SIK-p siulittaasua Jess G. Berthelsen tallimanngornermi sulisartut ulluanni maajip aallaqqaataani Nuummi ualikkut oqalugiarpoq.
Inuiaqatigiinni nuuttarnerup kingunerisaanik allannguutit mianersoqqussutigalugit oqalugiarnini aallartippaa.
– Isumaqarpunga Nunatsinnut asasatsinnut uloriarnartorsiortitsinerpaaq tassaasoq maani nunami amerleriartorunnaarluta ikiliartupiluulernikuunerput, oqarpoq.
Jess G. Berthelsenip aningaasaqarnikkut pissutsit pissutaallutik nuuttoqartarnera oqaatigaa.
Suut tamarmik akitsoraluttuinnarnerat, SIK-mi ilaasortanut annertuumik eqquisut, nunarsuarmi ineriartornerup ilagai. Aningaasaqarnerli Kalaallit Nunaata nammineq aamma akisussaaqataaffigigaa Jess G Berthelsen oqarpoq:
– Kisianni uagut qinersisartut aamma tassani akisussaaqataavugut politikerit neriorsueqattaartut qinertaratsigit. Uffalu tikkuussinngitsut aningaasat suminngaanniik aassanerlugit, oqarpoq.
Susassaqarfiit aningaasalersornissaat inisseqqaartinnagit angerlaanneqarnissaannik oqalunneq politikerit unitsittariaqaraat Jess G. Berthelsen isumaqarpoq.
– Savalimmiormiut ilinniarfiginiartigit, taakkua aamma namminiilivinnissamik kissaateqarput. Kisianni Danmarkimiik qinnuuluunngillat, namminnerli aalajangernermikkut Danmarkimiik tapiissutit ikiliartortippaat, taakkumi ilisimavaat qinnuuloorluni namminiilivittoqarsinnaanngitsoq.
SIK-p siulittaasuata aatsitassarsiorsinnaanermik periarfissat oqaloqatigiissutigineqaqqullugit kajumissaarutigaa – uranimik akerlerinikuusaminik akoqaraluarpataluunniit. Raajaleriffiit siunissaat pillugit oqartussat annernaraluarpalluunniit aamma aalajangiisariaqartoq oqarpoq.
– Ingerlariaqqissagutta pilliuteqanngitsoorsinnaanngilagut. Kalaaleqatigut amerligaluttuinnartut Nunarput qimallugu nuuttarput. Nuuttartut ikiliartortilissagutsigit pigissaarneq maani nunami pilersissallugu aqqutissatuaavoq, SIK-mi siulittaasoq oqarpoq.
