Avannaata Kommuniata kommunalbestyrelsianut qinigaq, aamma siusinnerusukkut borgmesteriusimasoq, Palle Jerimiassen (D), qinikkatut atuukkunnaarpoq.
Palle Jerimiassenip Avannaata Kommuniani qinikkatut tunuarniutaa, Avannaata Kommuniani kommunalbestyrelsip tallimanngornermi ataatsimiillutik akueraat. Avannaata Kommunia nittartakkamini taama allappoq.
Ataatsimiinneq matoqqasumik ingerlanneqarpoq, taamaattumik borgmesteriusimasup tunuarniarluni qinnuteqaataanut taasinerit oqallinnerillu qanoq issimanersut Sermitsiamit oqaluttuarineqarsinnaanngilaq.
1.maj sulileqqikkaluartoq
Palle Jerimiassen ukiup ataatsip missaani atuuffimminit sulinngiffeqareerluni ukioq manna maajip aallaqqaataani kommunalbestyrelsimut ilaasortanngoqqippoq. Maannali tassa ullut arfineq-pingasut qaangiuttut tunuarniutaa akuerineqarpoq.
Sermitsiap borgmesteriusimasoq atuuffimminit sooq tunuarusulernersoq pingasunngornermi aperaa. Tassani peqqissutsi tunngavilersuutigaa.
- Politikkimut uteqqinnissara eqqarsaatigileraagakku malugisinnaavara timera suli qisuariartartoq iluaalliulerluni, aama naqitsinera qaffaqqilluni, uippakajaarneq taanna atornikuusara uteqqittarpoq politikkimut uteqqinniarlunga eqqarsaleraagama.
- Timera piareersimanngilaq, naak immaqa inuttaa piumagaluartoq, Palle Jerimiassen Sermitsiamut siusinnerusukkut oqarpoq.
Siorna kommunimut qineqqusaarnerup nalaani KNR-imut oqarputit borgmesterinngoqqissinnaaguit tamanna angorusullugu. Borgmesterinngoqqinngitsoornerit maanna tunuarusulernernut peqqutaaqataava?
- Naamik. Tassami qineqqusaaraangatta siunnerfeqartarpugut. Kisianni aamma politikkikkut allanngorneq aamma akuerivara. Aamma taanna peqqutaanngilaq, Palle Jerimiassen pingasunngornermi oqarpoq.
Niels Erik Bro (D), Palle Jerimiassen taarserlugu kommunalbestyrelsimut ilaasortanngorpoq.
