Qillaq-Karl Kristiansen sanasutut ilinniakkani 2018-mi naammassivaa. Maannakkullu namminersortutut suliffeqarfiaraatini Hanahoq (Sanasoq, aaqq.) ingerlallugu.
- Ukiorpaaluit sanasutut suleriarlunga namminersortunngornissaq eqqarsaatigisimanngisaannarnikuullugu namminersortunngoriartuaarnikuuvunga, Qillaq-Karl Kristiansen Sermitsiamut oqarpoq.
Namminersortunngorniarluni aalajangernera
Siornatigut suliffigisimasaminit suliassaarunnertik pissutigalugu angerlartitaavoq.
- Oktobarimi suliassaarunnerput tunngavigalugu suliffitsinni suliunnaarnikuuvugut, qaammatillu marluk missaani nammineq inigisara nutarterlugu aaqqissornikuuara, Qillaq-Karl Kristiansen oqarpoq.
Sivitsortumik suliffissaaleqinini pissutigalugu namminersortunngorniarluni aalajangerpoq.
- Eqqarsaatiginikuunngikkaluarpara namminersortunngorsinnaanissara, allamilli suliffissarsineq ajulerama namminersortunngornissara siunniuppara, Qillaq-Karl Kristiansen oqarpoq.
Aningaasaateqarfiup Thulefondenip aningaasanik tapiineratigut namminersortutut aallartissinnaalerpoq.
- Namminersortutut aallartikkumallunga Thulefonden qinnuteqarfigaara, sakkunik atortunillu pisinissannut tapiinissaa siunertaralugu, Qillaq-Karl Kristiansen nassuiaavoq.
Suliffeqarfiutini Hanahoq aasakkut 2024-mi aallartippaa. Taamaammallu umiarsuaq siulleq aqqutigalugu atortussanik tikisitsinnaasimanani.
- Suliassat annikitsunnguit aallartissutigivakka. Siullerpaamik aneerasaartarfimmik nutarterivunga, Pilersuisumi atortut pisiarisinnaasakka atorlugit, Qillaq-Karl Kristiansen oqarpoq.
Namminersortutut aallartinneq unammillernartoq
Suliffeqarfinnit allanit ilisimaneqannginnini suliffeqarfimmik pilersitsinermini unammillernartippaa
- Ilungersunarnerpaanikuuvoq aallarteqqaarama suliffeqarfinnit ilisimaneqarnikuunnginnama, tassa taanna siullermik isertitaqarniarnikkut aallartisarninni ilungersunarsimasoq, Qillaq-Karl Kristiansen oqarpoq.
Suliffeqarfiutini aallartikkamiuk suliffeqarfinnit ilisarisimaneqalerniarluni suliffeqarfinnut attaveqartarpoq.
- Suliffeqarfinniit ilisimaneqalerusullunga e-mailikkut suliffeqarfinnut nassiussuinikuuvunga. Massakkut suliffeqarfiit assigiinngitsut arlallit saaffigisalernikuuaannga suliassanut tunngatillugu neqeroorusioqqullunga, Qillaq Karl Kristiansen oqarpoq.
Qaanaami sanasutut namminersortuuniaraanni naammagittarsinnaassuseqartariaqartoq, sanasutut namminersortup oqaatigaa. Qaanaarmi ukiumut marloriarluni imaluunniit pingasoriarluni taamaallaat umiarsuarmik pajuttumik tikinneqartarmat.
- Atortussanillu tikisitsiniarluta utaqqisariaqartarpugut. Suliassallu amerlanerpaartaat taamaallaat aasaanerani suliassaasarlutik, Qillaq-Karl Kristiansen oqarpoq.
Sulisoqarniarneq
Ukioq kingulleq suliassaqarluarnera pissutigalugu aasaaneraniit januarip imaluunniit februarip tungaanut sisamanik sulisoqarpoq.
- Massakkunaasiit suliassavut killeqartorujussuanngormata ataasiinnarmik suleqateqarallarpunga, Qillaq-Karl Kristiansen nassuiaavoq.
Namminersortutut suliffiuteqarluni oqitsuinnaanngilaq, ataasiarlunilu tunniutiinnarnissaminik eqqarsaateqarsimavoq.
- Artornarsisarlunilu oqileqqittarpoq. Tunniutiinnarnaveersaarneq uniinnarnaveersaarnerlu siumut aallariaqqissutaasarput, Qillaq-Karl Kristiansen oqarpoq.
Nunaqqamminut tapersersuisoq
Aningaasatigut imaluunniit suliffeqarfiutini aqqutigalugu ikiuunnermigut timersoqatigiiffinnut aaqqissuussanullu assigiinngitsunut tapersersuisarpoq.
- Qaanaami timersornikkut periarfissakittuararsuummat timersortartut tapersersorusunnartarput. Assersuutigalugu qimussersuartoqartillugu ikiuuttarpunga, uiagassani nakkutilliisooqataallunga. Aamma aperineqariarama sikumiit nunamut qimusserluni qaqiffissamik aqqutigissaanikuuvunga, Qillaq-Karl Kristiansen oqarpoq.
Siunissaq
Suliffeqarfik Hanahoq suli mikisunnguuvoq, siunissamilu annertusiartornissaa piginnittuata neriuutigaa.
- Pilersaarusiullaqqinnerpaat ilaginngimmannga siunissaq takorlooruminaatsippara. Kisiani soorunami ineriartorujoornissaq angorusunnarpoq, Qillaq-Karl Kristiansen oqarpoq.
Illumi mikisunnguami kioskikumi maannakkut sannaveqarpoq, neriuutigaalu anginerusumik siunissami sannaveqalersinnaassalluni.
- Taamaalillunga ukiumut naammattunik atortunik peqartalernissara angusinnaalissagaluarakku, Qillaq-Karl Kristiansen oqarpoq.
Qaanaap illoqarfiani sanasutut namminersortut massakkut pingasuusut Qillaq-Karl Kristiansennip oqaatigaa, tamannalu unammilleqatigiinnermut ajornartorsiutaasorinngilaa.
- Unamilleqatigiinnerput imatut malugineq ajorpara, pingasuulluta illoqarfiarannguatsinnut naammappasippugut, suliassat agguataarpasittaratsigit, Qillaq-Karl Kristiansen oqarpoq.
Abonnementer
Sermitsiaq.gl – Nittartagaq
- Sermitsiaq.gl-imi allaaserisat tamakkiisumik atuarsinnaalissavatit
- Qaammammut kr. 59.00
- Ukiumut kr. 650.00
Sermitsiaq - E-aviisi
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
AG - Atuagagdliutit E-aviisi
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-mi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
Sermitsiaq.AG+
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik iserfigisinnaalissavatit
- Arnanut e-magasinatut atuarsinnaalissavat
- Nutserisoq.gl atorsinnaanngussavat
- Soqutiginnikkuit abonnement@sermitsiaq.gl-imut allagaqarsinnaavutit
Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.
