Avannaata Kommuniani borgmesteri, Lars Erik Gabrielsen (S), Donald Trumpip Kalaallit Nunaannut aallartitaa, Jeff Landry, taassumaluunniit angalaqataa, nakorsaq, Joseph Griffin, maanna nuummeqatigisani, ataatsimeeqatigissanagit Sermitsiamut marlunngornermi nalunaarpoq.
Tamanna Avannaata Kommuniani kommunalbestyrelsimi illua-tungiliuttuneersut, Demokraatit, eqqissiallaatigaat.
- Oqiliallannarpoq naapeqatiginiarnagit aalajangersimammat. Uani killiffimmi uagut isumaqaratta mianersorfissamiilluta.
- USA-mit nunatta tatisimaneqarnerani nunamut tassunga qanillattornissaq piffissaasorinngilarput. Imaanngitsoq killilersorniarsarigatsigu kikkunnik naapeqateqassanersoq, taamaammat isumaqarpunga isumatusaarnerusoq taamatut inissisimanermi USA-mut aallartitaanullu qanillattunnginnissaq, Heidi Møller (D), Sermitsiamut oqarpoq.
Demokraatit: Kommunit qanillattortariaqanngillat
Borgmesteri, Lars Erik Gabrielsen, Jeff Landry-ip siunnersuutiginikuusaa, tassa USA-mit umiarsuaq napparsimmaviusoq, Kalaallit Nunaannukarluni ikiuutissaasoq, pitsaasutut nalilerlugu siusinnerusukkut avammut oqaaseqartarpoq. Taamatulli assigusumik USA-mut maanna qanillattornissaq Avannaata Kommuniani borgmesterip tulliata aappaata tulluartuusorinngilaa.
- Naalakkersuisut tatisimaneqarneq (USA-mit, aaqq.) pillugu annertuunik suliaqarput, taamaammat isumaqarpunga taakkua sulinerisa saniatigut immikkut kommunit ataasiakkaarluta allarluinnarmik qanillattorluta pilernissarput mianernartorujussuusoq.
- Taamaammat aamma eqqumaffissaavoq kommuni sinnerlugu qanoq avammut oqariartortarnerput, Heidi Møller oqarpoq.
