Ittoqqortoormiini nakorsassaaleqineq ajornartorsiutaasoq

Ittoqqortoormiini 328-nik inoqartumi nakorsaqanngilaq, tamannalu innuttaasunut toqqissisimannginnermik pilersitsiinnarani aammali akuersaarneqarsinnaanngitsoq, Inatsisartunut ilaasortaq, Mette Arqe-Hammeken, Naleraq, oqarpoq. Taamaattumik ataavartumik ataatsimik nakorsaqalissappat, tamanna qanoq periarfissaqarnersoq qanorlu akeqassanersoq pillugu paragraf 37 naapertorlugu Naalakkersuisunut taanna apeqquteqarpoq.

Illoqarfiit ilaanni, aamma Ittoqqortoormiini, aalajangersimasumik nakorsamik atorfinitsitsiniarneq maannakkorpiaq ajornakusoortoq, Peqqissutsimut inunnullu Innarluutilinnut Naalakkersuisoq, Anna Wangenheim, Demokraatit, akissuteqarluni ilaatigut allappoq.

Peqqissaasut marluk

Ittoqqortoormiit Kalaallit Nunaanni tikikkuminaannerpaat ilagaat, taamaakkaluartoq illoqarfimmi Peqqissaavik ukiorpaalunngortuni nakorsaqanngilaq. Peqqissaavimmi peqqissaasut marluk taamaallaat atorfeqartinneqarput

Peqqissutsimut Naalakkersuisup akissutaa naapertorlugu, nakorsaq immikkut ilisimasalik aggerasuaqquneqarnissamut sillimasussaatitaanngitsoq, ulluinnarnilu ullaakkut arfineq-pingasuniit ualikkut sisamat tungaannut sulisartoq Ittoqqortoormiini atorfinitsinneqassappat, tamanna qanoq akeqassanersoq uani assersuutitut atorneqarpoq. Matumani atorfinitsitsinermi sulisunullu attassiniarnermi tapinut tunngasut missingersuinermi ilaatinneqanngitsut erseqqissaatigineqarpoq.

Aningaasartuutit qaffasissut

Mette Arqe-Hammekenimut paasissutissat tunniuneqartut naapertorlugit, Ittoqqortoormiini nakorsamik atorfinitsitsisoqassappat, taassuma ukiumut akissarsiai katillugit 1.080.183 koruuniussapput. Nakorsamut atorfeqarnermi sulinngiffeqarsinnaanngitsumut sulinngiffeqarnersiutit ukiumut tapisiaritinneqartartut 106.383 koruuniupput, taamaalilluni ukiumut isertitat katillugit 1.186.567 koruuniussapput.

- Sineriammi sumiiffimmi aalajangersimasumik atorfinittussanik nakorsassarsiorneq maannakkorpiaq ajornakusoorpoq. Taamaammat atorfinitsitsinissat piffissami sivikitsuinnarmi isumaqatigiissuteqarfiusarnissaat naatsorsuutigineqassaaq.

- Nakorsap akissarsiaanut aningaasartuuteqarnerup saniatigut, sapaatit akunneri sisamakkaarlugit nikittaallugit suliartortitanik nakorsaqartitsinermut aamma aningaasartuuteqarnissaq Peqqinnissaqarfimmiit naatsorsuutigineqarpoq.

- Nakorsat nikittaallutik angalaneranni ullunut sisamanut ullormusiaqartitsinermut aningaasartuuteqartarnissaq aamma naatsorsuutigineqarpoq. Taakkualu ukiumut 135.000 koruunit missaanniissangatsinneqarput, Anna Wangenheim oqarpoq.

Nakorsat nikittaallutik angalanerannut tamatigut 30.000 – 40.000 koruunit missaannik aningaasartuuteqartarnissaq aamma naatsorsuutigineqarpoq. Tassa nakorsat nikittaallutik angalanerannut aningaasartuutit tamatigut 390.000 – 520.000 koruunit missaanniissangatinneqartut, Peqqissutsimut Naalakkersuisoq akissuteqarluni ilaatigut allappoq.

- Tassa naatsorsuutigineqartutut qulaani taaneqartunut sulinngiffeqarnersiutissanullu ukiumut aningaasartuutit katillugit 1.7 – 1.85 millioner koruunit missaanniissagatinneqarput, Anna Wangenheim erseqqissaavoq.

Ittoqqortoormiini ukioq tamaat nakorsamik atorfeqartitsinani, kisiannili qaammat ataaseq atorfeqartitsisoqartassappat, tamanna agguaqatigiisillugu qaammammut 98.881 koruunit missaannik aningasartuuteqarfiussaaq.

- Tassa imaappoq nakorsaq Ittoqqortoormiini ukiumut marloriarluni qaammat ataaseq suliartortartoq katillugit 197.762 koruuninik akissarsiaqartassaaq, taanna oqarpoq.

Atorfinitsitsinermi soraarnermilu angalanissamut aningaasartuutit uani ilanngunneqanngillat.

Ittoqqortoormiini Peqqissaavimmiit paasissutissat naapertorlugit, paarlattaasinnaasunik pissarsinissap ajornakusoornera pissutigalugu peqqissaasoq ataaseq taamaallaat piffissap ilaani sulisorineqartarpoq.

Ittoqqortoormiini nakorsiartitsinerit qarasaasiakkut toqqaannartumik Nuummi Dronning Ingridip Napparsimavissuanut attaveqarnikkut pisarput.

Suliaq ingerlateqqissagaa

Piffissami qanittumi Ittoqqortoormiini nakorsaqalersinnaanera maannakkorpiaq ilimanaateqannginnera toqqissisimananngitsoq, Mette Arqe-Hammeken, Ittoqqortoormiininngaanneersoq, maannakkulli Nuummi najugaqartoq oqarpoq.

- Ittoqqortoormiini Peqqissaavimmi aalajangersimasumik peqqissaasunik atorfeqartitsisoqarnera soorunami pitsaasuuvoq, kisiannili nakorsaqannginnera toqqissimananngilaq.

- Pinartumik pisoqartillugu nakorsaq assut amigaataasarpoq, taamaattumik Kalaallit Nunaanni illoqarfiit allat assigalugit nakorsamit sullinneqarnissarput qulakkeerneqartariaqarpoq.

- Ittoqqortoormiini nakorsamik aalajangersimasumik atorfinitsisoqassappat, aningaasartuutit annertoorujussuussasut akissummi erserpoq. Kisianni innuttaasunut pitsaasumik toqqissisimanartumillu sullissineq anguneqassappat aningaasat aporfigineqartussaanngillat, taanna oqarpoq.

Tunumi angallannikkut pissutsit pitsaanerulersinneqarnissaat siunertaralugu Ittoqqortoormiini Tasiilamilu suluusalinnut mittarfiliortoqarnissaa, Naalakkersuisut aamma Danskit naalagaaffiata isumaqatigiissutiginikuuat. Ittoqqortoormiini mittarfiliortoqarnissaanut atatillugu nakorsamik atorfinitsitsisoqarnissaa qulakkeerneqartariaqartoq, Mette Arqe-Hammeken isumaqarpoq. Taamaattumik Ittoqqortoormiini aalajangersimasumik nakorsaqalernissaa pillugu Inatsisartuni aalajangiiffigisassatut siunnersuummik maannakkut suliaqarluni taassuma erseqqissaatigaa.