Gummi aannikoq, innaallannerit aquttarfillu ikuallattoq

Timmisartoq Dash-8 Air Greenlandimeersoq Nuummiit Narsarsuarmut sapaammi januaarip 18-ianni ulloqeqqalersoq aallarmat aquttarfiani innaallannerit, inneq pujuliornerlu aallartipput.

Pisimasoq ajutoornerit pillugit misissueqqissaartartut nalunaarusiaanni maajip tallimaanni saqqummersumi allaaserisami pisimasoq ilungersunartutut taaneqarpoq.

Timmisartoq Dash-8 OY-GRG-mik nalunaarsorsimasoq Nuummi mittarfimmiit aallareerluni qummut ingerlaartilluni 7.000 fodsimut (2 kilometerisut qutsitsigisumut) killittorlu timmisartortartut gummi sakkortuumik ikuallassunnittoq naamavaat, kinguninngualu saavani igalaap saamiatungaani igalaanut kiassaatit aqqutaanniit inneq innaallannerillu takuneqarsinnaalerput.

Timmisartup inuttai igalaap kiassaataa qamippaat, taamaalillutik ikuallanneq qamillugulugu innaallattaarunnaartillugulu. Timmisartup aquttarfiani pujuliorneq pissutigalugu anersaartuutinik atisipput, 9.000 fodsinillu qutsitsigisumukaarneq unitsillugu Nuummut uterlutik ajunngitsumik millutik.

Misigisaq nuanniitsoq

Soorunami ilaasut tamanna nuanniitsumik misigisaqarfigisimavaat.

- Timmisartup minnerata kingorna ilaasut timmisartup naalagaaneranit paasissutissinneqarput. Ilaasut tamarmik paasisaqarsinnaaniassammata kalaallisut, qallunaatut tuluttullu ingerlanneqarpoq, Air Greenland Sermitsiamut allakkatigut paasissutissiivoq.

- Ilaasut pisoq pillugu qanorlu iliuuseqarfigineqarsimanera pillugu paasitinneqarput. Timmisartup naalagaa paasissutisseeereerami apeqqutissaqartoqarnersoq aperivoq, apeqquteqartoqaranili. Ilaasut minnerup kingorna oqiliallappasissimanerat naammagisimaarinnippasinnerallu timmisartup naalagaata aamma maluginiarpaa.

- Ilaasut arlallit inuttanik isumannaatsumik minnissap isumagineqarnera qujamasuutigaat, ingammik timmisartornerup nalaani putsumik naamasaqarsimagamik, Air Greenland akivoq.

- Air Greenlandip taamatut pisoqartillugu aalajangersimasunik periuseqartarpoq, pisorlu ingerlatsinermi periutsit atuuttut malillugit isumannaallisaanermik, ersarissumik paasissutissiinermik ilaasunillu isumassuinermik pingaartitsinikkut suliarineqarpoq, timmisartuutileqatigiiffimmiit oqaatigineqarpoq.

Sikringi qamittoq

Timmisartoq mereermat Air Greenlandip teknikeriisa timmisartup aquttarfiani ajoqusernerit misissorpaat. Misissuinermi aquttarfiup igalaavata talerperliup kiassaataa ajoqusersimasoq paasineqarpoq. Igalaap kiassaataa kissappallaarluni qamittoorluni aappoq. Aammattaaq timmisartup innaallagissamik pilersorneqarnerani 115 V-imi igalaamut kiassaataasoq qaarsimasoq paasineqarpoq, soorlu qamittoornermi taamaattoqartartoq.

Kiassaateqarfiup aassimasup saniatigut timmisartoq ajoquserneqaranilu inunnik ajoqusertoqanngilaq.

Ajutoortoqartillugu misissueqqissaartartut pisut misissoreerlugit iliuuseqaqqissanatik aalajangerput.

- Sikringi taamaattussaanertut qamippoq. Timmisartup isumannaatsuunissaa anguniarlugu annerusumik iliuuseqarsinnaannginnitsinnik takussutissiivoq, ajutoortoqartillugu misissueqqissaartartoq Kristian Sivertsen oqarpoq.

- Ajutoortoqartillugu misissueqqissaartartut timmisartornerup isumannaatsuunerata suliassaraat — kina pisuunersoq akisussaasuunersorlu tikkuarnagu — pissutsit pitsanngorsarneqarsinnaasut tikkuarneritigut, Kristian Sivertsen erseqqissaavoq.

OY-GRG Suloqqamik atilik Air Greenlandip 2010-mi timmisartuutaanut ilannguppoq. Timmisartoq 1997-imi sananeqarpoq. Air Greenland timmisartunik Dash-8-200-nik 37-nik ilaasoqarsinnaasunik arfineq-pingasunik peqarpoq.