Amerikami tusagassiortoq nutaarsiassaqartitsivimmi The Epoch Times-imi sulisartoq kalaallit angajoqqaat meeqqaminnik Danmarkimi angerlarsimaffiup avataannut inissiisimasut oqaloqatigiumallugit Danmarkiliarluni nalunaarpoq.
Tamanna peqatigiiffimmi MAPI-mi siulittaasuusimasup Laila Berthelsenip danskit naalakkersuisuinut kalaallillu naalakkersuisuinut mianersoqqussutigisimavaa.
Tusagassiorneq nalinginnaanngitsoq
Taassumami The Epoch Times-imi tusagassiuutitut talerperlersuunerarlugu Trumpillu aqutsisuinut MAGA-mullu qanimut attuumassuteqartutut ilisimaneqarmat kalaallit ilaqutariit politikkimut akuliunneqarumaartut ernummatigaa.
- Tamanna ilaqutariit atugarliortut atugaat atornerlullugit Amerikamiut Kalaallit Nunaanni soqutigisaannik siuarsaaniarluni politikkikkut siunertaqarluni suliniuteqarnerummat tusagassiuutitigut allaaserinnittarnerinnaanngitsoq isumaqavippunga, Laila Bertelsen oqarpoq assingusunillu misiliisoqareersimasoq innersuussutigalugu.
– Ilaqutariit kalaallit Danmarkimiittut siusinnerusukkut USA-mut angalanissamut politikkikkut sammisassaqartitsinermilu peqataanissamut neqeroorfigineqartarsimasut nalunngilara. Taamanikkut peqataanissaat pinngitsoortippara, maannakkulli aarlerinartoqarneruvoq, tassami ilaqutariit arlallit ilaatigut VISO-mik misilittagaqarnertik pissutigalugu danskit oqartussaasuinik tatiginnikkunnaarput, taakkulu suliatigut kulturikkullu tunngavissaqarsorineqaratik toqqaannartumik naapertuilluanngitsumik pineqartartutut isumaqarput. Taamaammat innuttaasut sanngiinnerit nunani allani politikkikkut oqaluuserineqartussanut atorneqarsinnaanerat aarlerinartorujussuuvoq, Laila Bertelsen oqarpoq.
Danmarki mamarlerneqartoq
Peqatigiiffik Sila 360, Danmarkimi innuttaasunut kalaallinut inatsisitigut ikiorsiisinnaasoq, Amerikami tusagassiorfinnit arlalinnit MAGA-mut attuumassuteqartunit angajoqqaanut qitornaminnik angerlarsimaffiup avataanut inisseeqquneqarsimasunut attaveqarumasunit aamma attaveqarfigineqarpoq.
– Amerikamiut tusagassiivii qularutigiuaannarsimavagut, angajoqqaallu kikkut oqaloqatigissanerlugit mianersuutigeqqullugit qinnuigaagut. Meeqqanik paarsinermut tunngatillugu unammillernartoqaraluartoq pissutsillu iluarsineqartariaqaraluartut tamanna Danmarkip Kalaallit Nunaatalu akornanni eqqortumik ingerlatinneqartariaqarpoq, angajoqqaallu kalaallit Danmarkimut mamarliinernut atorneqartariaqanngillat, peqatigiiffimmi pisortaq Tina Naamansen oqarpoq.
Tusagassiuutit tunuliaqutai misissortarai
Angajoqqaat ilaat Amerikamiut tusagassiorfiinit attaveqarfigineqartut tassaavoq Keira Alexandra Kronvold, siorna novembarimi panini inunngormat pinngitsaalineqarluni arsaarneqartoq. Taamanimiilli panimmi utertinnissaa ilungersuutigisimavaa, suliaalu ilaatigut Sermitsiami, KNR-imi, DR-imi, Informationimi aamma Kristeligt Dagbladimi, nunanilu allani tusagassiorfinni arlalinni soorlu BBC-mi, The Guardianimi, Der Spiegel-imi, The Times-imi National Indigenous Times-imilu allaaserineqarsimavoq.
– Tusagassiuutiniit saaffigineqartarninni tamani tusagassiorfiit tusagassiortullu tunuliaqutaat misissortarsimavakka. MAGA-mullu imaluunniit Trumpip aqutsisuinut attuumassuteqartoq takusinnaagaangakku peqataarusunnanga oqarfigisarpakka. Paniga suli utertinniarlugu akiuuttuarpunga, USA-mulli attuumassuteqanngilaq. Annilaarnatulerinangalu allat stressilersinnianngilakka. Tamannattaaq suliannut Kalaallit Nunaannullu iluaqutaanavianngilaq, Keira Alexandra Kronvold oqarpoq.
USA-mi tusagassiuutit sunniiniarnerillu
Stephen Joyce Aarhus Universitetimi lektoriuvoq, ilaatigut Amerikamiut tusagassiivii politikkikkullu sunniiniarnerit pillugit ilisimasaqarluarluni. „The Epoch Times Newsmaxitut One America Newsitullu isigisarpaa, taakkualu ukiuni kingullerni talerperliuniartut tusagassiuutaattut nuannarineqartutut Trumpillu aqutsisuinut MAGA-mullu attuumassuteqartutut isigineqarsimapput.
– The Epoch Times, Newsmax aamma One American News 2020-mi qinersinerup kingorna Trumpillu qinersinermi peqquserluttoqarneranik pasineqarnerata kingorna qaffapiloorput. Fox News, Trumpip tusagassiuutitut nuannarinerpaasimagaluagaa, qinersinermi peqquserluttoqarneranik isumaliutersuummik tapersersuiumanngilaq, kisianni The Epoch Times, One American News aamma Newsmax taamaaliorusupput, taamaalillutillu Trump immikkut ittumik attaveqarfigisinnaalerlugulu atuartartunik malinnittartunillu nutaanik amerlasuunik pissarsipput..
Kinami Falun Gongimit USA-mi talerperlernut
The Epoch Times 2000-imi pilersinneqarsimasoq aallaqqaammut Kinamiut Falun Gongimik upperisarsioqatigiivinut, Kinami kommunistit aqutsinerannik isornartorsiuingaartunut, attuumassuteqarpoq.
- The Epoch Timesili Trumpip præsidentinngornerata siulliup nalaani Kinamiut Amerikamiullu konservativit saaffiginnissutigisaannit talerperlernut amerlanerusunut saaffiginnittalerpoq, ukiullu ingerlaneranni taamaaliortuarsimalluni. Aviisi ullumikkut nunani 30-nit amerlanerusuni saqqummertarlunilu millionilinnit pisartagaqarnikkut atuarneqartarpoq.
The Epoch Times, Newsmax aamma One American News Stephen Joyce naapertorlugu nutaarsiassanik isumaqatigiissutigisatik malillugit silarsuarmut isiginnittaatsiminnut naapertuuttumik toqqaasarnertik pillugu ilisimaneqarput.
– Nunarsuarmik isiginnittaaseq, assersuutigalugu USA-p Kinamut imminut illersorniarluni Kalaallit Nunaannik tiguaaniarnera, Stephen Joyce oqarpoq taassumalu nangilluni tusagassiorfiit taakkua oqaluttuarisaanermi annertunerusumi atorneqarsinnaaniassammata kalaallit angajoqqaavisa meeqqanik Danmarkimi najugaqartitsinerat pillugu oqaluttuat akerleriissutaasumik sammisassanngortinniarsarissagaat ilimanarluinnartoq oqaatigaa.
– Tusagassiuutit taakkua meeqqanut angerlarsimaffiup avataanut inissitsiterneqarsimasut angajoqqaanik oqaloqatiginninniarsarinerat ernumanartorujussuuvoq, tassami tamanna USA-p Kalaallit Nunaannik suli tigusiniarnerannut takussutissaavoq, Stephen Joyce oqarpoq.
Sermitsiap The Epoch Times-imi tusagassiortoq oqaloqatiginiaraluarpaa, tamannali suli iluatsinngilaq.
Abonnementer
Sermitsiaq.gl – Nittartagaq
- Sermitsiaq.gl-imi allaaserisat tamakkiisumik atuarsinnaalissavatit
- Qaammammut kr. 59.00
- Ukiumut kr. 650.00
Sermitsiaq - E-aviisi
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
AG - Atuagagdliutit E-aviisi
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-mi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
Sermitsiaq.AG+
- Aviisi AG - Atuagagdliutit e-aviisitut tallimanngornerit tamaasa saqqummersartoq atuarsinnaalissavat
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik iserfigisinnaalissavatit
- Arnanut e-magasinatut atuarsinnaalissavat
- Nutserisoq.gl atorsinnaanngussavat
- Soqutiginnikkuit abonnement@sermitsiaq.gl-imut allagaqarsinnaavutit
Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.
