Sapaatip-akunnerani tulliuttumi aningaasat naleeruttussat aningaaserivinnut tunniunneqarnissaannut killigitaammat, tunniussisarfiit ulapingaatsiassagunarput.
Ulloq killigititaq tassaavoq sapaat 31. maj, sapaatit akunnerilu kingulliit saaffiginnittarfinni ulapittoqangaatsiarsimavoq.
Ullunilu tullerni suli ulapinnerunissaq naatsorsuutigineqartoq, Nationalbankeni tusagassiorfinnut nalunaaruteqarluni allappoq.
- Naak sulisunik amerlanerusunik tunniussisarfinniititsisussaagaluarluta, utaqqineq sivisusinnaassasoq naatsorsuutigineqartariaqarpoq, Niels Kaas, Nationalbankenimi aningaaserivimmi pisortaq oqarpoq.
- Naammassinissamut piffissaq qanilliartortillugu ulapingaatsiarsimanerput pissutigalugu aningaasanik naleeruttussanik tunniussiartortussat angerlarsimaffimmit piareersarluareersimanissaat kissaatiginarpoq, immersugassanik allagartanillu pisariaqartunik nassaqquneqarlutik, naammagittarsinnaassuseqartariaqarlutillu.
Ukiut marluk affarlu matuma siorna Nationalbanken nalunaarpoq 1000 koruunit 1944-mi, 1952-imi, 1972-imi 1997-imilu naqitat atorneqarunnaariartuaartut.
Aningaasat 2025-mi maajip 31-ani pisiniarfinni akiliutissaajunnaassapput, aamma Nationalbankenimiit naleqanngitsutut nalilerneqartalissallutik.
Nationalbankenip aningaasat naliinik nioqquteqartartoq Forex suleqatigilerpaa, taamaalilluni 2026-mi maajip 31-ata tungaanut aningaasat pisoqqat tunniunneqarsinnaapput nutaanullu nalilinnut aggortinneqarsinnaallutik.
Ullormut tunniussinissamut killigititaq ullunik qulingiluanik sioqqullugu Nationalbankenip Aarhusimi, Odensemi Københavnimilu immikkoortortaqarfii pingasut decembarimi 2024-mi ammarnerminniit 43.000-init amerlanerusut aningaasanillu 200 million koruuninit amerlanerusunik tigusipput.
2023-mi novembarip 30-aniilli aningaasat katillugit 1,5 milliardit koruuniusut tunniunneqarput. Aningaasalli naleeruttussat, maanna milliardialunnik naleqartut, suli tunniunneqarsimanngillat.
