Filmip Shaped by Landip Nunatta nipaa uterteqqikkaa

"Kalaaliunera  tulluusimaarutigaara". 

Oqaatsit immikkut pingaartillugit oqaatigineqarput, assiliissummit inuit marluk seqinnarissuarmi qaqqap sivingarnatigut sisoraaserlutik majuartut malinnaaffigineqartillugit.

Adam Kjeldsen siulliuvoq, ernerata Ilik Skov Kjeldsenip malippaa. Aput ingerlaffigisaat qeraarpaluppoq, qaqqami portunerusumut pipput, nipaanneralu oqalunnerup nipaatut nipitutigingajalluni.

Filmi piviusulersaarut Shaped by Land taama aallartippoq — nukittussuseq, kingornussaqarneq ataqatigiinnerlu assilineqarsimallutik. Kinguaariit marluk qummukaqatigiittut. Marluullutik.

Filmi sisorarnermut tunngaannanngitsoq

Filmi sisorartarnermik, qaqqat sivingasuut Issittumilu misigisassarsiortarnerit pillugit oqaluttuarpoq. Aputilli ataani annerusumik toqqortaqarpoq. Tassami Shaped by Land kinaassutsimik, kikkunnut atanermik kikkullu Nunatta oqaluttuarisaaneranik oqaluttuarsinnaanerannik – aamma kikkut tamatuminnga iluanaaruteqartarnerannik – apeqqusiineruvoq.

  

Filmiliornermi ilitsersuisup, Emily Sullivan-ip, oqaatigaa tamanna filmiliornermi aallaqqaataanniit qitiutinneqartoq.

- Kalaallit Nunaanni sisorartarneq pillugu tusagassiuutitigut saqqummiussassarpassuaqartarpoq, sumiiffimmili tamaani sisorartartut sammineqarpallaarsimanatik. Avataanit tikeraat amerlasuut nunaqavissut kulturiat paasisaqarfigisanngilaat, tamannalu uggornarpoq. Suliniut aallartikkakku inuit ilaat oqartarput: ’Kalaallit Nunaanni sisorartoqartarneranik ilisimasaqanngilanga’ – tamannalu uannut tupaallannarpoq, filimiliornermi ilitsersuisoq Alaskami najugalik oqaluttuarpoq.

Tamatumunnga atatillugu aamma oqaatigaa, filmi piffissami Nunatta nunarsuarmi soqutigineqarnerulerfiani saqqummertoq – kalaallilli oqaatiginiagaat tusaaniarneqarpallaartanngitsut.

- Kalaallit ataatsimooqatigiinnerat, uumassuseqarlutik nuannaarlutillu nunamut attaveqarnerminnik ilusilersuisut takutinnissaat aatsaat taama pingaaruteqartigaaq, ilitsersuisoq oqarpoq.

Nunarput ukiuni qulikkuutaanni arlalinni avataaneersunit – nunatut allaanerulluinnartutut pinngortitatullu attorneqarsimanngitsutut – takutinniarneqartarpoq. Piviusulersaarummi matumani allamik misiliisoqarpoq. Tamatumani nunap qanoq innera kisimi pingaarnerutinneqanngilaq, inuilli tamaani najugaqartut, inooqataasut uummammiuliussimasaat pingaarnerupput. Tamanna filmip nukittoqqutigaa. 

Qaqqat taaguutaat ilisimagai

Adam Kjeldsen sapiitsuliortartutut saqqummiunneqanngilaq, kisianni eqqissisimasutut, misilittagaqarluartutut tulluusimaartutullu oqaatigineqarluni. Qaqqat kaasarfimmitut nalunngitsigai. Sumi apussarinnerunersoq, anori sumi saqisarnersoq sumiiffiillu sorliit ataqqineqartariaqarnersut ilisimavai. Taassumunnga takornarianik angallassineq tassaaginnanngilaq takornarianik qaqqakkut majuartitsineq, Nunarpulli nammineq ilusilersorneqarfigisimasani pillugu oqaluttuussisarluni.

Filmimi pisut maluginiarnartut ilaat immami pivoq. Adamip umiatsiaq alla suaarpaa aperillunilu kina takornarianik qaqqamut majuaqataassanersoq. Tuluttut oqallorluttumit akineqarpoq: Franskip majuaqatigissagai. Adamip pakatsinera erseqqilluinnarpoq, eqqissisimasumilli akilluni mianersortariaqarlutik isumannaallisaanermullu tunngatillugu mianersorluni angalasoqartariaqartoq. Pisoq apersuilluni allaaserisarpassuarnit annerusumik paasissutissiivoq. 

 

Nunanit allanit sisorariartitsisartut, Nunatsinnukartarput, qaqqanik nittarsaassisarlutik misigisassarsiortitsisarlutillu, amerlanertigut nunaqavissunik peqateqaratik, sumiiffimmik ilisimasaqaratik imaluunniit Adamitut qaqqat taaguutaannik sumiiffimmillu paasisimasaqaratik. Taama pisoqaraangat, Nunarput tunuliaqutaannartut angerlarsimaffiunngitsutullu saqqummiunneqartarpoq. Piviusulersaarummi aamma aningaasaqarneq sammineqarpoq. Aningaasat taamaallaat ikittunnguit sisorariartitsisarnermi Nunatsinnit maannakkut pissarsiarineqartarput. Nunanit allaneersut suliffeqarfiutaat angalatitsisartullu angallassassaminnik tikisitsisarlutillu ilitsersuisartillugit nunaqavissut ikittuinnaat taama ingerlatsisarput.

Tamanna filmip oqariartuutaanik ersarinnerulersitsivoq: Pinngortitaq kalaallinit pigineqarpoq, naleqartulli nunamit annissorneqaannartarlutik. Oqimaaqatigiinnginneq tamanna filmimi tikkuarneqartoq, Nunatsinni politikikkut iliuuseqarfiginiarneqaraluarpoq. Takornarialerinermut inatsimmi nutaami sumiiffimmit aallaaveqarnissaq aamma Nunatsinnit takornariartitsisartut peqataanissaat piumasarineqarpoq, pinngortitaq allanut tuniniarneqaannannginniassammat iluanaarutillu nunamit annissorneqarlutik. Inatsit kissaatigisatut sunniuteqassappat, equnganeq filmimi takutinneqartoq allanngortinneqarsinnaassagunarpoq.

Kusanartoq — sakkortunerusinnaallunili

Filmip sanngeeqqutaanik taasaqassagaanni, ajornartorsiummik nammineq saqqummiussamini annerusumik itisiliinngilaq.

Piviusulersaarut minutsinik 16-iinnarnik sivisussuseqarpoq, minutsinilu taakkunani tamani kusanarlunilu sakkortuvoq, naak oqaluttuaq aatsaat aallartilaarpasikkaluartoq.

Takornariartitsisartut nunaqavissut aamma nunanit allaneersut akerleriinnerat, aningaasatigut iluanaaruteqarnissaq pillugu apeqqut aamma Kalaallit Nunaata nassuiarnissaanut pisinnaatitaaffik pillugu akiuunneq sammineqarnerusariaqaraluarput. Taamaalilluni filmi iluaqutigisaminik takinerusinnaallunilu itisiliinerusinnaagaluarpoq.

Naammagittaalliutissaqartutut misigisimananngikkaluartoq - itinerusumik paasisaqarusulersitsivoq.

Filmi nunaqavissunut sunniuteqarluartoq

Filmi Shaped by Land nunani allani isiginnaartunit kalaallinut allaanerusutut misinnarsinnaavoq. Nunani allamiut misigisassarsiornertut isigissagaat, maani inuppassuit ilisarsissapput. Pinngortitaq attorneqarsimanngitsutut allanit isigineqartoq, angerlarsimaffittut isigineqassaaq.

FilmiIiliornermi ilitsersuisup, isiginnaartut ilisarsisinnaanerat qanilaartumillu attaveqarfigilissallugit neriuutigaa. Taanna oqarpoq: 

 

- Filmimi Kalaallit isiginnaartut sisorartarfimminnik tulluusimaarutiginnissasut siunissamullu neriuuteqalersinneqassasut neriuppunga, Emily Sullivan oqarpoq.

Tamanna filmip oqimaaqatigiissaarneqarneranut nukittoqutaalluinnarpoq: kusanartut qanittumiittullu akornanni misigisassat aamma, inuit tamaani inuusut.

Taamaattumik ernerusup Iliup angunni qaqqakkut majuaqatigigaangagu tamanna sisorariarnerinnaaneq ajorpoq, kisiannili annerusumut ilaasutut isigisariaqarluni — ilisimasanik, misilittakkanik ataqatigiinnermillu kinguaariit ingerlatitseqqittarnerannut — assersuutissaalluartoq.

Pisut tamakku filmip Shaped by Landip eqqorluinnarpai. Suut tamaasa nassuiarnagit, nunalli ilusaata inuillu oqaloqatigiissinnerisigut. Filmi taamaalilluni pingaaruteqalersinneqarpoq.

Filmi piviusulersaarut kusanartoq, eqqarsalersitsisoq politikimullu attuumassuteqartoq, Nunatsinnik nunamit namminermit takutitsisoq – aamma apeqqut pisariaqartoq apeqqutigineqarluni, kikkut nunamit pissarsiaqassanersut apeqqutigineqarluni.