– Nuunnermut akileraaruteqartarnissap kalaallit suliffeqarfiutaannut innarliissanngillat

Uninnermi akileraaruteqartarnissaq pillugu Naalakkersuisut Inatsisartunut inatsisissatut siunnersuutaat pissutigalugu, suliffeqarfiit Kalaallit Nunaanni pilersinneqartut nunani allani suliffeqarfiit immikkoortortaqarfiinit suliffeqarfinnillu ullumikkut nunanit allanit aqunneqartunit ajornerusumik inissisimalersinnaapput.

Inatsisartuni Siumut taama isumaqarpoq.

- Taamaattumik Siumut sinnerlugu Inatsisartuni ilaasortatut peqqutissaqalersippaanga ernumassuteqarnissamut, Erik Jensen, Siumut Inatsisartuni gruppeformandia tusagassiorfinnut nalunaarutaani allassimavoq.

- Tusagassiuutini takuneqarsinnaalereersutut, inatsimmut siunnersuutip maannamut isikkua eqqarsaatigalugu isumaqarpoq, Kalaallit Nunaanni suliffeqarfiit pitsaasumik ingerlalluartut matusariaqalersinnaanerat, tassami assersuutigalugu piginnittoq utoqqalinersiaqalerluni suliunnaarnissani kissaatigippagu, Kalaallit Nunaannilu pisissussamik soqutiginnittoqarani.

- Suliffeqarfiit nunaqavissunit kinguaariinni arlalinni ingerlanneqarsimasut pillarnissaannut periarfissiineruvoq. Tamanna ilumoorsinnaanngilaq, kalaallit suliffeqarfiutaasa illersornissaat illuanilu avataaniit pigineqartunit atugassarititai annikinnerusinnissaat sulissutigisussaanngilarput. Erik Jensen oqarpoq.

Siumut allannguutissaminik siunnersuuteqarniartoq

Kinguaariit nikinneranni sinaakkutaasa toqqissisimanaartuunissaannut naapertuunnissaannullu politikkikkut qulakkeerinninnissaq ajornerulersitsinani suliassaasoq Siumumi gruppeformand Erik Jensen isumaqarpoq.

Taamaattumik akileraarutinut inatsisissatut siunnersuut, Inatsisartut upernaakkut ataatsimiinneranni oqaluuserineqartussaq, allannguutissatut siunnersuuteqarfiginiarpaa.

- Siunnersuutissara akileraarnermut inatsisinut ilisimatuut ilaat suleqatigalugit suliaavoq, tassanilu siunertat suli pitsaanerusumik naammassineqarsinnaanissaat qulakkeerumallugu; aningaasat nunatsinniit akileraarutitaqanngitsumik nuutsinneqarnissaat pinngitsoortinniarlugu, oqarpoq.

Siunnersuut Inatsisartut Aningaasaqarnermut Akileraartarnermullu Ataatsimiititaliaata ataatsimiinnerani tulliuttumi oqaluuserineqassaaq.

- Akileraarnermut akisussaaffilimmik politikkeqarnissaq tapersersorparput. Tamannali naapertuisuussaaq. Inuiaqatigiit akileraartarnikkut akisussaaffimmik sumiginnaasoqannginnissamut illersortariaqarpagut – tassanilu nunaqavissut inuussutissarsiuuteqarneranik illersuinissarput aamma ilanngullugu. Siumumiillu pitsaasumik allannguutissatut siunnersuummik suliaqassaagut, qulakkeerumallugu kalaallit suliffeqarfiutai illersorlugit, avataaneersut suliffeqarfiutaannut periarfissaritinneqartut assinginik periarfissaqarnissaat, tassani akileraartarnermut aamma inuiaqatigiit aningaasaqarnerat attatiinnarneqarnissaa eqqarsaatigalugu, Erik Jensen oqarpoq.

Inuussutissarsiuteqartunit akerlilersorneqarneq

Nunanut allanut nuuttunut akileraarusersuineq pillugu Naalakkersuisut inatsisissatut siunnersuutaat akerleriissutaasoq, nunatsinni inuussutissarsiortut ilarpassuinit akerlilersorneqarpoq, soorlu Sermitsiami januaarip 27-ani taama allaaserineqartoq.

Suliffeqarfiit kattuffiillu 14-it tusarniaanermut akissutaanni aamma Grønlandsbankenip Aningaasaqarnermut Akileraartarnermullu Naalakkersuisoqarfiup allannguutissatut siunnersuutaanut tusarniaanermut akissutaanni tamanna atuarneqarsinnaavoq.

Isumasiuinermi akissutigineqartut tamarmik isumaqarput allannguutissatut siunnersuutip ajornartorsiutit inuussutissarsiortut eqqaareersimasaat aaqqinngilluinnarai.

Kitdlak Knudsen ajornartorsiorpoq

Kitdlak Knudsen, Nuummi innaallagisserinermik suliffeqarfimmik Carl Lynge ApS-imik piginnittoq, Tusagassiutitigut nalunaarummi atsioqataavoq.

Kalaallit Nunaanni suliffeqarfimmik pisisussaqannginnini pissutigalugu niuertarfini matusariaqarsinnaallugu, Sermitsiamut oqaluttuarpoq. Kitdlak Knudsen qallunaamik pisisussaqaraluarpoq.

- Pisisussaqarpunga. Taassumali pisortatut ingerlaannarnissara kissaatigaa, taamaattumik allannguutit uannut pingaaruteqarnavianngillat. Pisisussap aallarniutigalugu soraarsissinnaavaanga imaluunniit nuunnermut akileraarut akilersinnaavaa. 

- Taamaattumik pisisussanngoraluartoq pisinissamik soqutiginnikkunnaarpoq, Kitdlak Knudsen Sermitsiamut januaarimi oqarpoq.