Ilulissani takornarialerisut mittarfittaarnissamut piareersartut

Ilulissani mittarfissuaq nutaaq ukiup naajartornerani atulerpat, Ilulissani inuussutissarsiornerup maannakkornit ulapaarfiunerulernissaa piareersimaffiginiarlugu, Ilulissani namminersorlutik inuussutissarsiutillit siunissamut millionilikkaanik aningaasaliipput.

Takornariat amerlanerit

Ilulissani ilaqutariit Magnussenikkut inuussutissarsiornerup iluani ilisimaneqarluarput, ukiorpassuarnilu namminersortutut inuussutissarsiuteqarsimallutik. 

Suliffeqarfiit ingerlalluartut Pilu Sport, Future Ilulissat, Ilulissat Escape, Ilulissat City Apartments aamma Ilulissat Icefiord Lodge, ilaqutariit ingerlataraat.

Peter Magnussenip paniata Pilunnguaq Magnussenip, taassumalu inooqataataa Kaali Lund Mathæussenip, Ilulissani takornariartitsivik Ilulissat Escape ApS ingerlappaat. 

Ilulissani takornariaqarnerup annertunerulernissaanut piareersaatinut atatillugu, takornarianik angallassissutip pioreersup ataatsip saniatigut, Ilulissat Escape Targa-nik nutaanik marlunnik pisaaqqammertoq, Peter Magnussen piginnittut sinnerlugit oqarpoq.

- Takornariat siumoortumik inniminniisut amerlereernikuupput, taamaammallu Poca 770 qulinik ilaasoqarsinnaasoq pigisarput naammakkunnaarmat, angallassissutinik nutaanik marlunnik pisinissaq pisariaqarsimavoq, taanna oqarpoq.

Unnuisarfiit amerlanerusut

Ilaqutariit Magnussenikkut arlalinnik unnuisarfiuteqarput, taakkuli aamma maanna arlalinnik ilaneqarput.

- Unnuisarfiit pioreersut saniatigut, nutaat sisamat aasaq piareerpagut. Kisianni ingerlaannaq paasivarput unnuisarfinnik suli amerlanerusunik pisariaqartitsisoqartoq. Taamaattumik allat arfineq pingasut piffissami aggersumi suliarineqassapput.

- Ilulissani inuussutissarsiornikkut maanaakkut killiffik eqqarsaatigalugu siunissamut isumalluarnarpoq.

- Suliassat amerlanerulertussaasut takusinnaavarput, taamaattumik uanga panigalu millioninik arlalinnik siunissamut aningaasaliivugut, Peter Magnussen oqarpoq.

Ilulissani mittarfissualiortoqarnera namminersortut inerisaanermut aningaasaliinerunissaannut tunngavissaqarlualersikkaa, namminersortoq misilittagartooq erseqqissaavoq.

Neqeroorutit amerlanerusut

Jan Cortsenip nuliatalu Akisók Cortsenip takornariartitsivik Ilulissat Local Guide ingerlappaat. Suliffeqarfik 2024-mi aallarteqqaarmat imaatigut misigisassarsiortitsineq annerusumik taamaallaat aappariit ingerlappaat.

Mittarfissuarli atulerpat takornariat amerlanerusut tikittalernissaat piarieersimaffiginiarlugu, takornarianut neqeroorutit amerlineqarnissaat pisariaqarsimasoq, Jan Cortsen oqarpoq. 

Ilulissat Local Guide UTV-nik nutaaliaasunik pingasunik ilaasoqarsinnaasunik pisaaqqammerpoq. Ukiuunerani Ilulissat Kangerluanut takornarianik angallassalernissaq ilaatigut siunertaasoq, taanna oqarpoq.

- Ilulissat Kangerlua assut soqutigineqarpoq, taamaammat UTV-it 200 hestinik motorillit atorluarneqalereerput allanillu ilaqqinnissaat siunertaavoq, taanna oqarpoq.

Ilulissat Kangerluani illuaqqat unnuisarfiit amerliartornerat ilutigalugu, tamaanga takornariartartut aamma amerliartorput. Sullissinerlu pitsaasuussappat takorialerisut akunnerminni suleqatigiilluarnissaat pisariaqartoq, taanna isumaqarpoq.

- Takornariat Ilulissat Kangerluani unnuisarfinnukarniartut angallattalernissaat pillugu takornarialerisut allat isumaqatigiissuteqarfigissavakka. Aammali umiarsuit takornariartaatit atorlugit takornariat tikittartut UTV-nik illoqarfimmi takusassarsiortittalernissaat siunertaavoq, taanna oqarpoq.

Akisók Cortsen ulluinnarni ilinniartitsisutut atorfeqarpoq. Kisiannili Ilulissat Local Guidep sukkasuumik ineriartornera pissutaalluni atorfimminiik soraarluni takornarialeriffimmi sulilissasoq, Jan Cortsen oqarpoq.

Ilulissat eqqaa maannakkut annikitsuinnarmik sikoqarpoq sulilu umiatsiamik angallassisoqartartoq, Jan Cortsen oqarpoq. Taanna aamma takornariartitsivimmi Ilulissat Excursions ApS-imi pisortaavoq.