Qaqortup mittarfia maanna qatserutinik Buffalonik marlunnik, timmisartumik ajutoortoqartillugu timmisartoqarfimmilu allatut upalungaarsimanermi suliaqartoqartillugu qatserutaallutillu annaassiniutinik immikkut sanaanik, peqalerpoq. Qatserutit tassaapput Rosenbauer Buffalo 6x6, Scania P460 timitaanik sanaat.
– Mittarfinni sukkasuumik ikiuisinnaasutut sanaajupput, aammali mittarfiit avataani pisussaq pippat nunami ingerlasinnaapput, Stine Buur Hvistendahl, Greenland Airportsimi pisortaq, oqarpoq.
Minutsimut imeq 4800 literi
Qatserutit timmisartut ajutoorneranni mittarfimmi upalungaarsimanermut qitiupput, ilaatigut timmisartut ajutoortut, timmisartumik angallassinermi piareersimasut kiisalu ikuallattoqartillugu allatigulluunniit mittarfiup iluani pisoqaraangat ikiuunnissaminnut piareersimallutik.
Qatserutit taakku imermik qamitsissummik sakkortuumik atortorissaaruteqaramik timmisartut ikuallalerpata sivikitsuinnarmik imermik skummermilluunniit annertuunik qatserisinnaapput.
Aammattaaq timmisartoqarfiup qatserutaasa ilaat FLIR-imik qinngornerit aappaluttut atorlugit assiliissuteqaramik taamaalillutik pujortillugu taartilluguluunniit kissartumik ikuallattumillu takunnissinnaapput. Taamaalilluni aquttoq suliaqarnermi takusaqarluarsinnaanerussaaq.
Apummik 40 meterisut ungasitsigisumut naloriussisinnaasoq
Qaqortumi mittarfik, ukiukkut timmisartuussinerit isumannaatsumik ingerlasinnaaqqullugit mittarfiit, aqquserngit angallaffiusut mittarfimmilu sumiiffinni allani aput annertooq piiarneqassatillugu atorneqartartussamik, aamma aputaajaatitaarsimavoq.
Aputaajaat mittarfinnut immikkut sanaajuvoq, aputaajaasoqassatillugulu aput mittarfeqarfimmit ungasissumut naloriussinnaalluguluunniit lastbiilinut usiliussinnaavaa.
Aputaajaariaatsimik marloqiusamik nukittuumik atortoqarpoq, tassanilu kaaviiaartumik ulamertup aput kaanngartippagu supoortup naloriussissutaatigut ingerlateqqissavaa.
