat, maannakkullu 200.000 dollarit neqeroorutigineqarsinnaasut pitsaanerpaapput, Clifford Stanley Sermitsiamut oqarpoq.
Clifford Stanleyp atsiornernik katersiniarnera isornartorsiorneqangaatsiarpoq, Naalakkersuisullu siulittaasuat isorinnittunut ilaalluni. Kalaallit Nunaata siunissaa taxani isumaqatigiinniutigineqarsinnaanngitsoq inuit attaveqaqatigiittarfiisigut allannikuuvoq.
- Naalakkersuisut innuttaasunut taama qanitsiginerat tupaallaatigaara. Naalakkersuisut siulittaasuat ajuallatsinniarsarinngilara, Nuummiinnermini taxarnini pillugu oqarpoq.
Landrymut attuumassuteqanngitsoq
Clifford Stanley siunertani innuttaasunut saqqummiukkaangamiuk amerlanertigut akerlilersorneqartarlunilu kamaanneqartarluni Sermitsiamut oqarpoq, piffissamilu kingullermi marluinnarnik atsiornernik pissarsisimalluni.
Trumpip immikkut aallartitaanut Jeff Landrymut, aamma Nuummiittumut, USA-milu præsidentip Trumpip aqutsisuinut attuumassuteqannginnerarpoq.
- Naamik, Landrymut atorfilittaanullu (Trump, aaqq.) attaveqanngilanga. Kalaallit Nunaannukarnissara sioqqullugu aallartitaqarfimmut attaveqarnikuugaluarpunga akineqarnangali.
- Sinniisoqarfiup aqagu ammarneqarnissaanut peqataaniarlunga aamma maaniinngilanga. Maaniinninnik tamanna pilersaarutiginngilara. Inunnik naapitsiniarlunga, neqerooruteqarniarlunga kaalaallillu aqqutissiuunniarlugit maaniippunga, Clifford Stanley oqarpoq.
