Danmarkip nunallu allat arlallit, ilaatigut USA-p, Issittoq pillugu ataatsimut nalunaarut „nunarsuup immikkoortuanik toqqissisimanartumik pigissaarfiusumillu ineriartortitsinissaq“ siunertaralugu isumaqatigiissutigaat.
Nalunaarusiaq nunanit arfineq-pingasunit tallimanngormat Helsingborgimi Sverigemiittumi Nato-p nunanut allanut ministeriisa ataatsimiinneranni akuersissutigisimavaat.
Aamma Sverige, Canada, Savalimmiut, Finland, Island Norgelu nalunaarummut ilanngupput, taannalu Sverigemi naalakkersuisut nittartagaannut ikkunneqarpoq.
Nunat taakkua nunap immikkoortuani „eqqissineq nakussatsikkusullugulu“ oqarput. „Ruslandip sakkutooqarnerulernera Kinallu soqutiginninnerulernera" ilaatigut pissutigalugit taamaaliorput.
- Issittumi avannaarsuanilu sakkutooqarnerput, nakkutilliinerput ataatsimoortumillu sungiusartarnerput nukittorsarparput. Ataqatigiissaakkamik aaqqissuussamillu taamaaliorpugut, nalunaarusiami allassimavoq.
Isumannaallisaanikkut unammillernartut pillugit oqaloqatigiinneq annertusarneqartariaqartoq Ilaatigut isumaqatigissutigineqarpoq.
Nunat „pingaarutilimmik ataatsimiissimasut“ DR-ip TV 2-llu nutaarsiassaqartitsivii naapertorlugit nunanut allanut ministeriugallartoq Lars Løkke Rasmussen (M) oqarpoq.
- Issittumi isumannaatsuunissaq tamatta immikkut akisussaaffigalugu ersersipparput. Tamanna sivisuumik sulissutigisimavarput, taanna oqarpoq.
Nunat tallimanngormat ataatsimiittut suleqatigiissitamiit USA-p, Danmarkip Kalaallit Nunaatalu pilersitaannit allaanerusut erseqqissarlugulu Amerikamiut præsidentiata Donald Trumpip Kalaallit Nunaat pillugu oqaaseqaatissarpassuisa kingorna pilersinneqartut oqaatigaa.
Issittoq, ingammik Kalaallit Nunaat, piffissami kingullermi soqutigineqaleraluttuinnarpoq.
Trumpip Kalaallit Nunaat aqussinnaajumallugu sakkuaatissaqarsinnaalluni arlaleriarluni oqaatigaa.
Amerikamiulli pissaanermik atuinianngitsut USA-p Danmarkimi aallartitaa Ken Howery sapaatip akunnerani matumani oqarpoq.
- Præsidentip pissaanermik atuineq eqqartorunnaarpaa. Kalaallit Nunaata siunissaa kalaallit namminneq aalajangertussaavaat, taanna KNR naapertorlugu Amerikamiut Nuummi konsulateqarfiata nutaap sisamanngornermi unnukkut ammarneqarnerani oqarpoq.
Løkkep ataatsimut nalunaaruteqarnissaq neriuutigalugu NATO-p tallimanngorpat ataatsimiinnissaa sioqqullugu oqarpoq.
- Ataatsimiinnissaq qilanaareqaara. Nunat issittumiittut Nato-mi ilaasortaasut tamarmik Kalaallit Nunaanni avataatungaanilu isumannaallisaanermut assigiimmik isiginnittaaseqartut takutinniarlugu ataatsimiinnermi nalunaarummik saqqummiussisinnaassasugut neriuppunga, nunanut allanut ministeriugallartoq oqarpoq.
/ritzau/
