Blok 5-imi Nuummi oktobarip aallartinnerani 2024-mi toqutsisoqarneranut tunngatillugu suliaq ataasinngornermi ualikkut nanginneqarpoq, tassanilu ilisimannittut siulliit apersorneqarnerat aallartinneqarluni.
Siullermik angutit marluk angut 42-nik ukiulik unnerluutigineqartoq pillugu ilisimannittut oqaloqatigineqarput. Angut siulleq takkukkusunngeqqaaraluarmat politiinit aaneqarpoq.
Aappaa unnerluutigineqartoq Blok 5-imukaqatigisimanagu oqarpoq. Unnerluutigineqartup killisiorneqarnermini taanna pequusivimmeeqatigisimallugu angullu sinittoq takusimallugu oqarnikuummat ilimannittup oqaaserisai suliamut pingaaruteqarput.
Ilisimattut pingajuat angerlarsimaffeqanngitsunut unnuisarfimmi sulisuunikuuvoq. Angut unnerluutigineqartoq inuunini naallugu iseqqusaajunnaarnikuusoq oqaluttuaraa, taamaakkaluartoq inimik unnuiffigisinnaasaanik tunineqarsimalluni. Ilisimannittut tamarmik oqaluttuaat sumut atorneqassanersut maannakkut ilisimanngilarput, immaqali kingusinnerusukkut paasinarsiumaarpoq.
Ilisimannittut ataasinngornermi apersorneqartut sisamaat kingullerlu tassaavoq unnerluutigineqartup affarmik qatanngutaa. Takorpiarneq ajorput oktobarimi 2024-mi pulaarpaa, tassanilu politiinit aaneqarluni
– Atisalersortoq malugaara. (...) Susoqarnersoq aperaara akineqarnangali. Qungujulluni isigiinnarpaanga, oqarpoq.
Unnerluutigineqartoq 42-nik ukiulik pisuunnginnerarpoq eqqartuussinermilu apeqqutit suli akiumanagit.
Angut alla aamma pasineqartoq
Angut alla suliami pingaarutilik ilisimannittut allattorsimaffianniinngilaq.
Angut 42-nik ukiulik suli politiinit pasineqanngitsoq angutit allat allanik pissuteqarluni pissarsiarineqarnikuupput. Angutit taakku ilaat maanna pasineqarpoq unnerluutigineqaranili.
Tassa imaappoq unnerluussisussaatitaasup taanna eqqartuussivimmut unnerluutiginisariaqarsorinngilaa. Paasissutissanilli nutaanik pissarsisoqarpat taamaaliorsinnaalluni.
Angutip taassuma toqutaasup oqarasuaataa angallattagaq paarisimammagu politiit misissuiffiginikuuaat. Aamma puiaasamik Rød Aalborgimut atassuserneqarpoq, taanna tassaavoq angutip inuartarineqartup saniani nassaarineqarnikoq.
Angutip tigummigallarneqarnissaanut tunngavissaqanngimmat 2024-mi iperagaanikuuvoq.
