Landryp Heinrich pulaarpaa: – Anngukkusutakka annguppakka

Nuummi Qapiarfiusaami illut uiguleriiaat ilaanni ukiut 55-issaannik najugaqarput aappariit Arnaq aamma Nikolaj Heinrich. 

Ilaqutariissuugamik nalunngisarpassuaqarlutillu inuppassuarnit isaaffigineqartaqaat. Ullumikkulli isertussaq qaqutigoorpoq. Tassamiuna Trumpip nunatsinnut immikkut ittumik aallartitaa Jeff Landry pulaartussaasoq. 

Pulaarnissaa ippassaammat ualikkut pisussaagaluarpoq, Landrylli ulapputini peqqutiginerarlugit ippassaammat takkutinngilaq. Ullaaq mannali sianerfigineqarput nalunaaqutaq aqqanermut pulaarusuttut. 

Pulaartussat takkutinnginnerani Sermitsiamiit angerlarsimaffiannut iseratta radio ikumavoq kaffisunnialaarlunilu. 

Pissangalaarpit? 

- Pissangavallaanngilanga, tamakkuninnga nunanut allanut angalallunga ukiuni siuliini naapisimasaqartarnermik, Nikolaj Heinrich oqarpoq.

Taassuma Amerikap nunatsinnut soqutiginninnera atorluarneqartariaqarnerarlugu Facebookikkut isummersuutigiuartarpaa. Isummersuutigisartakkanilu pulaartussamut anngukkusuppai.

- Nunarput ilisimaqigakku periarfissarsuit oqaluttuarissavakka. Nunarput aatsitassanik ulikkaarpoq aamma imartaa qularnanngilaq uulialissuuvoq.  

Amerikamiunik ersissutissaqanngitsoq  

Pulaartussamut utaqqineq ippassaammat ullumiummallu nalunaaquttap akunnerpaalussuini sivisussusilik kiisami qangiutilerunarpoq. Aqqanermut takkuttussaraluaq minutsit qulit qaangiuppata, tassa ulloqeqqanut, apuuttussanngortoq Heinrich silatiminni utaqqigaluarsinnarluni illumut isertorlu sianerfigineqarpoq. 

Arlaatigut ersissutiginngiliuk nunatta amerikamiunit atornerlunneqarsinnaanera? 

- Atornerlunneqarsinnaanera uanga eqqarsaatiginngilara. Amerika siullermik pingaartumik 1940-kkunni sorsunnersuit pimmata nunarput nakkutigisorujussuuaa. Allaat mittarfeqarfinnik pilersitsiuivoq arlalissuarnik. Narsarsuaq, Marraq, Kangerlussuaq Avanersuarlu kingusinnerusukkut. Taavalu aamma Tunumi Kulusuk allallu aamma amerikamiut pilersippaat. Nuna nakkutigigamikku, Nikolaj Heinrich oqarpoq nangillunilu.

- Naak ingerlatissap puukuinik mingutsitsigaluarlutik, maanngaannaq igittaramikkit igitsivissaqartinnginnamikkit ikuallanneqarsinnaanatillu. Ajuusaarnaraluartumik qimaannartarpaat. 

Pulaartussaq kiisami takkuttoq 

Pulaartussaq takkuppallariartoq Nikolaj Heinrich anillappoq. Landry nulianilu allanik malitseqarlutik qulit missaanniillutik kiisami takkutiinnaqaat. 

Takkukkamik assammipput, guvernørillu Nikolaj Heinrichip ilassinera nuannaarutiginerarpaa. Qanga borgmesteriusimanersoq inuunerminilu sulerisuusimanera Trumpimik nuannarinnittoq Jørgen Boassen oqalutsigalugu apersuutigai. 

Nikolaj Heinrich nulianilu ullaatungaanili kaffilioreersimagamik silatiminni oqaloqatigiissinnarlutik iseqqusipput. 

Guvernøri malittaalu kalaallit angerlarsimaffiinut isinngisaannarsimasutut pissuseqarlutik kamitik attaasaq atorlugit illup iluanut isaapput, alutorsaakkamillu suna tamaat assilisaqattaalerlugu.

Angerlarsimaffik ima alutoritigaat kaffimik sassaallertoqarnera eqqarsaatigerpasinnaguluunniit. Illup nerisarfiani nikorfaniarlutik Jørgen Boassenip Nikolaj Heinrich saappaa. 

- Nikkulaat, Trump pillugu naatsunnguamik oqaaseqassaguit nutserussussinnaavakkit, Jørgen Boassen oqarpoq. 

- Trumpip inuttut nammineq pissusaa sukangarpalulaartoq maani kalaallit qunugigamikku. Kisianni uanga nammineq ajorinngilara, paasigakku silappaarissorsuusoq. Taavalu nunatsinnut soqutiginninnera soqutiginartittorujussuuara. Nunarput pisoorsuugami nunami imartaminilu, kisianni atunngisaminik, Nikolaj Heinrich oqarpoq nutserisorlu nutserereermat nangeqqilluni. 

- Tamakkua nioqqutissatut atorneqalernissaat qamani qaratsanni qangarsuarli pigisarigakku, taamaattumik taamatut Trumpip Kalaallit Nunaannik soqutiginninnera, inuttaa eqqarsaatiginngikkaluarlugu, kisianni naalagaaffissuup soqutiginninnera pingaartittorujussuuara, Nikolaj Heinrich oqarpoq. 

Pulaartut tuaviorpasinnerat erseriasaarpoq. Jeff Landryllu Jørgen Boassen oqarfigaa aqagu ullaakkut poortukkamik pajukkumaarlutik sivisunerusumillu oqaloqatigerusullugu. Poortukkat qassit nassagassaaneri paaserusullugu pulaakkamik qassinik ernutaqarneri apeqqutigai, Nikolajillu nulia inimi isersimaqataasoq oqariasaarpoq "20-t!" Amerlanaarlugit illup iluani isersimaqataasut illalerput, Landryllu neriorsuutigaa poortukkanik arlalinnik nassassallutik. 

Minutsini 15-ini pulaarneq 

Pulaartut malittaalu inginnatilluunniit illup iluani alapernaassinnarlutik aniniattapput. Jeff Landryp aallartitamik inuussutissarsiortunillu allanik ulloqeqqasioqateqassalluni inortuinini utoqqatsissutigaa. 

- Minutsinik 15-inik inortueqqavunga. Kisianni aqagu uteqqissaanga, sivisunerusumimmi oqaloqatigerusuppara, Jeff Landry Sermitsiamut oqarpoq.

Nikolaj Heinrichip naapinnissaa sooruna pingaartippiuk? 

- Nikolaj, aggerfinni pingaartitatsitut utoqqaavoq utoqqaqatiminut sinniisuulluartoq. Utoqqaat silatoorujussuupput. Ukiuni qulikkaani ajortunik ajunngitsunillu misigisaqarsimapput, taamaammallu taakkua ilinniassagukkit Nikolajitulli ittut oqaloqatigisariaqarpakka, Jeff Landry oqarpoq. 

Naapinnerlu minutsini 15-init sivisunerunngikkaluartoq pulaartoqaqqammisup naammagisimaarpaa.

Anngukkusutatit annguppigit? 

- Anngukkusutakka tunngaviisigut annguppakka. Nunarput pisoorsuuvoq, imartarput pisoorsuuvoq, kisianni uagut atunngilagut. Taakkua atunnginneri peqqutaallutik manna nunarput nakkangasutut ileqqavoq. Taamaattumik atorneqalernissaat uanga inuttut kissaatigisorujussuara, inuiattut kivinneqarnissarput pisariaqarmat, Nikolaj Heinrich oqarpoq. 

Angutit taakkua kingusinnerusukkut naapeqqissanersut piffissap takutissavaa, qularnanngitsorli aana: Jeff Landry assigiinngitsunik pilersaaruteqarpasippoq. Tikeraarnerminilu ulluni marlunni tulliuttuni pilersaarutai tamakkiisumik ilisimanngilagut.