Aima Jensen qiasarniarlunilu illartarluni nunarsuarmi ujakkaarnermi unamminerit annerpaartaanni peqataavoq

Nittaallat kigaatsumik Sälen qulangerlugu nakkaarusaarneranni ujakkaartartut tusindillit aallarnissaminnut piareersimallutik itisuumik anersaartorput. Ujakkaarluni unammineq aaqqissuunneqartartut pisoqaanerpaartaanni nunarsuarmilu takinerpaami nunaqqaterput Aima Jensen aallarfissami piareersimavoq.

90 kilometerit ingerlaarfigissavaa — oqaluttuarisaanermik, ileqqutoqqanik pinngortitamillu alutornartumik ulikkaartoq, Sverigemi Sälenimiit Moramut 1922-mili ingerlaarfigineqartartoq. Vasaløbet ujakkaarnerinnaanani ukiut hunnorujullit matuma siornatigut ileqquliussimasumik apummi aqqutaavoq takorluukkanik, piumassusermik tunniutiinnajannginnermillu pilersitsisoq.

Illernit tugaanut aqqut

Aima maannakkut Norgemi najugalik Vasaløbemut peqataanissaminut ingerlaarnera nalinginnaasumik pinngilaq. Ujakkaallammanneersuunngilaq ukiorpassuarnilu sungiusarnikuunani. Inuunerminili timersortuartuugami oqimaatsulerillunilu ukiorpassuarni sulisarnikuugami nukissaqarluarpoq.

Ukiut kingulliit unamminarput, sungiusarnerillu sulineq pisussaaffiillu allat pissutigalugit kinguartinneqartariaqartarsimavoq. Taamaakkaluartoq aatsaat timikkut taama nukittutigisutut misigaaq. Aimap oqaluttuassartaqarluartumut ujakkaarluni sukkaniunissamut, ukiut tamaasa marsip qaammataani sapaammi siullermi ingerlanneqartartumi, sungiusarnini aatsaat januaarimi aallartippaa. Aimap qaammatip naanerani sisoraatiminik Nunatsinniit kiisami pissarsinissaa tikillugu timigissartarfimmi sungiusarneri tunngaviliipput.

- Apuunnissara unammillernarlunilu piviusorsiorpalaarunanngikkaluarpoq. Uteriitsuunerli piumassuseqarnerlu angusaqarluarnissamut iluaqutaasarput, Aima Jensen oqarpoq.

Sapaatit-akunnerini tulliuttuni takivallaanngitsumik ujakkaarluni sungiusartarpoq, sungiusarnerit sakkortuut ingerlattassavai, sulisarnerali peqqutaalluni sungiusarneq akornuserneqartarpoq, taamaasilluni sungiusarsinnaaneq ajornarsisarluni. Vasaløbet pinnginnerani sungiusarneq tulliuttoq taamaallaat 32 kilometerisut ungasissuseqarpoq, 90 kilometerit unammiffissaaniit naannerungaartoq.

Nunarput sinnerlugu

Aima Jensenip sisoraaseraangami Kalaallit Nunaat eqqaamasarpaa. Nunatsinni peroriartorsimanerata unammilligassanut pisinnaalersippaa.

- Tunuliaqutiga ingerlaarninnut pingaaruteqaqaaq. Eqqarsartaatsikkut nukittuujunissamik, atukkatsinnik naammaginninnissamik ajornartorsioraluarlutalu tunniutiinnannginnissamik pingaartitsisumik perorsagaavunga, oqaluttuarpoq.

Naak ujakkaarneq kalaallinut norskinullu ilisarnaataalluaraluartoq peroriartornermini timersuummi tamatumani peqataasimanngilaq.

– Kujataani peroriartorninni ujakkaarneq piffiit allat assigalugit taama atugaatiginngilaq, Aima Jensen oqaluttuarpoq.

Inuunermini kingusinnerusukkut aatsaat ujakkaartalerpoq, taamaattorli timersuut ataqqiuarsimavaa – Nunatsinnimi ikinngummi akornanni Norgemilu ujakkaartarneq initoqimmat. Ataqqinninnerlu piumassuseqalersitsivoq.

- Vasaløbemut tamassuma piumassuseqangaalersippaanga. Vasaløbet ukiut qulit matuma siornatigut tusaqqaarakkuli takorluugarilerpara. Immaqa ujakkaartartuneersuunnginnera pissutaalluni unamminartuunerata taanna suli uannut pilerinarnerulersippaa, nassuiaavoq.

Aimap ujakkaarnerup ataqqinartup naammassinissaa kisiat pingaartinngilaa. Kulturiminik, piumassutsiminik kalaallisullu eqqarsartaatsiminik ujakkaarfissamut nassataqarnissaq pingaaruteqarpoq — tunniutiinnajannginneq sapiissuseqarnerlu qanoq sunniuteqarsinnaanerat takutikkumallugu.

Aallarfissamiit apuuffissamut

Aallaat aallartinnermi iginneqarnerani sila issittorujussuuvoq uummataalu aallasalluni. Aima Jensenip 90 kilometerit ingerlaarfissaa aputeqarluarpoq, qummukajaaqarpoq ilungersorfissaallunilu. Ujakkaartartut tusindillit akornanni ippoq – unammininili nammineq pigissavaa.

- Vasaløbet sivisuumik tusartuarpara - unammineq oqaluttuarisaanermi ataqqinninnermilu tunngavilik. Uannut piffissaq angusarlu apeqqutaanngillat, unammeqataasinnaaninnillu takutitsinissaq, oqarpoq.

Ujakkaarnerup aallartilaarnerani orluvoq, paffinilu saamerleq ajoquserlugu. Unammineranilu anniarnera taamaaginnarpoq. Sivitsunngitsoq ujakkaarnermik unammineq tusaamasaq unamminartupilussuanngorpoq.

- Arlaleriarlunga orlusarpunga, siusissukkullu paffiga saamerleq annersillugu. Anniaqaanga. 20-30 kilometerit kingulliit anniarnermik qasunermillu qiasarlungalu ingerlaarpunga, Aima oqaluttuarpoq.

Kilometerimiit kilometerimut timimut sakkortusiartorpoq. Anniarnerminilu qanoq nukittutiginini aamma malugilerpaa. Qummukajaani, inuppassuit kigaatsunnguamik ingerlaffianni, ujakkaarnermini sukkassusini paariinnarlugu ingerlaarpoq. Ammukajaakkut sisoraatiminik sisuinnartarpoq, allat mianersorfigisaanni. Tassani qangeraasarpoq – aamma unamminerup naammassilernerani.

- Ingerlaarnerma ilaani qanoq nukeqatiginerlunga malugaara, allaat kilometerit kingulliit 10-20-t qummukajaakkut ingerlaarnissara nukissaqarfigalugu. Tamannalu ilungersunaraluarluni eqqarsartaatsikkut nakussatsissutigaara, oqarpoq.

Piffissaq aamma ingerlavoq. Piffissarititaasut arfineq-marluk angummanniarfiupput. Arlaleriarluni piffissaq eqqorlugu apuutinngitsoornissani ernummatigaa. Nalunaarsuiffiilli nalleraangamigit oqiliallattarpoq — nutaamillu aallartiffiusarluni.

- Uteriitsuunermut sungiusarneruvoq. Toqqissisimaffiga qimalluinnarpara, naggataatigullu ataasiakkaaralunga ajaappiarsorneq ingerlatilerpara, Aima Jensen oqaluttuarpoq.

Akunnerit aqqaneq-marluk minutsillu qulingiluat ujakkaareerluni nukissaarulluni Moramut apuuppoq, allamilli qamanermioqarluni.

- Naammatsivippunga, qujamasoqaangali. Tamanna qanoq imminut unammillersinnaatiginermik eqqaasitsisuuvoq, tulluusimaaqaluni oqaluttuarpoq.

Bertilip 80-inik ukiullip tunuani

Apuuffissamut apuutereerluni Aima qiimasuunerminut uteqqippoq. Imminut, misigisani Vasaløbemilu pissutsit ilungersunartut quiassuaatigai. Instagramimini ima allappoq:

- Training for races makes you look like an elite athlete to your friends and family – then on raceday you finish 9373th behind an 80-year-old named Bertil.

Toqqaannaq nutserlugu: Sukkaniunissamut sungiusarneq timersullammaasutut ilaquttannut ikinngutinnullu isumaqalersitsisinnaavoq - ullormili unamminermi Bertilip 80-inik ukiullip tunuani normu 9373-iullutit apuutissaatit.

Quiassuarnerata isumavia pingaarutilimmik oqariartorneruvoq. Takutitsilluarnissamut tatineqarnini qaangerniarlugu Aimap tamanna atortarpaa, aamma 3500-nit amerlanerusunut malinnaasuminut inuunerup siunertaanik paasinninnissaannut kajumissaarutaavoq.

- Quiasaarnermik nuannarisaqartorujussuuvunga, nalunngilarami timersullammaananga, aammali nalunngilara naammassinninnissamik aalajangersimalluinnarneq uanga ileqqoralugu, oqarpoq, eqqarsarluarlunilu nangilluni:

- Ajugaanissaq pineqanngilaq, takkussinnaanissaq, ajornarsigaluaraangalluunniit misiliinerup naammassinissaa pineqarpoq. Angalanera inummut ataasiinnarmulluunniit pitsaanerpaarsuusariaqannginnermik eqqaasitsisinnaappat, ujakkaarninni piffissamik atuininniit tamanna pingaaruteqarneruvoq, Aima qungujulalluni oqarpoq.

Aima Jensenip nukissaq sukkassusermiinnaanngitsoq aammali imminut quiassuaatiginninnermiissinnaasoq eqqaasippaatigut — allaat arpaffiup aqqutaani 90 kilometerisut isorartutigisumi. Timersornermut inuunermullu isiginnittaasia piumassuseqarnerup, nikallujuinnerup nuannaarnerup ujaminnannernit ajugaanermillu pingaaruteqarnerunerannik eqqaasitsissutaavoq.