Sermitsiap angut amerikaminngaanneersuunerartoq Nuummi atsiornernik katerserusuttoq sapaatit akunneranni matumani allaaseraa. Angutip taassuma naapitani Kalaallit Nunaata USA-mut ilanngunneqarnissaannik akuersaartut atsiortikkusuppai. Atsiortut 200.000 dollarinik tunineqarnissaminnik neqeroorfigineqartut, Sermitsiap tusarfii oqaluttuarput.
Taama iliorneq Nunanut Allanut Naalakkersuisup akuerinngilluinnarpaa.
- Uteqqinneqartariaqanngikkaluarpoq Kalaallit Nunaat aamma inuiaat kalaallit qaqugumulluunniit pisiarineqarsinnaanngillat.
- Inummit ataasiinnarmeeraluarpalluunniit pissusilersuut imaluunniit inuianniit pigaluarpat akuersaarneqarsinnaanngillat pissusilersuutit taamaattut. Inuiannik akiliiginnarluni nunamik piginnittunngorsinnaasorineq, Múte B. Egede Sermitsiamut oqarpoq.
Naalakkersuisoq: Siunissatsinnut tunngavoq
Inuit attaveqaataanni pisoq ilaatigut quianartutut isigineqartoq takussaavoq. Ajornanngippallu tamanna pinaveersaartariaqartoq Naalakkersuisoq isumaqarpoq.
- Quiassuaatinngortinnaveersaartinneqartariaqarpoq. Siunissatsinnut nunatsinnullu tunngassuteqartuummat.
Sermitsiap naalakkersuisoq suliaq pillugu iliuuseqarsimanersoq iliuuseqalersaarnersorluunniit aperaa. Taassumali politiit suliaq suliarimmassuk taanna innersuussutigaa.
- Politiit suliaq suliaraat tamannalu Naalakkersuisut toqqissisimanartutut isigaat, Múte B. Egede oqarpoq.
Assigusumik pisoqaqqissinnaasoq
Pisumut assigusumik pisoqaqqissinnaanera Nunanut Allanut Naalakkersuisup mattutinngilaa. Taamaattumik inuttaasunut kaammattuuteqarpoq:
- Taamatut pisoqariataaqqissinnaaneranut eqqummaarissuugut, kalaallillu kaammattorusuppakka taamatut iliuuseqartut tamaasa oqartussanut susassaqartunut ingerlaannartumik anngunneqartarnissaat taanna kaammattuutigalugu.
- Taamatut pissusilersortut tamaasa akuersaanngilluinnarnermik takutitsivigisariaqarpagut, Múte B. Egede oqarpoq.
Kalaallit Nunaanni Politiit suliaq pillugu suliaqarlutik Sermitsiamut sisamanngornermi uppernarsarpaat.
