Uulia – Kalaallit Nunaata unammilligassatoqaa

Europami uuliamik atuineq annertummat, uuliamillu naammattumik pissamaasivinnik soqanngimmat, naalaruluttoqarpoq.

Uuliap piumaneqarnera uuliallu amigaataanera pissutigalugit uuliap uuliamillu tunisassiat akitsoraluttuinnartarput. Inuit amerlanerit biiliminnik orsersuitillutik takusarpaat. Ajornartorsiulli suli angineruvoq.

Umiarsuaq kingulleq timmisartunut orsussamik assartuutaasoq Københavnimut sapaatip-akunnerani kingullermi tikippoq. Maannakkut umiarsuarnik allanik pajuttunik tikittussaqanngilaq, umiarsuimmi Hormusip kangerluatigoorsinnaanngillat taamaattumillu orsussamik assartuisoqaqqissinnaanngilaq.

Timmisartut orsussaat nunguppata Københavnip mittarfiani qanoq pisoqassava? Air Greenlandimut aamma Københavnip Nuullu akornanni timmisartuussisarnernut qanoq sunniuteqassava? Piffissap takutikkumaarpaa.

Eqqarsaat takkuppoq: Kalaallit Nunaanni ikummatissaataat qanoq annertutigiva? Kalaallit Nunaanni illoqarfinnut erngup nukinganik nukissiorfeqanngitsunut uuliamik pilersuineq qulakkeerneqanngippat ajorluinnartumik kinguneqarsinnaavoq.

Kalaallit Nunaat Polaroil aqqutigalugu uuliamik pilersorneqarnissamik akimik aalajangersimasumik isumaqatigiissuteqarpoq. Ajunngilluinnarpoq, uuliamilli pissarsisoqarsinnaajunnaassagaluarpat susoqassava? Pilersuisuit sumiiffimmi allami marloriaammik akiliisitsisinnaappata, isumaqatigiissut Kalaallit Nunaannut pilersuisoqaannarnissaanut qulakkeerinneqqava?

Naluara, Kalaallit Nunaannili unittoortoqarsinnaammat politikikkut sammineqarnissaa pisariaqarpoq.

USA-p nunat uuliaatillit allat persarigai aamma takuarput, soorlu Venezuela. Venezuelami pisut nunat allat pisuussutaannik tillinnerupput, maannalu USA-p pissusilersuutimigut eqqortuliornissaa inissaminiippasigani.

Nunarsuarmi politikkikkut nukissiuutinillu pilersuinermi aqutserusulluni pissaaneqarniuunnermi nunat allat eqqugaapput. Taamaammat USA suleqatigissallugu tatigineqarsinnaanngilaq.

Aamma amerikamiut suliffeqarfiutaat nunarsuarmi sumi tamaani suleqateqarniat taamaapput. Kalaallit Nunaat eqqarsaatigalugu politikki maanna "suleqateqarnissamut" ammavoq.

Tamanna apeqquserluinnarpara. Amerikamiut suliffeqarfiutaat Kalaallit Nunaata pisuussutaanik piiaarusuttut isumaqatigiissuteqarfigissavavut, piffissami USA-mi pisortat aqutsisuata iluarpianngitsumik innerani taamaaliussaagut?

Naamik. USA-p tatigineqarsinnaaleqqinnini, tamallu oqartussaaqataanerat atorlugu ingerlatsisoqaqqilernera uppernarsaqqaartinnagu amerikamiut suliffeqarfiutaannik suleqateqarnerit tamarmik unitsinneqarallartariaqarput.

USA-p tatigineqaqqilersinnaanini timitaleqqaartariaqaraa aamma isumaqarpunga. Kalaallit Nunaata nunataanut qimaannarnikuusatik suli nikisinneqanngitsut salinnerisigut tamanna pisinnaavoq.

Taamaattumik USA amerikamiullu suliffeqarfii Tunup avannaani Jamesonlandimi uuliasiussanngillat, issittumi pinngortitami mianernartuusumi.

Nalunngilara tamanna eqqartorneqareersimasutut nipeqartoq, uuliali pillugu eqqartuisoqartillugu taamaattoqartarpoq — Kalaallit Nunaata unammilligassatoqaa.