Storch Narsarsuarmiu: Qanittukkut immaqa 30-nnanngussaagut

Narsarsuarmi ulloq alianartoq pingasunngornermi apriilip 15-ianni pivoq. Timmisartoq suluusalik kingulleq tikippoq, politikerit inuussutissarsiortullu oqalugiarput unnukkullu inuulluaqqusilluni katerittoqarluni.

Nunaqarfik kujataanut angalasunut ukiorpassuarni aqqusaarneqartartoq siunissami tikinneqarpiartarunnaassaaq.

Mittarfik Narsarsuup inuussutissarsiutigaa, Storch Lundilu 2017-ip tungaanut tassani atuuffeqarluni. Sulinermini ukiut 40-t angullugit nalliuttorsiornikuuvoq, ukiuni kingullerni mittarfimmut pisortatut sulilluni.

– Ulloq eqqumiippoq. Tamatsinnut artornarpoq. Timmisartormi kingulliuvoq, Storch Lund oqarpoq.

– Qaqortumut allanullu aallarnikunut amerlasuunut inuulluaqqusereernikuuvugut. Inuppassuarnut uteqqittussaagunanngitsunut amerlasuunut inuulluaqqusineq tamatsinnut artornarpoq. Pisulli akuerisariaqarpagut.

Storch Lund savaateqarfimmi peroriartorpoq, 1975-imi 18-ileeqqammerluni Narsarsuarmi biililerisunngorniarluni ilinnialerpoq. Suliassaaleqisarsimanngeqaluni oqaluttuarpoq. Amerikamiut 1958-imi sakkutooqarfimmiikkunnaaraluartut amerikamiut biilerpassui suliassaapput.

Ingerlaannaq pisortanngortoq

Storch Lund ilinniartuuffiginikuusami ukiut amerlanngitsut qaangiummata pisortanngorpoq.

– Taamani Narsarsuaq suli ineriartorpoq, sannavimmi qulit missaanniikkunarpugut. Kingorna qatserisartunut annaassiniartartunullu pisortanngorpunga, ukiullu 20-t missaanni mittarfimmi pisortaallunga.

Narsarsuarmi mittarfik sakkutuujunngitsunut atorneqartalermat pissutsit allaanerusimasut Storch Lund oqaluttuarpoq.

– Qatserisartoqarfiuvoq, qatserisartoqarfimmilu naalagaqarpoq, taannalu kunngiuvoq suullu tamaasa aquttarlugit.

– Taamanikkut tikisitanut nunaqavissunullu atugassarititat assigiinngilluinnarput, kingornali qujanartumik allanngorput. Kisianni nunaqavissuusugut taamanikkut ilaquttavut maani najugaqatigisinnaanikuunngilagut. Aappara meeqqavullu maani najugaqarsinnaanikuunngillat.

Qujanartumik asanninnerup Narsarsuarmukaannissaa taamani iluatsippoq.

– Eqqaamavara aappaani isertortumik tikisinniarsaralugu, biilerluni qummukajaakkoortilluta naalagara saatsinni takoriasaarlugu. Aappara biilit naqqanut toqqoriaraluarpoq naalagaralu ingerlaannarluni. Isumaqarlunga iluatsillugu.

– Aqaguani suliffitsinniilluta naalakkama ornippaanga oqarlunilu: ’Storch, nalunngilammaa...’ sunalu pineraa ingerlaannaq paasivara. "Aappi, nalunngilara," akivara. Akuerisaaginnarpugut.

Siunissaq nalunartoq

Ukiut ingerlaneranni inuppassuit Narsarsuarmiitillutik asanninneq misigisarlugulu Narsarsuarmut asannipput. Ullormi alianartumi pingasunngornermi oqalugiarnerni tusaaneqarsinnaavoq - Storch Lund saarlerni issiasoq.

Nunaqarfiup asaneqarnera suli qularutigigukku Facebookimi qupperneq alakkaruk, tassanilu inuit tusindilikkaat ilaasortaasut takusinnaassavatit.

Air Greenlandip pisortaanerata Jacob Nitter Sørensenip pingasunngornermi alianartumi oqarneratut eqqaamasat attannissaannut qupperneq atorneqarsinnaaneranik kajumissaarineratut.

Narsarsuarmili aappaagu inuit qassit najugaqassappat?

– Aap, soorunami maannakkut oqaluuserineqartorujussuuvoq. Immaqa inuit 30-t missaannaaniilissasut eqqartornikuuarput. Naatsorsueqqissaartarfiup kisitsisaatai takugaanni siorna 130-t 140-llu akornanniippugut, Storch Lund oqarpoq.

– Maannakkut oqaatigisinnaanngikkallarpara – aamma siunissaq pillugu naammattunik ilisimasaqannginnatta. Mittarfik aqagu matuppat piniarfik peqqinnissaqarfillu qanoq pissappat? Paasissutissanik naammattunik peqannginnerput nalornisitsivoq, oqarpoq.

– Narsarsuaq kisimi pineqanngilaq, aammali eqqaani savaatillit amerlasuut takornarianik sullissisarneri pineqarput, Storch Lund naqissusiivoq.

Storch Lund pingasunik angallateqarpoq, piffissallu ilarujussuani angalaartarluni, ilaatigut attartorneqarluni. Mittarfiup atorunnaarnerata kinguneranik taamatut angallassisoqartarnera Qaqortumi illoqarfinnilu allani ingerlanneqarnerulissapput.

Storch Lund taava tulliulluni nuuttussanngussava? Naamik – maannaanngitsoq.

– Maani najugaqarnissaq ajornarluinnalissappat allamik nassaartariaqarpugut. Nuliaralu maani najugaqaannassalluta, qanorlu pisoqarumaarnera takuniarlugu aalajangerpugut. Immaqa 30-nnanngussagutta ilaqutareerujussuartut pilissaagut, Storch Lund neriuuteqarluni oqarpoq.