Sisamanngormat Aalborgimi Kalaallit Illuanni fiistertoqarpoq. Illup maanna illoqarfiup qeqqani Vesterbromi inissisimaffimminut nuunnerata ukiunik qulinngortorsiornera nalliussineqarpoq.
Nalliuttorsiorneq kaffillernikkut, uaajeernikkut, nipilersortarfiup tamanut atugassiarineqarneranut kiisalu Ivaana Olsenip qallunaallu singer-songwriterip Mikael K-p tusarnaartitsinerannut, erinarsukkamik nutaamik Frit Grønlandimik, atuakkiortumit Knud Romerimit taalliarineqartumik saqqummiisoqarpoq.
Erinarsuut ukiortaareersimatsiarnerani Amerikamiut Kalaallit Nunaannik ilungersortitsinerata sakkortunerpaanerani taalliarineqarpoq.
- Naak inuusuinngikkaluarlunga sorsunnissamut piareersimasimavunga. Donald Trumpip Kalaallit Nunaannik tigusiniarluni uteriisernerata kamatsippanga, Knud Romer Sermitsiamut oqaluttuarpoq.
- Ilaquttakka sakkutuujusarnermik ileqqoqarput – Trumpillu sussaanngitsumik oqalunnerata ima ajuallatsitsigivaanga, allaat Mikael saaffiginnimmat akuersillunga.
Erinarsoqataaffissaq
Frit Grønland juullimi sulinngiffeqarnermi suliarineqarpoq.
- Knud oqaloqatigaara – Kalaallillu Nunaannut erinarsuummik tapersiummik sanassalluta aalajangerparput – Re-Sepp-Ten-imut imalluunniit Giv en hånd til Afrikamut, tamanit erinarsorneqarsinnaasumut eqqaanartumik. Kalaallit Nunaannut tamanna tulluarpoq, Mikael K nassuiaavoq.
- Knudip taalliorpaa uangalu erinniorpara. Taavalu immiussisarfiliarluta Frit Grønland immiupparput, maannalu taanna YouTube-mi, Sportify-mi – inuillu nipilersuutinik aallertarfiini tusarnaarneqarsinnaavoq.
- Taamaammat Aalborgimi Kalaallit Illuata sisamanngornermi nalliuttorsiornermi aaqqissuinermi nipilersorusunnersunga aperimmanga, erngerlunga akuersivunga.
Tigulluarneqaqisoq
- Pissangalaangitsuunngilangali, siullermeerlungami erinarsuut kalaallinut tusarnaartunut tusartittussaavara, taamaammallu pikkunaqaaq. Qujanartumillu erinarsuut tigulluarneqarpoq, Mikael K. oqarpoq.
Mikael K-p nalliuttorsiornermi nipilersornera nalaatsornerinnaanngilaq. Siusinnerusukkut – ukiut qulit matuma siorna tikillugu – Kalaallit Illuat Aalborgip sinaani kalaaleqarfimmik taaneqartumi Umanakvejimi inissisimavoq – tamaanilu Mikael K-p nipilersortartuunera inuusuttut klubianni aallartippoq.
- Kalaaleqarfimmeerpunga, Mette Frederiksenilu Gug-iminngaanneerpoq (Aalborgimi illoqarfiup avataata tungaani, aaqqiss.), Mikael K tulluusimaarluni erseqqissaavoq.
Frit Grønland februaarimi immiunneqartussanngormat Mikael K-p erinarsortartut nipilersortartullu arlallit katersorpai – Mikael K-llu Knud Romerillu saniatigut Mikael K-p nipilersortartui Klondyke, Allan Olsen, Marie Frank, Kenneth Thordal, Carl Knast, The Elitist, Wash Your Dirty Money With MyArt kiisalu Stationspumaerne Langå-meersut peqataapput.
