Wasington D.C.-mi tusagassiortut ukiumoortumik nerersuaqatigiinneranni angut aallaasersortutut pasineqartoq, Donald Trumpip naalakkersuisuini atorfilittanik aallaanninnissamik siunertaqarpoq. Tamanna tigusarineqarnermi kingorna politiinut oqaluttuarisimagaa, Amerikamiut tusagassiorfiat CBS news tusarfiit marluk aterminnik taaserusunngitsut tunuliaqutaralugit taama allappoq.
Danskit nalunaaqutaat malillugu sapaammi ullaakkut suna siunertarineqarsimanersoq suli pisortatigoortumik uppernarsarneqanngilaq. Aallaasersorneq piffimmi nalunaaqutaq malillugu arfininngornermi unnukut pivoq. Donald Trump allallu arlallit qimarngunneqarput.
Trumpi præsidentiunerminni aatsaat siullermeerluni tusagassiortut nerersuaqatigiinneranni, hotelimi ingerlanneqartumi peqataasussaagaluarpoq.
Kingorna angut isumannaallisaasunit Secret Servicekkunneersoq aallaaneqartoq, aqerlulli pitarsinnaanngisaanik eqqornaveeqqumminit annaanneqartoq, præsidenti oqarpoq. Allanik ajoqusertoqanngilaq.
Nerersuaqatigiinnissaq taamaatinneqarpoq piffissamullu kingusinnerusumut nuutinneqarluni.
Trumpi naapertorlugu pinerliisoq Californiaminngaanneerpoq. Angut 31-nik ukiulik Amerikami naalagaaffiit ilaannit illoqarfimmit Torrancemeersoq pineqartoq, Amerikami tusagassiorfiit arlallit allaaserinnipput.
Angut Washtington D.C.-mi hotelimi saassusinermini illuinnarsuummik, timmiarsiummik savinnillu arlalinnik nassarpoq. Taama Metropolitan Policemi pisortaq Jeffery Carrol danskit nalunaaqutaat malillugu sapaammi ullaakkut oqarpoq.
Pinerliisoq aallaaneqanngitsoq ilanngullugu oqarpoq.
Angut hotelimi najugaqartoq, oqartussat isumaqarput. Ataasinngorpat naalagaaffiup eqqartuussivianut sassartinneqassaaq.
Ukiumoortumik tusagassiortut nerersuaqatigiinnerat The White House Correspondents' Associationimit (WHCA) aaqqissuunneqarpoq. Tassani tusagassiortut Det Hvide Husimi sulisut ilaasortaapput.
Aaqqissuisut malillugit tusagassiortut Det Hvide Husillu akornanni eqqissisimasumik naapeqatigiinnermik pilersitsinissaq tusagassiortut nerersuaqatigiinneranni siunertaavoq.
