Takornariat peqqinnissaqarfinnik tatisisinnaanerat nunaqavissunillu ajoqusiisinnaanerat ernumagineqarmat takornariat peqqinnissaqarfimmi sullinneqartarnerat siornatigut oqallisaangaarsimavoq.
Maanna Naalakkersuisut inatsisissatut siunnersuut tusarniaassutigilerpaat, taanna akuerineqarpat takornariat ilaat peqqinnissaqarfimmi sullinneqarnerminni akiliisinneqartassapput.
Inatsisissatut siunnersuummi takornariat allallu Kalaallit Nunaanniittut akeqanngitsumik sullinneqarnissamik pisinnaatitaaffeqanngitsut akiliisinneqartalernissaat ajornarunnaassaaq:
"Tamanna peqqinnissaqarfiup tamatumunngarpiaq tunngatillugu allaffissornermut aningaasartuutaanut matussusiissutissanik nakorsiarnermi aallarnisaataasumik assigisaanilluunniit misissorneqarnermut naleqquttumik akiliuteqartitsisalernissamut ammaassisussaassaaq,“ inatsisissatut siunnersuummut oqaaseqaatini allassimavoq.
Missingersuut: 4,8 millionit koruunit missaannik isertitaqarfiussasoq
Nakorsiarnermut akitsuut taama ittoq atuutilersinneqarpat nunap karsia ukiumut 4,8 million koruuninik isertitaqassasoq naatsorsuutigineqarpoq.
Inatsissatut siunnersuut innuttaasunut nalinginnaasunut attuumassuteqanngimmat inuit innuttaasut nalunaarsorsimaffianni allassimasut Kalaallit Nunaannilu najugallit eqqorneqassanngitsut erseqqissarneqarpoq.
Malittarisassalli nutaat takornarianut tikeraanullu allanut sullinneqarnissamik pisinnaatitaaffeqanngitsunut atuupput.
Takornariat ilaat suli akeqanngitsumik sullinneqarsinnaassapput. Ilaatigut Danmarkimit Savalimmiunillu tikittut napparsimaleriataarnermi, ajutoornermi assigisaanilluunniit atugaqarnermi akeqanngitsumik nakorsiarsinnaassapput.
Peqqissarneqalertortariaqarpa imaluunniit naamik?
Siunnersuut naapertorlugu inuit nunanit avannarlerneersut EU-meersullu nunatta nunallu taakkua akornanni peqqissartinnissamut tunngasutigut isumaqatigiissutaat atuuttut naapertorlugit nunatsinni peqqinnissakkut akeqanngitsumik aamma sullinneqarsinnaatitaaffeqaannassapput.
Akitsuutit nutaat akiliuteqartitsinerusalernissamut tunngavissatut aalajangersakkat takornarianut peqqissarneqalertornissamik ujartuinngikkaluarlutik sullinneqarumallutik peqqinnissaqarfimmut saaffiginnittunut annermik atuuttussaassapput, taakkulu takornarianut Danmarkimeersut tamatumani aamma atuupput.
Akiliuteqartitsinerusalernissamut tunngavissatut aalajangersakkat nunat avannarliit EU-llu tassa nunatsinni akeqanngitsumik peqqissarneqarsinnaatitaanermik isumaqatigiissuteqarfiunngitsut avataanni najugaqartunut, peqqissarneqalertornissamik pisariaqartitsinersut pisariaqartitsinnginnersulluunniit apeqqutaatinnagu, aamma atuutsinneqarsinnaassapput.
