KNI-mik pilersuiunnaarneq Arctic Importip annilaangassutiginngilaa

Suliffeqarfiup KNI-mut ulluinnarni nioqqutissanik pilersuinissamik neqeroorummut ajorsarnera Arctic Importimi pisortaanerup Thomas Hjortip uggoraa, tamannali isumakuluutiginngilaa. Kalaallit Nunaata aningaasaqarnerata siuariartortuarnissaa taamaalillunilu aamma Arctic Importip siuariartornissaanut periarfissat pitsaasut upperai.

- Ukiuni tallimani isumaqatigiissuteqarpugut – isumaqatigiissutigineqartutullu KNI siorna neqerooruteqartitseqqippoq. Ukiuni pingasuni tulliuttuni neqeroorutigisinnaasarput pilerinartoq isumaqarpugut. Allalli akikinnerusumik neqeroorput. Tamanna naapertuilluartuuvoq – tamatumunngalu atatillugu peqqissimissuteqanngilanga, Thomas Hjort oqarpoq.

- KNI-mut attaveqarluartuaannarpugut, suliffeqarfissuarmullu nioqqutissanik allanik pilersuiuassaagut, taamaammat qanimut suleqatigiinneq ingerlaannassaaq.

Nioqqutissat nutaat

Arctic Import ukiuni tallimani kingullerni KNI-mut ulluinnarni nioqqutinik Norgemiut niuertarfissuannit Rema 1000-meersunik pilersuisuuvoq. Maanna nunatsinni nunaqarfinni atuisut Dagrofa-p tunisassiaanik, Pisiffimmi aamma pisiarineqarsinnaasorpassuarnik, pisisalernissartik sungiusartariaqarpaat.

Arctic Import ukiuni tallimani taakkunani piginneqataasunut sinneqartoorutinik tunniussaqartarsimavoq – tamannalu soorunami Arctic Importip kaaviiaartitaanut malunnaatilimmik sunniuteqarpoq.

- Ulluinnarnili nioqqutissat iluanaaruteqarfigisarnerat tunngaviunnginnami uagutsinnut sunniuteqassanngilaq, aamma suliffeqarfiup Kalaallit Nunaanni immikkoortortaani sulisunut sunniuteqarnavianngilaq. Ingerlatseqatigiiffik Kalaallit Nunaanni 35-nik sulisoqarpoq, Thomas Hjort ilisimatitsivoq.

- Arctic Import ukiut ingerlaneranni Kalaallit Nunaanni naleqqussartarnikuuarput, piffissap ilaani ulluinnarni niuertarfiutigut tunillugillu tuniniaaneq tamakkiisumik siunniupparput.

- Tamanna pingaarnertut niuerfigaarput - tassanilu Kalaallit Nunaata aningaasaqarnerata ilaatigut takornariartitsinerup tungaatigut siuariartortuarnissaa upperaarput, taamaammat naak maanna ulluinnarni nioqqutissat KNI-mut tunisarunnaaraluarigut eqqissisimalluinnarpunga. Aningaasartuutit aquppagut, tamannalu pissutigalugu Kalaallit Nunaanni qullersaqarfitta nutaap ukiup nikinnerani atulernissaanik pilersaarutitsinnut allannguinngilaq.

Qullersaqarfik nutaaq

Arctic Import Nuummi Qeqertanumi qullersaqarfittaassamik maanna sanaartorpoq. Qullersaqarfik 1500 kvadratmeterinik angissuseqarlunilu allaffeqarfittaqarluni, saqqummersitsivittaqarluni minnerunngitsumillu Kalaallit Nunaanni annersaasa ilaannik qerititsiveqassaaq.

- Suli pisariaqartipparput. KNI-p ulluinnarni nioqqutigisartagaasa amerlanersaat Danmarkimit toqqaannartumik pisiniarfinnut nassiunneqartarput, taamaammat kvadratmetererpassuit nutaat suli pisariaqartippagut, Thomas Hjort oqarpoq.

- Ukiut 50-ingajaat matuma siorna Kalaallit Nunaanni pilersinneqarpugut, ukiunilu 50-ini tulliuttuni tassaniittuarnissarput naatsorsuutigaarput.

Arctic Import Ole Nielsenimit Poul Jørgen Nielsenimillu 1978-imi Kalaallit Nunaanni pilersinneqarsimavoq. Suliffeqarfik suli pilersitsisunit ilaqutaannillu pigineqarpoq, Thomas Hjortilu annikitsumik piginneqataassuteqarluni.