Aleqa Hammond: Naalakkersuisoqatigiinnit aninerput qinersinerup inerneranut sunniuteqarpoq

Folketingimut qinersinermit ullut arfinillit qaangiummata qinersinerup inernerata  eqqarsaatiginissaanut piffissaqarluareerluni Siumumi siulittaasup ima oqaasertalerpaa.

- Tamakkiisumik innuttaasut taasinerat ataqqisarparput qanorluunniit. Aamma ataqqilluinnarparput taasinerup inernera, Aleqa Hammond Sermitsiamut ataasinngornermi taama oqarpoq. 

Siumut Folketingimut qinersinermi siuliani, tassa 2022-mi qinersisartut 37,7 procentiannit taaguunneqarpoq, marlunngormallu qinersinermi qinersisaat marloriaat sinnerlugu appariarlutik, qinersisartut 16,4 procentiannit taaguunneqarluni. Sumik peqquteqarnera Aleqa Hammondip qularinngilaa. 

- Avaqqunneqarsinnaanngilaq Siumut ilutsinni pisut ippassaaneralaannguaannarmiimmat qineqqusaarnerup nalaani. Taanna aamma sunniuteqarnera takusinnaavara, aamma tamanna uagutsinnut akeqartoq takusinnaavara.

Aleqa Hamondip taama oqarnermini innersuutigaa Siumumi ilaasortat nuimasut marluk, tassa nunanut allanut tunngasunut naalakkersuisuusimasoq Vivian Motzfeldt aamma partiimi Naalakkersuisunilu siulittaasuusimasoq Kim Kielsen Siumup naalakkersuisoqatigiinnit aninera tunngavigalugu partiimit aninerat.

Akeqaraluartoq aalajangernertik attappaat 

Taamaakkaluartoq Siumup naalakkersuisoqatigiinnit Folketingimut qineqqusaarnerup nalaani aninera suli eqqortuusoraa. 

- Oqartoqarsinnaavoq "Soormi Folketingimut qinersisoqareernerup kingorna naalakkersuisoqatigiinnit aninnginnassi?" Taamannak aperisoqarsinnaavoq. Kisianni tassa naalakkersuisooqatigiinnermi pissutsit isummerfigineqartariaqarmata kinguarsarnagit, taavalu aamma nalunngikkaluarlugu Folketingimut qinersinermi sunniuteqaratarsinnaasoq, kisianni aalajangertariaqarnermiikkami. Taannalu aamma aalajangersimanerput attapparput. 

Naak Siumut Folketingimi issiatitaarukkaluartoq siulittaasoq marlunnik nuannaarutissaqarnerarpoq. 

Siullertut Siumup Inatsisartunut siorna qinersinermit qinersisai sanilliutissagaanni procentitigut qaffariarsimapput, siornami Inatsisartunut qinersisoqarmat Siumut 14,7 procentinit taaguunneqarpoq, tamatumuunalu qinersisut 16,4 procentiinit taaguunneqarluni.  

-  Taanna nuannaarutigivara. Taanna tunngavigalugu ingerlaqqissuugut.

Aappaattut, Aleqa Hammondip oqarnera malillugu, Siumup sinerissami qinersisai qaffariarsimapput. 

- Taanna nuannaajallaatigivara. Immikkoortortaqarfitsinnut attaveqarnerup annertusarnerata kingunerisaanik, innuttaasut Siumumut taasisartut tusaaneqarlutik uterariartorneranik tikkuussimmat, Aleqa Hammond oqarpoq. 

Nalilersueqqinniartut 

Qinersinerulli inernera ersarippoq. Siumut Folketingimi ilaasortaatitaaruppoq. Partiilu nunatsinni partiit annersaannut ilaajuarsimasoq qinersineq kingulleq qiviaraanni partiini tallimaasuni sisamaattut inissisimavoq. 

- Nalilersuissuugut, nalilersuiuarpugut.

Oqarputit nalilersuiniarlusi. Suna nalilersussuisiuk? 

- Pingaaruteqarami immikkoortortaqarfiit qanimut suleqatigalugit, taavalu siulersuisuunerit qanimut suleqatigiilluta, periarfissinneqassagamik tamarmik oqaasertaliisinnaallutik. Aamma siunnersuutit, suleriusissat, periusissat, sillimaffigisassat. Piareersaatissat tamaasa taakkua nalilersuutigissuagut.

Folketingimut qinersineq pereermat piffissaq eqqorlugu qinersisoqassappat ukiut sisamat qaangiuppata qinersisoqassaaq. 

Inatsisartunuttaaq qinersineq siorna pimmat piffissaq eqqorlugu qinersisoqassappat ukiut pingasungajaat qaangiuppata qinersisoqassalluni. Kommunimullu qinersineq tulleq 2029-mi pissaaq. 

Qinersinissap tullissaani Siumut siuariaqqissappat qanoq iliorniarnerluni aperineqarami siulittaasoq ima akivoq. 

- Siumup politikkia ersarissartuassuarput. Siullerpaamiunngilaq Siumut Inatsisartuni illuatungiliuttuusoq. Illuatungiliuttuunikuuvugut aamma illuatungiliuttuusinnaavugut amerlanngikkaluarluta markantiulluta (erseqqarilluta aaqq.) Taanna ingerlattuassuarput, innuttaasut sineriammiittut isorliunerusuniittut missukutarineqarnerat erseqqissarlugu, peqataatinneqarnissaat sulissutigiuassuarput.