Nunarput sinnerlugu naggussanik pississaarneq – Inuuteq Josefsenip ujaminnannissani allanillu takorluugaqalernissani anguniagarai

Timersortartoq inuusuttoq Inuuteq Josefsen Arctic Winter Gamesimi pingajussaanik peqataavoq, tassanilu issittumi timersuutit ileqquusut ilaanni Kalaallit Nunaat sinnerlugu peqataagami aamma ukioq manna unammiuaarnerni ujaminnappoq.

Timi tamaat atorlugu pississaarnermi rekordiliisoq

Inuuteq Josefsen ukioq manna unamminerni arfineq-marlunni unammeqataavoq: Tukerseriaanermi illuttullu tukerseriaanermi, Alaskamiusut tukerseriaanermi, naggussat atorlugit pississaarnermi, Nivingasumik assaap illuinnaanik attorniaaneq, Nissut ataatsimoortillugit pingasoriarluni pississaarneq aamma Niaqoq atorlugu allunaamik noqqoruunneq. Pikkoriffiginerusani nammineq taassappaguk akissut ersarippoq.

- Naggussat atorlugit pississaarnermi pikkorinnerullunga isumaqarpunga — nukittunera uteriitsuuneralu pissutigigunarlugit, Inuuteq illarluni oqarpoq.

Inuuteq naggussat atorlugit pississaarnermi timini tamaat atorlugu siumut pississaartarpoq, timini tamaat qerattartillugu assaminilu naggussani atorlugit pississaartarluni. Unamminermi - peqataasut uninngiivillutik sapinngisamik takinerpaamik pississaartarneranni - talit tuillu nukittuujusariaqarlutillu minnerunngitsumik anniarnaveersaarsinnaasariaqarpoq. Inuuteq siornatigut nunatsinni rekordiliisimavoq, takisuumillu pississaaraangat nukittussusaa tamaviaarlunilu eqqarsaatiginneqqissaarnera malugineqarsinnaangajappoq. Nukittunera, qasusuinera aalajaanneralu aalariaasiani tamani takuneqarsinnaavoq – piginnaasani taakku atorlugit Kalaallit Nunaanni Issittumi Timersortartuni maluginiarnarnerpaat ilaannut ilanngussimavoq.

Taekwondomit issittormiut timersuutaannik timersornermut

Inuusuttuaraalluni issittormiut timersuutaannik sammisaqartalersimavoq, nuannarinninneralu tamatuma kingorna ulluinnarni inuuneranut sunniuteqangaarpoq.

– Illuma Issittormiut Timersortaannik sungiusartunut 2019-imi ilasereqqaarpaanga. Taamani uanga taekwondo kisiat sungiusartarpara, taassumalu Issittormiut Timersortaat sungiusartarpai. Ullumikkut killormoortoq Inuuteq oqaluttuarpoq, maannalu Issittormiut Timersuutaat kisiisa ukkatarai.

Ileqquusumik Issittormiut timersuutaat sungiusaqqaarmagilli inuunerani immikkut inissisimaffeqalerput. Sungiusarnerit tamarmik, pissinnerit unamminerillu tamarmik timimut tunngaannanngillat, aammali imminut piumaffigisinnaanermut, aallussinissamut piumasaqarnermullu tunngassuteqarput. Timersuut nukinnik periutsinillu atuiffiuvoq, aammali timersortartut ataatsimooqatigiittarnerat kulturiallu taamatulli pingaaruteqartigaaq.

- Sungiusarnitsinni unammisarnitsinnilu ilaqutariittut ittarpugut. Ikioqatigiittuaannarpugut, timersortartullu pissuserissaartuaannarput, taanna oqarpoq.

Inuuteq Josefsen Arctic Winter Gamesimi peqataagaangat ataatsimoorneq tapersersoqatigiinnerlu sakkortunerulersarput.

- Timersortartut nunanit assigiinngitsuneersut naapinnissaat qilanaariuaannarpara. Timersorneq immikkuullarissuummat kulturimullu ataatsimoorussamut attuumassuteqarmat unammisoqarsinnaallunilu ataatsimoortoqarsinnaavoq, taanna nassuiaavoq.

Issittormiut Timersuutaat unammissutaaginnanngilaq. Aammali ileqqutoqqat, kulturi inuttullu ineriartorneq ataatsimoortillugit imminut unammillerfiullunilu timersortartunut allanut attaveqarluarnerulersitsisarpoq — tamannalu ujaminnannermut rekordiliinnermullu assingusumik pingaartippaa.

Qaqortumiuunini tulluusimaarutigigaa

Inuuteq Josefsen unamminerni peqataagaangami atini kisiat atorneq ajorpaa.

– Unamminerni tamani Kalaallit Nunaat, minnerunngitsumik illoqarfiga Qaqortoq, sinnerlugu peqataasarnera tulluusimaarutigiuaannarpara, oqarpoq qeqqilluartitaarlunilu.

Ilinniarnertuunngorniarnermini niuernermillu ilinniarfimmi ilinniarnermi nalaani ukiuni tallimani Nuummi najugaqarsimavoq, tassani timersortartut allat nuannarinnittut peqatigalugit aamma issittormiut timersuutaannik sungiusartarsimalluni. Inuuteq Josefsen ullumikkut Qaqortumi timersortartunut atugassartitaasut sinnerlugit maligassiuisuuniarsaralunilu siuttuuniarsarisarpoq.

Illoqarfimmimi ukiorpassuarni aaqqissuussamik Issittormiut Timersuutaannik timersoqatigeeqarsimanngilaq. Sammisaqartitsisarneq coronap kingorna unitsinneqarmat – Inuutip allanngortitsiniarluni iliuuseqarnissaata tungaanut -meeqqat inuusuttullu timersuutinik tamakkuninnga sammisaqarnissamut ukiut tallimat missaanni periarfissaqarsimanngillat.

– Qaqortumi sivisuallaamik issittormiut timersuutaannik sammisaqartoqarsinnaasimanngilaq. Taamaammat sungiusaasutut naqqaniit aallarteqqippunga, taanna tulluusimaarluni oqaluttuarpoq.

TikTokimi YouTubemilu malinnaasorpassuaqarami inuit attaveqaqatigiittarfii atorlugit inuusuttut soqutiginnilersinniartarlugillu timersuut nittarsaattarpaa.

– Timersorneq meeqqanut ingerlateqqikkusuppara. Qaqortumi aallunneqarunnaarnissaa kissaatiginngilara, Inuuteq Josefsen ilumoorsaarluni oqarpoq, angullu inuusuttoq siunertaqartoq qularutissaanngilaq.

Qujanartumik suliniut tamanna kinguneqarlualerpoq. Amerlasuut sungiusarnermut takkuttarput, kingullermillu meeqqat 14-it timersortarfimmi katersuupput – taakkuttaaq Inuutip Arctic Winter Gamesimi angusaanik malinnaasarput.

- YouTubemi malinnaasarput, tamannalu kajumississutigingaartarpaat, taanna oqarpoq.

Timmisartortartunngorusuttoq

Inuuteq Josefsen sungiusarnanilu unamminngikkaangami meeqqat atuarfianni paarlatsitut sulisarlunilu tuluttut qaffasissuseq B ilinniarpaa — tamakkualu tamarmik takorluukkani anguniarlugu iliuuserai.

– Timmisartortartunngornissara takorloorpara. Qinnuteqarsinnaajumallunga tuluttut qaffasissuseq B-mi karakteri amigaatigiinnarpara, anguniagaqarpaluttumik aalajangersimalluinnartumillu isikkoqarluni oqarpoq.

Qutsissumi aarsaarluni, tukerseriaasarnermiit timmisartorluni nuissakkut timminissamik takorluugaqarneq nalaatsornerinnaanngilaq. Nuannaartorisaa Tony Fisker isumassarsiorfiujuarpoq.

– Issittormiusut timersortartut akornanni tusaamasaalluarpoq, aamma timmisartortartuuvoq, Inuuteq Josefsen nuannaarluni oqarpoq.

Timersorneq takorluukkalu Inuutermut imminnut attuumassuteqarluinnarput. Naggussat atorlugit pissinnerit sungiusarnerillu tamarmik timikkut ineriartortitsinerinnaanngillat – piumassuseqarnermik, eqqarsaatiginneqqissaarnermik nikallujuinnermillu sungiusaataapput. Pissutsit taakkua timmisartup aquttarfianut qaquguluunniit ingikkuni atorluartussaavai. Taamanikkussamut naggussat atorlugit pississaarlunilu medaljenik nutaanik rekordiliinernillu ingerlatitseqqissaaq. Angusat, sungiusarnerit Qaqortumilu meeqqat kajumissaariffigisani qungujulanerat tamarmik piumassusermik, anguniagaqarnissamik aallussinissamillu ilimagisamit qutsinnerungaartumik – natermi silaannarmilu - kivitsisinnaasut eqqaasitsissutigisarpai.