"Nunarput Utoqqarsuanngoravit", "Nuna Asiilasooq" imaluunniit inuiattut erinarsuut nutaarluinnaq? Apeqqutit taakkua Inatsisartunut ilaasortat pingasunngornermi oqallisigaat.
Aqqalu Jeremiassen (A), apeqquteqaat aallaavigalugu oqallinnissamik siunnersuuteqartuuvoq. Taassuma isumaa naapertorlugu inuiattut erinarsuut pisortatigoortoq ataaseq naammappoq.
Sumiorpaluutit
Sammisaq pillugu pingasunngornermi oqallinnermi oqaasissaaleqisoqanngilaq. Aki-Matilda Høegh-Dam (N), inuiattut erinarsuummi sumiorpaluutit ilaanissaat aamma periarfissaasinnaasoq isumaqarpoq. Tamannalumi oqallisissaqqittoq, siunnersuuteqartup parteeqataata, Bentiaraq Ottosenip (A), oqaatigaa. Taamaakkaluartorli inuiattut erinarsuummik nammineq aalajangiisinnaaguni tulluartitaqarpoq.
- Nuna asiilasooq uanga tulluartittorujussuuara, Bentiaraq Ottosen oqarpoq.
Inuiattulli erinarsuutip aappaa tassa "Nunarput Utoqqarsuanngoravit", timersortuni ataatsimoorfiulluartarnera aamma erseqqissaatigaa.
"Ajjajjaa ajjajjaa"
Mette Arqe Hammekkenip (N), inuiattut erinarsuut erinarsuutaannaanani aamma niperujoornermik ilaqarsinnaasoq piukkuppaa. Taanna ataatsimiittarfimmi niperujoorluni aallartippoq. Tamanna Inatsisartut ataatsimiinneranni aqutsisup, Per Berthelsenip (D), tupaallaatigaa.
- Sunaaffa taama erinagitsigaatit, taanna oqarpoq.
Demokraatit oqaaseqartuata, Pipaluk Olsenip, oqarnera naapertorlugu taakkua isummat tamaasa ammatippaat. Sumiorpaluutaappata niperujoorutaappataluunniit.
Inuusunnersaat: Aatsaat tusarpara
Inatsisartunut ilaasortat inuusunnersaat, Nivi Rosing (IA), partiini sinnerlugu oqaaseqartuuvoq. Taassumali Bentiaraq Ottosenip piukkussaa siunnersuummik suliaqarnermini aatsaat tusarpaa.
- Unneqqareqqissaassaguma una siunnersuut qimerlooqqaarakku “Nuna asiilasooq” aatsaat tusarpara. “Nunarput utoqqarsuanngoravit” inuiattut erinarsuutitut kisimi atorneqartartoq uanga perornikuugama, Nivi Rosing oqarpoq.
Taassuma parteeqataata Mimi Karlsenip (IA), sammisaq inatsisartut kisimik oqaluuserissanngikkaat isumaqarpoq.
- Inatsisartut kisimik pinnatik inuiaat isummersornissaat pingaaruteqaqaaq. Nutaamik unammisitsisoqarsinnaanera periarfissatut isigaara, taanna oqarpoq.
Siumut: Tunngaviusumik inatsisissamut ilanngulli
Siumup oqaaseqartuata, Erik Jensenip, sammisaq oqallisigineqarnerussasoq kissaatigaa. Taamaattumik tunngaviusumik inatsisissatut missingiutip suliarineqarneranut, inuiattut qanoq erinarsuuteqartoqassanersoq ilanngullugu suliarineqassasoq, kissaatigaa.
- Tunngaviusumik inatsimmik suliaqarnermut atatillugu una qulequtaq ilanngullugu suliarineqarli. Taannalu innuttaasut akuutillugit oqallisigineqarli, taanna oqarpoq.
Suliaq ingerlaqqissava?
Apeqquteqaat aallaavigalugu oqallisissiaq qanorpiaq kinguneqassanersoq suli nalunarpoq. Naalakkersuisut paasissutissaataat naapertorlugit inuiattut erinarsuuteqarnermut tunngasumik 1979-imit maannamut Inatsisartuni oqallittarnerit una oqallinneq qulingiluassaraat. Oqallinnerillu siulii tigussaasumik kinguneqarneq ajorput. Maannalu tassa suliaq Naalakkersuisunit pimoorunneqarnerulluni suliarineqassasoq partiit arlallit kissaatigaat.
