Ny Carlsbergfondetimi nersornaasiinermi Inuuteq Storch eqqumiitsuliortut allat sisamat peqatigalugit immikkut suliniuteqarnini eqqumiitsuliornermillu soqutigisaqarnini pillugit 400.000 koruuninik aningaasartalimmik nersornaaserneqarpoq.
Nersornaaserneqartut taakkua toqqarneqarnerat "qallunaaq eqqumiitsuliornerup ullumikkut nukittuneranut assigiinngissusersuanullu“ ersiutaasoq, Ny Carlsbergfondets siulittaasua Sanne Kofod Olsen oqarpoq
Akissarsisitsisoqarmat qaaqqusat 400-t najuupput:
- Nersornaaserneqartut nukittuujunerat assigiinngissusaallu, qallunaat eqqumiitsuliortut ilisartaanaannik ersersitsivoq, taamaattumillu siulersuisut isumaqataapput nersornaaserneqartut tallimaasut ukiut makkua ingerlaneranni Kalaallit Nunaanni Danmarkimilu eqqumiitsuliornermik inuummarissaataasunut peqataallutik tapersersuisut, Ny Carlsbergfondets siulittaasoq Sanne Kofod Olsen oqarpoq.
Inuuteq Storch
Ny Carlsbergfondetip aningaasaateqarfiata nersornaasiinermut tunngavilersuutaani Inuuteq Storch assiliinermik eqqumiitsuliornermik nutaaliaasumik suliaqartartoq maluginiarnartoq allassimavoq, oqaluttuarisaanermi isummiussereertarnerit nunasiaateqarnerlu pillugit oqaluttuanik illuatugiliisoq:
- Storchip suliamini kinaassutsimik, ulluinnarni inuunermik attaveqaqatigiinnermillu sammisaqartarnini misigisassarsiorfigaa, eqqumiitsuliornermilu suliniutaani Kalaallit Nunaata kalaallillu oqaluttuarisaanerata kalaallit isaannit oqaluttuarinissaa qitiuvoq, aningaasaateqarfik allappoq nangillunilu:
- Inuuteq Stochip qallunaat oqaluttuatoqaannik isiginnittaasiannillu, oqaluttuarisaanermi assilialianik nunap assilineqarneranik ilisarnaateqarsimasunik, illuartitserpoq – suliaminilu nunasiaanerup naalakkersuinikkut aaqqissuussaaneranik unammillerpoq namminerlu oqaluttuarisaanermik oqaluttuarsinnaatitaanini erseqqissarlugu.
Storch 2024-mi nunani tamalaani maluginiarneqarlualerpoq, Venedig Biennalemi kalaallini eqqumiitsuliortuni siullersaalluni Danmark sinnerlugu qallunaat pavilion-ianni peqataanermigut.
Ny Carlsbergfondetip nersornaammut atatillugu Facebookimi videoliaq saqqummiuppaa, tassanilu Inuuteq Storchip eqqumiitsuliornerminik ulluinnarnilu inuunermik assiliisarneranik sammisaqarpoq.
