Nunanut allanut unammisartunut sungiusaasoq Fynimi qineqqusaartoq

Kalaallit arnat assammik arsartartut nunanut allanut unammisartut sungiusaasuat De Radikale Venstret sinnerlugit Folketingimut qinigassanngortippoq, tamatumani qulequtaralugu „Suut tamarmik ataqatigiipput“.

Jakob Larsen ulluinnarni ulapputissaqaraluaqaluni, tassa assammik arsartartunik sungiusaasarluni, angalasarnerit unammisarnerillu piffissaqarfigisarlugit, maanna piffissami sinnerani oqallinnernut, apersorneqarnernut Fynimilu innuttaasunut, tassa qinigassanngortiffigisaminut, sukkuaqqanik pappiaqqanillu agguaanermut atortarpaa. 

– Assammik arsarneq nuannaraara, nunarsuarli sorsuffiunngitsoq suli nuannarineruara, Jakob Larsen oqarpoq. Taanna isumaqarpoq Folketingimut ilaasortaajutigaluni nunanut allanut unammisartunut sungiusaasutut piffissaqarluarsinnaassalluni. Tassa Folketingimut ilaasortanngorusuttorpassuit akornanni qinigaassagaluaruni. 

 

USA-p præsidentiata Nunatsinnik tiguaanissamik oqalugiaataata tamatumalu kingorna Nunatta Danmarkimit avissaarnissaanik oqallinnerup Jakob Larsen 2025-mi januaarimi qisuariaateqartippaa.

– Politikikkut qanoq isummernissara ilisimajuaannarnikuuara, siornatigulli politikimut akuliunneq ajorlunga. Trumpilli oqariartuutai namminiilivinnissamillu kissaateqartut amerliartornerat pissutigalugit akuliuttariaqartutut misigisimavunga, Jakob Larsen Maniitsumi inunngorsimasoq Ilulissanilu aamma Nuummi peroriartorsimasoq oqarpoq.

 

Naalagaaffeqatigiinnermik tapersersuisoq

Jakob Larsenip oqaatigaa, Nunatta Danmarkillu attaveqaqatigiinnerat oqaluttuarisaanermut tunngasuinnaanngitsoq, aammali siunissami periaaserineqartussamut siunissamilu akisussaaffimmut tunngassuteqarluni, kinaassutsimik kikkunnullu atanermut tunngassuteqartoq.

– Kalaallit Nunaata Danmarkillu akornanni attaveqartitsisutut imminut isigaanga. Nunatsinni Kalaallit najugaqartut 55.000-iupput Danmarkimilu kalaallit 17.000-iullutik. Isumaqarpunga piffissami Nunatta iluani avataanilu pissaanilissuit avissaartuutsitsiniarneranni naalagaaffeqatigiinnerup paasinissaa pisariaqartoq. Siunissaq, eqqissisimaneq akisussaassuserlu piumasarisariaqarpavut, Jakob Larsen oqarpoq, taassumalu USA-p Kalaallit Nunaanni innuttaasunut sunniiniarnera ernumassutigaa.

– Naak Trumpip kingullermik oqalugiarnermini Nunarput eqqaanngikkaluaraa, suli aarlerinartoqarpoq. Trumpip Nunarput imminiiginnanngilaa. Piumasani anguniarlugu unitsinngisaannassavaa. Isumaqarpungalu tamanna eqqumaffigilluinnartariaqaripput. Facebookimi Kalaallit oqaaseqaataat atuaraangakkit ernumaammertarpunga. Nunatsinni aalassassimaartoqarpoq, isumaqarpungalu mianersunngikkutta kingullermik qinersinermi Naleqqamik qinersisut 24 procentiusut maanna amerleriaateqarsinnaasut.

Timersorneq politikilu 

Jakob Larsen Nunatsinni politikeritut ilisimaneqarpallaanngilaq, inuussutissarsiutigaluguli assammik arsartartutut ilisimaneqarluarluni. Angutit nunanut allanut unammisartut peqatigalugit 100-nit amerlanerusunik nunanut allanut unammisartutut unammisareerpoq, aamma Danmarkimi nunanilu allani timersoqatigiiffinni arsartartutut sungiusaasutullu sulisarsimalluni.

Ukioq manna januaarimi arnat nunanut allanut unammisartut sungiusaasuattut nutaatut aallartippoq, taakkulu 2027-mi juunimi VM-imut anngunniunnissamut anngunnissaat anguniarlugu.

Jakob Larsenimulli taakku arlaat toqqagassaanngilaq.

Tamaasami aallussinnaavai. Timersorneq politikilu.

– Nunanut allanut unammisartunut sungiusaasutut Folketingimilu ilaasortatut sulisinnaassallunga isumaqarpunga. Timersornermut politiki soqutigiuaannarnikuuara, tulluusimaarutigaaralu Nunatta naalagaaffit assigalugit nunatut nammineq erfalasuni atorlugu unammisinnaanini angusimammagu. Tamatuma saniatigut Folketingimi kalaallit kulturiannik paasinninnerulersitsisinnaanissara neriuutigaara, tassanimi ataatsimoorluta pereersut isigisinnaassavavut siunissarlu pillugu suleqatigiissinnaassalluta.