Arctic Soundsip pisortaa: Nuup avataani festivalertitsisarneq akisullunilu ajornakusoornerulerpoq

- Festivalip ataavartuunissaa eqqarsaatigalugu aappaagumiit festivalertitsisarnerput annikillisinnissaa eqqarsaatigalugu aalajangertariaqassajunnarsivugut.

Arctic Sounds Festivalip pisortaa pilersitsisorlu Jacob Froberg oqarpoq.

Festivali pisortatigoortumik apriilip aappaanni aallartissaaq. Festivalertullu ulluni tallimani illoqarfiit annersaata aappaanni nipilersornermik kulturimillu pikialaartitsisoqarnera misigisussaallugu.

Festivalimik aaqqissuussisut nuannaaraluartut sinerissami festivalertitsisarneq ernummatigineqarpoq. Nuummi mittarfik nutaaq ammarneqarmalli unamminiarnartoqarnerulertoq Jacob Froberg oqarpoq.

- Mittarfik nunanit tamalaanit tikinneqartartoq Kangerlussuarmit Nuummut nuunneqarmat timmisartumut billitsinut aningaasartuutit 40 procentinik qaffapput, oqarpoq.

Timmisartumut billitsinut katillugit 800.000 koruunit missaanniittut ukioq manna atorneqartut, Sermitsiap festivalimi pisortaq sapaatit-akunneri marlussuit festivalernissaq sioqqullugu aperimmagu Jacob Frobergip oqaatigaa.

Mittarfiup ammarnerata kingorna aki 2024-mut sanilliullugu annertunerungaatsiarpoq.

- Aammattaaq eqqumiitsuliortut tikeraallu allat nammineq billetinut aningaasartuuteqartartut amerlaqaat, Jacob Froberg oqarpoq.

Eqqumiitsuliortut attaveqaqatigiinnermullu tunngasunik sammisaqartut Nuummi unnuisariaqartarput, tamannalu aamma annertuumik aningaasartuutaasartoq, taassuma erseqqissarpaa.

- Nuummi ajornannginnerulersimanera akikinnerulersimaneralu nuannaarutigaarput, tamannali uagutsinnut allanut akisoorujussuuvoq.

Akit qaffannerat festivalimik aaqqissuisut tupaallaatigaat

Timmisartumut aningaasartuutit qaffakkiartupiloorsimasut, Jacob Frobergip aaqqissueqataasalu festivalertitsisoqartinnagu siorna paasivaat.

- Akit taama qaffasitsigilernissaat festivalimut piareersarnitsinni 2024-mi ilisimasimanngilarput, Jacob Froberg oqapoq.

Taamaattumik tusarnaartitsisartunut inniminneereersimasunut billitsinik pisiortornerminni nuanninngitsumik tupaallaatigisaat tassaavoq festivalip 200.000 koruunit missaannik amigartooruteqalernera, festivalip pisortaa oqarpoq.

- Kangerlussuup mittarfiata Sisimiunut qaninnera iluaqutigisimaqaarput. Angalanerup qanoq akisutigilersimanera ajornakusoornerulersimaneralu tupaallaatigaarput.

Aammattaaq festivalimut eqqumiitsuliortut siorna peqataasut Kangerlussuarmi 20-t, Sisimiunilu 50-t aallarnaveersimasut, festivalimik aaqqissuisoq oqarpoq.

Sapaatip-akunnera ataaseq tikivillugu angalasinnaajunnaartoqarsimavoq

- Nuummilu sila pissutaavoq, Jacob Froberg oqarpoq.

Festivalip siunissaa isumakuluutigaajuk?

- Ukioq manna aningaasanik tapiissutinik pissarsilluarpugut, kisianni siunissaq ungasinnerusoq eqqarsaatigalugu angalanermut aningaasartuutit 40 procentimik qaffanneqarsinnaanngillat, Jacob Froberg akivoq nangillunilu:

- Annikillisaasariaqarsinnaavugut, imaluunniit angalanermut aningaasartuutit appartinniarlugit aalajangersimasumik suleqatissarsiortariaqarpugut.

Ilulissat neriuuteqalersitsisoq

Pisortaq pissutsit aaqqinneqarsinnaanersut festivalertitsinerullu annaanneqarnissaanut ikiuutaasinnaasunik periarfissanik assigiinngitsunik misissuivoq. Ilaatigut Iqalunnit Reykjavikimillu toqqaannartumik Sisimiunut timmisartuussisoqarsinnaanera iluaqutaasoq, oqarpoq.

Aamma Arctic Sounds Nuummi Katuamik suleqateqarpoq, tamannalu pissutigalugu illoqarfiit pingaarnersaanni tusarnaartitsinerit immikkut ittut aaqqissuunneqartarput eqqumiitsuliortut Nuuk aqqusaarlugu angalasut tusarnaarnissaannut. Tamannalu angalanermi aningaasartuutinut tamakkiisunut annikillisaataasinnaavoq.

Jacob Frobergip suleqataasalu Ilulissani nunat tamalaat akornanni mittarfik nutaaq ukiaru ammarneqartussaq neriuuteqarfigaat.

Nunamut iserfissap allamiillu aniffiup saniatigut allamik inissaqalerpat angalanissamut pilersaarusiornermut eqaannerusumik periarfissaqalertoqarumaartoq neriuutigineqarpoq.

- Timmisartorluni angalaneq eqqarsaatigalugu suut tamarmik ataqatigiissaarnissaat ajornakusoorsinnaavoq, Jacob Froberg oqarpoq.

Mittarfissap ammarnissaata tungaanut Arctic Soundsimiittut naammagittaannartariaqarput.

- Ilulissani mittarfiup ammarneqarnera iluaqutaassasoq neriuutigaara, tamannali ilisimaneqarsinnaanngilaq, festivalimi pisortaq oqarpoq.