Politiit Nuummi Future Greenlandertoqarnerani, nunanillu allanit tikeraartoqarnerani ulluni kingullerni malunnartumik takussaaqisut, akerliussutsimik takutitsinermi ippassaq ualikkut pisumi aamma takussaapput.
Amerikamiut Nuummi sinniisoqarfittaavat akerleralugu inuit hunnorujulikkaat peqataapput.
- Inuiaqatigiinaasit ajunngitsumik takutitsipput. Arlaannik politiinit akuleruttariaqarsimanngilagut. Eqqissisimasumik takutitsilluarnermillu inerneqarpoq, politiit pigaartuisa pisortaat Poul Kreutzmann Sermitsiamut oqarpoq.
Angut eqqaanneqarsorisoq
Nuummi akerliussutsimik takutitsisoqaleruttortoq illoqarfiup immikkoortuani politiit allamik ulapputeqarput. Iggiaatami nalaani biilit unitsinneqarsimasut politiinit arlariinnit misissuiffigineqartut Sermitsiamit tusagassiortumit takuneqarpoq. Politiit suliaqarsimanertik uppernarsarpaat, misissuisoqarnerali peqqutigalugu oqaasissaat killeqarput.
- Oqaannarsinnaavunga Nuummi, Nuussuarmi Qinngorpumilu politiit suliaqarnikuupput. Uppernarsaannarsinnaavara politiit arlalinnik suliaqarnikuusut, Poul Kreutzmann oqarpoq nangillunilu:
- Allamik oqaaseqarsinnaanngilanga. Suliassamik ingerlasoqarpoq, aamma ilumoorpoq politiit tappavani suliaqarnikuusut.
Politiit suliamik allamik orniguffigisariaqakkaminnik, qulaanili taaneqartunut attuumassuteqanngitsunik unnuaq nalunaarfigineqarput. Nuup ungasinngisaani Kuanninnguani angut tupertoq eqqaanneqarsoraluni politiinut sianerpoq.
- Tusaasimagamiuk marloriarluni aallaarpallak, isumaqarluni tungiminut aallaasoqartoq. Taanna tunngavigalugu soorunami alakkaatitsinikuuvugut misissuititsinikuullutalu. Kisianni inunnik allanarsinnaasunilluunniit takusaqanngilagut, Poul Kreutzmann oqarpoq.
