Siumut Folketingimut qinersinissamut atatillugu sisamanngornermi tusagassiortunik katersortitsivoq.
Siulittaasoq Aleqa Hammond arnat tallimat Siumut sinnerlugu qinigassanngortissimammata nuannaarutigalugu oqaaseqarluni tusagassiortunik katersortitsineq aallartippaa. Tamanna ajunngitsuusoq Siumumimi angutit pingaarnertut qinigassanngortittaraluarmata.
Qinigassanngortittoq Ane Lone Bagger, Kangiani Qiterlermi akerleriinneq pissutigalugu Dubaimiit uternaveeqqasoq, internettikkut attaveqaatitigut peqataavoq.
- Siumup Folketingimut qinigassanngortitai nukittuut saqqummiussinnaagakkit tulluusimaarutigeqaara, Aleqa Hammond oqarpoq.
1951-imi illersornissamut isumaqatigiissut isumaqatigiinniutigeqqinniaraat
Siumup qineqqusaarutai tusagassiortunik katersortitsinermi agguaanneqarput, tassanilu Siumut Danmarkimi naalakkersuisunik tapersersuinissamut immikkut piumasaqartoq allassimavoq.
USA-mut illersornissamut isumaqatigiissutip 1951-imeersup isumaqatigiinniutigeqqinneqarnissaa piumasarineqassasoq Siumup qineqqusaarutigaa:
- Illersornissamut isumaqatigiissut nunatta nalitut pisinnaatitaaffeqarluni nunatsinnut inuinulluiluaqutaasumik anigaastigullu malitseqatumik isumaqatigiissuteqarnissaq Siumup piumasarissavaa, partiip qineqqusaarutaani allaqqavoq.
USA-p præsidentiata Donald Trumpip Kalaallit Nunaata USA-mit tiguarneqarnissaanik oqariartuuteqarluni tatisinerata kingunerisaanik, Kalaallit Nunaat/Danmark aamma USA maanna isumaqatigiinniarput. Isumaqatiginninniarnernut Kalaallit Nunaanni isumannaallisaanermut atatillugu USA-p ernumassutai aaqqinniarneqarnerat ilaatigut siunertaavoq.
Nunanut allanut tunngasutigut iliuuseqarnissamut periarfissaqarnerulerneq
Siumup Kalaallit Nunaata nunanut allanut tunngasutigut nammineerluni iliuuseqarnissamut periarfissaasa ineriartortinneqarnissaata sulissutigissagaa, qineqqusaarummi aamma allassimavoq.
Kalaallit Nunaata nunanut allanut politikkimut tunngatillugu ukiuni kingullerni sulinera danskit naalakkersuisuinit killilersorneqartoq Siumut naapertorlugu, tamannalu partiip akerleraa.
Najukkami upalungaarsimasuutitat hjemmeværnit aaqqissuussaasumik nunatsinni pilersinneqarnissaat nunatta killeqarfinik nakkutillisussat Kalaallit Rangers Siumup Folketingimi sulissutigissavaa.
Danskit naalakkersuisunngortussat kalaallit naligalugit pissagaat Siumumit pingaartinneqartoq Aleqa Hammondip tusagassiortunik katersortitsinermi aamma oqaatigaa.
