Eqqagassalerinermut pilersaarut pitsanngorsarneqarpoq

Jens Napãtôk’, Naleraq, Avannaata Kommuniani borgmesterip tullia siulleq Inatsisartunilu ilaasortaq, marsip naalernerani kommunalbestyrelsip ataatsimiinnerani siunnersuuteqarpoq, kommunimi eqqagassalerinermut pilersaarusiap piffissami 2023-mit 2035-mut atuuttup pitsaanerusumik naammassineqarnissaanut piaartumik suliniuteqartoqassasoq.

Avannaata Kommunia kommunini tallimaasuni kisiartaalluni eqqagassalerinermik ingerlatseqatigiiffimmut ESANI A/S-imut ilaanngilaq.

Siunnersuuteqartup oqaatigaa, siunnersuummi aallaavigineqartut tassaasut kommunimi illoqarfinni nunaqarfinnilu eqqakkanik isumaginninnermi ilungersunartut arlallit, ilaatigut maskiinat aserfallatsaalineqartannginnerat, maskiinanut taartissat amigaataanerat, eqqakkat naleqqutinngitsumik poortorneqartarnerat tamakkununngalu inissiiviit naleqqutinngitsut kiisalu assartornissaannut periarfissat amigartut. Pitsanngorsaanissamut periarfissat eqqagassalerinermut pilersaarummut ilanngunneqassasut kommunalbestyrelsip akuersissutigaa, aamma ukiup ingerlanerani eqqakkanik isumaginninnermik isumasioqatigiissitsisoqassasoq aalajangerneqarpoq.

Avannaata Kommuniani ilungersunartut

ESANI-p pisortaata Frank Rasmussenip siornatigut Sermitsiamut oqaatigaa, Avannaata Kommunia eqqakkanik isumannaatsumik ingerlatsinissaminut ilungersunartunik unammilligassaqartorujussuusoq, tassami kommuni eqqagassalerinermut ingerlatseqatigiiffimmut ilanngimmat. Taamaattumik kommunip ataatsimoortumik suleqatigiiffimmut ilannguteqqinnissaa kissaatigaa. Avannaata Kommuniali ESANI-mut, illoqarfinni nunaqarfinnilu eqqakkat pisariaqartitsineq naapertorlugu umiarsuaq assartuut atorlugu aaneqartarnissaannik isumaqatigiissuteqarsimalluni.

Avannaata Kommuniani eqqagassalerinermut pilersaarummi ilaatigut eqqagassat assartorneqartarnerat, atortorissaarutinik pilersitsinissat, atortunik nutarterinissaq maskiinanillu atortussanik pisinissaq sammineqarput. Jens Napãtûp erseqqissarpaa, eqqakkanik isumaginninnermi ingerlatsinermut ajornartorsiutit maanna atuuttut piaartumik iliuuseqarfigineqarnissaat pisariaqartinneqartoq.

Aaqqiissutissatut periarfissat

Avannaata Kommunia eqqakkanik suliaqarnermini maskiinat atortullu allat taartissaasa piareersimatinneqarnissaannut akisussaasuusariaqartoq, Jens Napãtôk’ isumaqarpoq.

- Eqqakkat poortorneqartarnerat unitsikkallarneqartuaannarpoq, kommunilu eqqakkanik pitsaanerusumik isumaginninnissamut aaqqiissutissarsiussaaq. Aaqqiissutissanik aamma nassaarniartoqartariaqarpoq, soorlu inoqarfinni annerusuni minnerusunilu toqqorsivissanik piaarnerpaamik pilersitsisoqartariaqarluni.

- Kommunitsinni isorartoqisumi assartuinissamut pitsaanerusumik periarfissaqalertariaqarpoq, Ilulissanilu akuerineqarsimasumik ikuallaavimmik pilersitsisoqartariaqarluni. Kiisalu illoqarfinni Qaanaami, Upernavimmi Uummannamilu sumiiffimmut naleqquttunik ikuallaaviliortoqarnissaa anguniarneqartariaqarput, oqarpoq.

Kommunip eqqagassalerinermut pilersaarutaanut atatillugu, pissutsit taaneqartut arlallit sulissutigineqalereersut Avannaata Kommunia aamma nalunaarpoq.

Atugassarititaasunut malinnaalluni

Eqqagassalerinermut pilersaarutip aningaasalersorneqarneranut missingersuutit atuutilersinneqarneranni misilittakkat aallaavigalugit nutarterneqartariaqartut, Avannaata Kommunia naliliivoq. Aammali erseqqissarneqarluni eqqagassalerineq pillugu pilersaarummi najoqqutassiat pingaarnerit naleqqunnersut nunalu tamakkerlugu eqqagassalerinermut sinaakkutissat iluanniinnersut nalilersorneqartassalluni.

- Pilersaarummi tunngavigineqarluni inoqarfinni mikinerusuni eqqakkat puussiarsuarnut poortoriarlugit aaneqarnissaasa tungaanut toqqortarineqartarnissaat, inoqarfinnili annerni eqqakkat ikuallaavimmut akuerineqartumut nassiunneqannginneranni naqittaanneqarlutik poortorneqartassallutik. Atuutilersinnissaannut pisariaqartinneqarlutik attaveqaasersuutinik piorsaanissaq, tamatumunnga ilanngullugit sulinermi atugassarititaasut pitsaanerusut inoqarfiillu ilaanni aqqusernit talittarfiillu pitsanngorsarneqarnissaat.

- Kommunimi ingerlatsivik sumiiffinni ajornartorsiuteqarnerpaani suliniuteqarsimavoq, aaqqiissutissallu piviusut pillugit najugaqarfiit mikinerit qanimut suleqatigineqarlutik. Misilittakkat takutippaat najukkami innuttaasut peqataanerat angusaqarluarnissamut pingaaruteqarluinnartoq, soorlu Saqqamit saviminernik igitassanik assartuineq iluatsilluarsimasoq, Avannaata Kommunia nalunaarpoq.

Kommuni ingerlatsinermik ataqatigiissaarisumik atorfinitsitsisimavoq, taassumalu sulisut eqqakkanik ulorianartunik qanoq passussisarnissaannik aamma maskiinat biilillu qanoq atornissaannik aserfallatsaalineqarnissaannillu ilinniartittarlugit.

Upernavimmi eqqakkanik tigooraaviliornissaq

Avannaata Kommunia Upernavimmi qeqertami Saffiorfimmi eqqakkanik tigooraavimmik nutaamik pilersitsinissamik pilersaaruteqarpoq. Tamatumani suliarineqassallutik Saffiorfimmut sapusiornikkut aqqusinniornissaq aamma umiarsuarnut talittarfiliornissaq.

Eqqakkat siunissami najukkami ikuallanneqartarunnaarnissaat, taarsiulluguli poortorneqariarlutik allami ikuallatassanngorlugit assartorneqartarnissaat siunertaavoq. Aammattaaq Upernavimmi maanna eqqaavissuup peerneqarnissaa kissaatigineqarpoq. Siunnersuut maajip 22-ata tungaanut tamanut tusarniaassutigineqarpoq.

Canadami ikuallaaviit

Kommunalbestyrelsimi teknikimut ataatsimiititaliaq borgmesterillu allaffeqarfianeersut Canadami Issittormiut Unammiuaarneranni peqataapput, tassungalu atatillugu angalasut Canadami ikuallaaviit atorneqartut takuniarpaat.

Tamatumani paasineqarluni ikuallaaviit Eco Waste-meersut, tassa suliffeqarfimmit Canadameersumit ilaatigut eqqakkanik piujuartitsisumik aqutsinermik pingaartitsisumeersut Canadami Alaskamilu nunaqarfinni illoqarfinnilu minnerni atorluarneqalereersimasut.

Kommunalbestyrelsi ilisimatinneqarpoq ikuallaaviit taakkua inoqarfinnut mikinerusunut avinngarusimanerusuniittunullu tulluartuusut, aamma pisariunngitsumik atorneqarsinnaasut.

Ikuallaaviit taamaattut Nunatsinni atorneqarsinnaanersut misissorneqartariaqartut, angalaqatigiit isumaqatigiissutigaat. Taamaattumik Teknikimut ataatsimiititaliamit innersuussutigineqarluni eqqakkanik aqutsineq pillugu oqaloqatigiilluni ataatsimiititsisoqarnissaa, tamatumani siunertaralugu Eco Waste-meersumik qaaqqusisoqassasoq ikuallaaviit pillugit paasissutissiiartortumik.

Nunatsinni eqqakkanik isumaginninneq nuna tamakkerlugu eqqakkanik isumaginninnermut pilersaarummit aqunneqarpoq, tassanilu ilaatigut piumasarineqarluni EU-p ikuallaasoqartarnissaanut peqqussutaa naapertorlugu eqqakkanik ikuallaaviit mingutsitsinnginnissamut piumasaqaatinik naammassinnittassasut. Avatangiisinut peqqissutsimut ajoqutaasunik mingutsitsinerup annikinnerpaaffissaanut appartinnissaa siunertaavoq.

Taamaattumik nuna tamakkerlugu ataatsimoorluni eqqagassalerinermik aaqqiissutissamik suliaqartoqarpoq, tassani eqqakkat ikuallanneqarsinnaasut annertusiartuinnartumik katersorneqartarput ikuallaavinnilu akuerisaasuni ikuallaanneqartarlutik, ilaatigut Sisimiuni.

Frank Rasmussen isumaqarpoq ikuallaaviit pisoqqat nutaajunerusullu nutarternissaannut akuersissutinik pissarsiniarneq ajornakusoorsinnaassasoq, ikuallaavinnut piumasaqaatit sukannernerat pissutigalugu.