Kalaallit Arctic Winter Gamesimi sulorarnermi angusarissaartarnerat imminermini nutaajunngilaq. Tallimanngornermili unammisartut finalertut tamarmik ujaminnannerat – arlallillu ataatsimit amerlanernik ujaminnannerat - maluginiagassaavoq.
Team Kalaallit Nunaat tallimanik kuultinnapput, arfinilinnik sølvinnallutik pingasunillu bronzinnallutik.
- Ingerlalluaqaat. Ujamippassuit angerlaappagut unammisartuvullu tamarmik ujaminnapput, taamaammallu iluarisimaarluinnarpugut, sungiusaasoq Miko Schøtt Kongstgand oqarpoq, taassumalu ilimagisat malillugit unamminerit ingerlasimasut oqaluttuaraa.
Holdit sorliit kalaallit unammisartuinut ilungersortitsinerpaasimanerannut apeqqummut, taassuma Alberta North unammisani ajornarnerpaajuarsimanerat akissutigaa.
- Tamannalu aamma finalernerni takuneqarsinnaavoq, finalinimi tamatigungajak Albertameersut unammisarpagut, aamma bronzennanniunnerni.
- Maannakkulli Yukon nukappiaqqani angajullerni tuapaallatsitsilaarpoq, taakkulu ilungersortivissorpaatigut, taanna oqarpoq.
Siunissami nukassartassasut
Naak AWG sulorartartunut naammasseqqammigaluartoq, taamaattoq siumut qiviarnissaq siusippallaanngilaq. Ukiut marluk qaangiuppata Issittumi timersortartut pikkorinnerit naapeqqissapput, pissutsillu marlussuit Miko Schiøtt Kongstadip kalaallit timersortartuisa aallutissagaat neriuitigaa.
- Ilungersornernit ajoqusernerit pikkajuttarput, tassanilu qanoq unamminissat sioqqullugit, ajornanngippallu piffissaalluartillugu nukkassartarnissaannut kajumitsilersinnaanerat paasiniartariaqarparput, taanna oqarpoq.
Sulorarnerup tungaatigut piareersarluarsimallutik, peqataasullu piffimmi klubiminni sungiusarnernik naammassinnittarnerat, taassuma oqaluttuaraa.
Maannakkulli siunissami uteqqitassatut kissaatigisinnaasaminik misilittagaqalersimapput.
- Maannakkut aallarnissarput ullunik marlunnik sioqqullugu holdi tamarmiusoqNuummi katersorparput, taamaalillutalu ulluni marlunni sungiusarpugut. Unammiartortarnerni allani taamaaliortarsimanngilagut, taamaammallu taamaaliorneq pitsaalluinnartuusimavoq. Taamaalillutik piareersarluarnerulaarput, holdinimmi nalinginnaasumik katiterisarnitsinni unammeqatigiittarsimanngillat, Miko Schiøtt Kongstad oqarpoq.
Team Kalaallit Nunaat Sapaammi Kalaallit Nunaannut uternissaat sioqqullugu, arfininngornermi naggataarnersiortoqassaaq.
