Grønlandsbanken ukiut aappassaa kukkorujussuartoq

Grønlandsbanken ukiut aappassaa kukkorujussuarpoq, tamannalu pissutigalugu atuisartut ilaat akileraarutinik akiliisussanngorsinnaapput.

Grønlandsbankenip atuisartut 2025-mi piginneqataassutinit iluanaarutaat marloriarluni Akileraartarnermut Aqutsisoqarfimmit nalunaarutigisimavai. Namminerli nalunaarsuinermi naqiterneqartumi, Akileraartarnermut Aqutsisoqarfiup marsip naanerani innuttaasunut nassiussaani, kukkuneq aamma pivoq.

Piginneqataassutinit iluanaarutit marloriarluni allassimappat isertitarineqartutut allassimasut piviusumik isertitarisimasunit amerlanerussapput, atuisullu piginneqataassutinit iluanaarutiminnit marloriarlutik akileraaruteqaratarsinnaapput.

Grønlandsbankenip Akileraartarnermullu Aqutsisoqarfiup nammineq nalunaarsukkanut naqiterneqartunut piginneqataassutinit iluanaarutit pillugit paasissutissat kukkusut allanngortissinnaanngilaat, akileraartartulli 2025-mi namminneq nalunaarsukkaminni piginneqqataassutinit iluanaarutitik namminneq iluarseqqullugit kajumissaarneqarput.

Akileraartarnermut Aqutsisoqarfiup nittartagaani www.aka.gl-imi imaluunniit www. sullissivik.gl-imi nammineq iluarsiisinnaavutit.

Atuisut namminneq nalunaarsukkaminni immersugassaq 33 (nalilinnik nunamit allameersunik iluanaarutit) eqqumaffigisariaqarpaat, tassani Akileraartarnermut Aqutsisoqarfiup naatsorsuutai piginneqataassutinit iluanaarutinut naatsorsuutinut Grønlandsbankenip sullitaminut 2025-p ingerlanerani nassiussimasaanut sanilliuttariaqarpaat.

Atuisut ilaat aningaaserivimmit pisortatigullu allagarsiatik toqqortanngilaat. Allat Akileraartarnermut Aqutsisoqarfimmit immersugassaq naqinneqarsimasoq tutsuigisarpaat.

-Nammineq nalunaarsuinerup naqiterneqartup imarisai isumaqatigigukkit allamik iliuuseqartariaqanngilatit, Akileraartarnermut Aqutsisoqarfik nammineq nalunaarsuinissamut ilitsersuutimini allappoq.

Taamaammat Grønlandsbankenip atuisui, piginneqataassutinit iluanaarutitik pillugit paasissutissanut eqqunngitsunut qisuarianngitsut, Akileraartarnermut Aqutsisoqarfiup 2025-mut naatsorsuutit aggustimi inaarutaasumik nassiussuuppagit akileraaruserineqartussanik akiliisinneqartariaqalersinnaapput.

Piginneqataassutinit iluanaarutit isertitatut B-tut, Kommuneqarfik Sermersuumi, Qeqqata Kommuniani aamma Kommune Qeqertalimmi 42 procentimik aamma Kommune Kujallermi Avannaata Kommunianilu 44 procentimik, akileraaruserneqartarput.

Ukiuni marlunni kukkussutigineqartoq

Aningaaserivimmik nakkutilliisoq BEC Financial Technologies piginneqataassutinit iluanaarutinik marloriaammik akileraartarnermut aqutsisoqarfimmut nalunaarutiginnittoqartoq Grønlandsbankenip paasissutissiissutigaa.

– Grønlandsbankenip paasissutissat eqqortut nalunaarsorsimavai, suleqatittali ilaanni teknikkikkut ajoquteqartoqarmat piginneqataassutinit iluanaarutit marloriarlutik nalunaarsorneqarsimapput, niuernermik ineriartortitsinermut pisortaq Ellen Lerch Høj Sermitsiamut oqarpoq.

Grønlandsbankenip piginneqataassutinit iluanaarutit marloriaammik nalunaarutigineqarnerannut teknikkikkut kukkunermut suna pissutaasoq suli naluaa, ukiulli ataatsip matuma siorna 2024-mut nammineq nalunaarsukkanut naqiterneqartunut atatillugu aamma taamaassimavoq. Aningaaseriviup kukkuneq atuisuminut 2025-mi apriili naaginnartoq ilisimatitsissutigaa.

Siorna kukkuneq aningaaserivimmit ilisimaneqareersoq qanoq ililluni ukioq manna taama pisoqaqqissinnaagami?

– Apeqqutitsialak, ajornartorsiutilli suuneranik paasiniaalluta sulissuteqarpugut. Attuumassuteqartut arlaqarput, sunalu pissutaanersoq paasiniarlugu suleqatigiissaagut.

Aningaaseriviup atuisuni kukkusoqarsimanera pillugu qanoq paasitippai?

- Atuisut eqqugaasut netbankikkut imaluunniit e-boksikkut nalunaarfigineqareerput, atuisullu ikittunnguit netbankimik e-boksimilluunniit atuinngitsut allagarsissapput.

Atuisut qassit pineqarpat?

- Atuisut ikitsuinnaat kisimik eqqugaapput, atuisullu pappiaqqanit nalilinnit iluanaaruteqarsimasut kisimik pineqarput. Atuisut taakku nammineq nalunaarsukkatik misissoqqullugit ilisimatinneqareerput.

Grønlandsbanken paasissutissanik eqqunngitsunik Akileraartarnermut Aqutsisoqarfimmut nassiussisoqarsimanera pillugu naqqiinissamut ikiuussinnaava?

– Naatsumik oqaatigalugu naamik. Atuisut ajornartorsiutaat ajuusaarutigaarput, Grønlandsbankenilli innuttaasut nammineq nalunaarsukkaminni akileraartarnerminnut paasissutissaataat naqqiiffigisinnaanngilai.

Aningaaserivik atuisut ilaannik kukkussummik namminneq aaqqiisimannginnamik 2025-mi marloriaammik akileraaruteqarsimasunik ilisimasaqarpa?

– Suliani allani akileraarutinik akiliivallaarsimanermut tunngatillugu pisimasutut, akileraartarnermut tunngasumik suliap Akileraartarnermut Aqutsisoqarfimmi suliarineqaqqissinnaaneranut periuseqarpoq. Atuisoq siorna ataasiinnaq periarfissamik tamatuminnga atuinissaminik pisariaqartitsisimasoq isumaqarpugut.

Aningaaseriviup 2027-mi ukiut pingajussaannik taama pisoqassanngitsoq qularnaveeqqutigisinnaavaa?

– Taama pisoqaqqinnginnissaa naatsorsuutigaarput, Ellen Lerch Høj oqarpoq. Bankivik kisitsisinik eqqortumik nalunaarsuivoq. Bankivik Kalaallit Nunaanni aningaaseriviit marluk aapparaat. Bankivik Euronext Securities Copenhagen (VP) aqqutigalugu Netcompany Banking Servicesilu (NBS) atortorissaarutitigut ikiuisoralugu pappialanik nalilinnut toqqorsiveqarpoq.

Bankivik Grønlandsbankenip kukkuneratut 2025-mi piginneqataassutinit iluanaarutinik marloriaammik Akileraartarnermut Aqutsisoqarfimmi nalunaaruteqarnermigut kukkussuteqarpa?

– Naamik, Bankivik 2025-mut piginneqataassutinit iluanaarutit pillugit malittarisassat malillugit nalunaarusiorpoq. Tassa imaappoq atuisut piginneqataassutinit iluanaarutitik eqqortumik nalunaarsorsimavaat, taamaammallu Bankiviup atuisui oqartussaasut eqqortumik paasissutissinneqarsimasut toqqissisimasinnaapput, niuernermut pisortaq Rúna Niclasardóttir Rasmussen Sermitsiamut oqarpoq.

Peqqutaasoq suli ilisimaneqanngitsoq

Akileraartarnermut Aqutsisoqarfiup Grønlandsbankenimit paasissutissat kukkusut akileraarutinut nalunaarusiamut naqiterneqartumut ilannguppai.

Grønlandsbankenip kukkussutaa Akileraartarnermut Aqutsisoqarfiup aaqqissinnaavaa?

– Grønlandsbankenip Akileraartarnermullu Aqutsisoqarfiup sullitat ilaasa isertitatik marloriaammik Akileraartarnermut Aqutsisoqarfimmut nalunaarutigisarsimanerannut teknikkikkut nassuiaat maannamut naluaat, kisianni nassuiaatissarsiniarluta kukkunerlu aaqqinniarlugu suleqatigiippugut. Taamaammat Grønlandsbanken, Akileraartarnermut Aqutsisoqarfik imaluunniit IT-mik pilersuisut ilaat nalunaarsugaatiminnik allannguisariaqarnersut ilisimanngilarput, Akileraartarnermut Aqutsisoqarfimmi pisortaq Morten W. Selvejer Sermitsiamut oqarpoq.

Akileraartarnermut Aqutsisoqarfiup atuisut eqqugaasut kukkuneq namminneq aaqqiteqqullugu kajumissaarpai. Tamannalu ilaatigut nittartakkami www.aka.gl-imi imaluunniit www.sullissivik.gl/minskat-imi isumagineqarsinnaavoq.

– Kisitsisit naqqissinnaanngikkutsigit kukkuneq naatsorsuinermi ilanngutissavarput. Aggustilli naanerani inaarutaasumik naatsorsuutit nassiunneqannginneranni suut tamaasa ilanngussimassallugit neriorsuisinnaanngilagut. Taamaammat atuisut pineqartut inaarutaasumik naatsorsuutertik pillugu immikkut eqqumaqqullugit, kukkussutinillu nassaarunik naatsorsuutit naqqinniarlugit akileraartarnermut aqutsisoqarfik piaartumik attaveqarfigisariaqaraat kajumissaarpagut, Morten W. Selvejer oqarpoq.

Eqqaamajuk: Piginneqataassutinit iluanaarutit eqqortut ilanngullugit nammineq nalunaarsukkat kingusinnerpaamik maajip aallaqqaataani Akileraartarnermut Aqutsisoqarfimmut nassiunneqassapput.