2026-miit Nunatsinni Danmarkimilu innuttaasut inatsisitigut ataataqanngitsut akeqanngitsumik inatsisitigut ilitsersorneqarsinnaalissapput, ataatassarsiuussinissamut taperserneqarlutik, katsorsarneqarnissamik neqeroorfigineqarlutik kiisalu nuna tamakkerlugu sumiiffinni paasissutissiilluni ilitsersuillunilu ataatsimiinnerni peqataanissaminnut periarfissaqalissallutik.
Naalakkersuisut tusagassiutitigut nalunaarummi taama allapput.
Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfiup, Kalaallit Nunaanni Naalagaaffiup Sinniisoqarfiata aamma Danmarkimi Isumaginninnermut Ineqarnermullu Ministereqarfiup suleqatigiinnerisigut ikiorsiisoqartussanngorpoq.
Oqartussat suliniut nutaaq aallartippaat, taamaalilluni Kalaallit Nunaanni Danmarkimilu inatsisitigut ataataqanngitsut ikiorserneqartalissapput.
Ikiorsiissut toqqissisimanerulersitsissallunilu inatsisitigut iliarsunnut amerlanerusunut eqqissinermik siunissamullu sammisumik nassaarnissaminnut periarfissiisoq Naalakkersuisoq Nivi Olsen (D) neriuppoq:
- Inatsisitigut ataataqanngitsut amerlavallaarujussuartut, kinaassutsimut sumullu attuumassuteqarnermut apeqqut kisimi pigalugu, aqqutaat takillunilu qajannarsimavoq..
- Kinaluunniit tapersersorteqarani taamatut ilungersuuteqarluni aqqusaagaqannginniassammat, maanna pisortani oqartussat aqqutigalugit ikiuinermik neqeroorsinnaalernerput taamaammat isumaqartorujussuuvoq, Nivi Olsen oqarpoq.
Piffissami aggersumi illoqarfinni aalajangersimasuni siunnersuinermik paasissutissiinermillu ataatsimiititsinerit ingerlanneqassapput – Naalakkersuisut nittartagaanni paasisaqarnerugit.
