Australiamiut suliffeqarfiutaat Energy Transition Minerals, Greenland Minerals aqqutigalugu Kuannersuarni ujaasinissamut akuersissutaateqartoq, piginneqataassutinik nioqquteqarneq unitsikkallarniarlugu marsip 27-ani nalunaarpoq.
Namminersorlutik Oqartussat ernumalersitsisumik allaffigisimammatik, taakkualu misissuinissamut akuersissummik nutarterisoqassanersoq nalornissutigineqartoq nalunaarutigimmassuk taamatut aalajangerput. Tamanna nalunaarummi ingerlatseqatigiiffiup nittartagaaniittumi atuarneqarsinnaavoq.
Namminersorlutik Oqartussat pillugit eqqartuussivimmi suliassanngortitsisoq
Naak suliniutaat 2021-mi uranimut inatsimmut naapertuutinngikkaluartoq Ingerlatseqatigiiffiup Kuannersuarni piiaanissamut akuersissummik qinnuteqarsinnaallutik isumaqarami ilaatigut Namminersorlutik Oqartussat eqqartuussivimmut suliassanngortereeraluarlugit ujaasinissamut akuersissutini arlaleriarluni sivitsortarsimavaa.
Inatsisitigut aaqqiagiinngissutip suliarineqarnerata nalaani misissuinissamut akuersissummik sivitsuisoqarsinnaasoq suliffeqarfiup naatsorsuutigisinnaagaa Namminersorlutik Oqartussat inatsisilerituut siusinnerusukkut uppernarsareersimagaat Ingerlatseqatigiiffik allappoq.
Pisinnaatitaaffiit innarlerneqartut
Misissuinissamut akuersissutip nalornissutiginera ingerlatseqatigiiffiup tupaallaatigaa, tassami aasaq manna tassani ujaasinissamik pilersaaruteqarsimagaluarput.
Ingerlatseqatigiiffik misissuinissamut akuersissummi sivitsorneqarnissaa Namminersorlutik Oqartussanit itigartinneqarpat, tamanna ETM-ip pisinnaatitaaffiinik unioqqutitsinerussasoq, „Kuannersuarnilu suliniummut piiaanissamut akuersissuteqarnissamut piginnaatitaaffimmut atatillugu ingerlatseqatigiiffiup inatsisitigut inissisimaneranut iluaqutaaginnassasoq“ nangilluni allappoq.
Piaartumik ilisimatinneqarumasut
Pisortaanerup Daniel Mamadou-p tamanna tupaallannartutut oqaatigaa, ingammik selskabip Kalaallit Nunaanni ukiorpassuarni sulisimanera akuersissutinillu nutarterinerit pillugit maannamut paasisimasaqarluarsimanera eqqarsaatigalugit.
– Ukiumi matumani uternissarput nunaqavissunillu misissuisartunik atorfinitsitsinissarput piareersimaffigereernikuuarput, taamaammat misissuinissamut akuersissutip nalorninartorsiortinneqarnera pakatsinarpoq. Pissutsit maannakkut atuuttut ernumanarput, Kalaallit Nunaannilu oqartussanit piaartumik ilisimatinneqarnissarput ujartorparput. ETM Kuannersuarni suliniummi suli peqataavoq, pisinnaatitaaffigut soqutigisagullu illersorniarlugit ineriartornartuusumillu suleqataaginnarnissarput peqatigalugu naapertuuttumik iliuuseqassaaq.
Aalajangiinissamut allaqqaagaqartoq uppernarsarneqartoq
ETM-ip akuersissutaata sivitsorneqannginnissaa pillugu aalajangiinissamut missingiut, tusarniaanerup kingorna inaarutaasumik aalajangiiffiginiarlugu Naalakkersuisunut saqqummiunneqartussaq nassiunneqartoq Aatsitassanut Naalakkersuisoqarfimmit uppernarsarneqarpoq.
Aalajangiinissamut tunngavissaq tamarmiusoq, ilaatigut Energy Transition Minerals (Greenland Minerals) tusarniaaffigineqartoq, qaammatip ataatsip ingerlanerani Naalakkersuisunut saqqummiunneqassasoq Naalakkersuisoqarfiup naatsorsuutigaa.
