Nunap assingani nutaami Namminersorlutik Oqartussat Kalaallit Nunaanni qaqqat sisoorneri sivinganerillu aarlerinartut pillugit paasissutissanik innuttaasunut ingerlatitseqqiissapput.
Nunap assinga paasissutissanik nutaanik ilaartortuarneqartussaavoq, maannamullu Upernavik Kujalliup Ilulissallu akornanni, Nuup Kangerluani Tasiilamilu sivinganerit aarlerinartut 214-it qaqqallu sisoorsimasut 42-t nalunaarsorneqarsimapput.
Naalakkersuisut tusagassiuutinut nalunaarummi taama allapput.
Naalakkersuisup Múte B. Egedep (IA) paasissutissat innuttaasunut ingerlateqqissinnaagamigit nuannaarutigaa:
- Innuttaasut oqartussallu sumiiffinni ajornartorsiornartuni ingerlatassatik pillugit aalajangiinissaannut nunap assingi nutaat iluaqutaassapput. Pinngortitaq aqussinnaanngilarput aammalu nunatta atorneqarneranut atatillugu navianartut tamaasa peersinnaanngilagut, Múte B. Egede oqarpoq nangillunilu:
- Kisianni aarlerinaateqartut ilisimagutsigit, pisariaqanngitsumik immitsinnut navianartorsiortinnginnissamik imaluunniit allanut navianartorsiortitsinnginnissamik ilisimasat taakkua atorsinnaavagut.
Nunap assinga uani takuneqarsinnaavoq, pinngortitamilu allannguuteqartoqarneranik imaluunniit qaqqap sivingarnani aalariartoqarneranik maluginiagaqarsimaguit uani nalunaarutigisinnaavat.
