Pisortani sulisut akissarsiaat ima assigiinngitsigaat

Naatsorsueqqissaartarfiup kisitsisit Namminersorlutik Oqartussani kommuninilu pisortat sulisuisa akissarsiaannik takutitsisut saqqummiuteqqammerpai.

Suliffinni assigiinngitsuni agguaqatigiissillugu qanoq akissarsisoqartarnersoq kisitsisit takutippaat.

Sulisut kattuffiat IK (Ilinniagartuut Kattuffiat) agguaqatigiissillugu qaammammut 85.766 koruuninik akissarsisarluni qaffasinnerpaamik akissarsiaqarpoq.

Sulisut SIK-p isumaqatigiissutaa naapertorlugu akunnermusiallit akissarsiaat appasinnerpaapput.

Tassani aningaasarsiat agguaqatigiissillugu qaammammut 18.661 koruuniupput. Akunnermusiallit tunngaviusumik 16.481 koruuninik aningaasarsiaqartut nalunaarusiap takutippaa. Tapit qaangiuttoornerillu ilanngukkaanni aningaasarsiat 18.661 koruuninngortarput.

Inuiaqatigiinnik ilisimatooq: Naligiinnginneq pillugu paasisaqarnerunissamut iluaqutaavoq

Sulisut amerlasuut isumaqatigiissut naapertorlugu sulisorineqartut kisitsisit takutippaat.

SIK-mi sulisut nalunaaquttap-akunneri tamaasa sulisartut ukiumut katillugit 3539-it sulisarput.

Ilisimatusarfimmi inuiaqatigiilerinermi ilisimatooq soraarninngorsimasoq Birger Poppel akunnermusianut kisitsisit pillugit aningaasarsiornerup tungaatigut assigiinngissuseq, soorlu Gini-koefficienti atorlugu aamma Naatsorsueqqissaartarfiup naligiinngissutit pillugit uuttuutaasa ilaannik atuinikkut, Kalaallit Nunaanni annertunerusoq taakkua iluaqutigalugit paasineqarsinnaasoq oqarpoq:

- Innuttaasut ilaat, akunnermusiallit, ilinniagaqarsimaneq ajorput, taakkualu aamma atugaat nalorninarnerpaapput, Birger Poppel oqarpoq.

Aningaasarsiat pisissutaasinnaasut ikinnerusinnaasut

Inuit ataasiakkaat atugaat kisitsisinit takuneqarsinnaasunit ajornerusinnaasut nangilluni oqarpoq:

- Naatsorsuinerit qaammammi ataatsimi tamakkiisumik sulinermut tunngassuteqarmata eqqarsaatigisariaqarparput.

- Akunnermusiallit ilaat tamakkiisumik sulinngitsut, tassa imaappoq inuit uani eqqartorneqartut ilaasa aningaasarsiaat pisissutaasinnaasut suli appasinnerussasut ilimanarpoq, Birger Poppel oqarpoq nangillunilu:

- Taakkua pisisinnaassusaat imminnullu pilersorsinnaanerat ilaquttaminnillu pilersueqataasinnaanerat erseqqissumik sunnerneqarpoq.

Sulisut allat qaammammut akissarsiaat qiviaraanni SIK-mi ilaasortat akunnermut 18.661 koruuninik akissarsiaqartartut AK-mi ilaasortat qaammammut 34.547 koruuninik akissarsiaqartartut qaffasinnerujussuupput (takussutissiaq ataaniittoq takuuk).

Ilinniartitaaneq danskilli akissarsiaannik unammillerneq

Birger Poppelip maluginiagaasa ilaat tassaavoq eqimattat taakkua ilinniagaqarsimanerat.

Aamma ilinniagaqarnertuunngoraanni aningaasarsiaqarneq danskit kalaallillu suleqatigiinnerujartornerannit aamma sunnerneqarsinnaavoq, tamannalu Danmarkimi ineriartornerup kingunerisaanik akissarsianut qaffakkiartulersitsisinnaavoq.

- Ajoraluartumik ilinniagaqarsimasunik sulisussarsiornitsinni imminut pilersorsinnaanngilagut, taamaammat danskit akissarsiaat atorlugit sulisussarsiortariaqarpugut. Tassa imaappoq atorfinitsitsissagaanni Danmarkimi akissarsianut assingusumik akissarsiaqartitsisariaqarpoq. Ilinniarsimanngitsunilli akunnermusialinnik atorfinitsitsissagaanni taamaanngilaq, Birger Poppel oqarpoq.

Suliffiit akunnermusialinnik suliffeqarfiusut ataqqineqarpallaaratik pilerinartutut isigineqanngimmata tamanna pissutaasinnaasoq Birger Poppelip aamma tikkuarpaa.

Pisortat pissutsinut sunniuteqangaartartut

Namminersorlutik Oqartussat kommunillu sulisitsisutut taamaalillutillu akissarsianut allanullu atugassarititanut isumaqatiginninniartartutut aalajangiisuulluinnartumik sunniuteqartartut Ilisimatuup aamma tikkuarpaa.

Aammattaaq Inatsisartut akileraartarnermut akitsuutinullu politikki aqqutigalugu akissarsiakinnerpaat inuuniarnerannut qitiusumik sunniuteqartarput.