Timerput sequtserujussuarparput, immitsinnut sipporujussuarluta sulisarpugut

Maannguaq Broberg, isumaginninnermut ikiorti.

Sooruna inulerisutut ilinniagaq toqqarsimaviuk?

- Meeqqanik ineriartortitsinissaq nuannarisorujussuugakku. Meeqqanut tunniussassaqarlunga paasigakkuli itinerusumik paasisaqarfigerusullugit ilinnialernikuuvunga. Meeqqat ineriartorneranut sunneeqataasinnaanera nuannarivara, isigalugit ineriartortut assut uannut isumaqarpoq. Meeqqat akornanniikkaangama pilluartaqaanga. Soorlu nukissatsinnik immitsinnut tunisartugut, ilinniarluta ineriartorujoorluta.

Ulluinnaat suliffiusut qanoq misigisarpisigit?

- Nikeraqaat. Naatsorsuutigereertarpara soraassallunga tunniussaqarsimallunga, taanna kisiat siunertarisarpara. Ikioqatigiinnerit suleqatigiinnerup iluani nuannertuaannarput, kisianni soorunami pikkunarfeqartarput soorlu amigartilluta pingasoqiusanik suliaqalertarpugut imatut paasillugu igasariaqartarpugut, asaalluta allaffimmiluunniit suliassat suliarisariaqalersarlugit.

- Taamaammat ilaatigut nukeerutiivilluta soraartarpugut. Meeqqanut tunniussinnaasagut killeqalerlutik, puullaaqilerluta. Sapaatip-akunnerani immaqa ullut pingasut agguaqatigiisillugu pikkunartorsiortarpugut. Aasaq mersernartaqaaq, ulaperujussuarfigisaratsigu.

Sulisussaaleqinerup ilinnut meeqqanullu sunniuteqarneranik ersersitsisumik ullormik aaliangersimasumik oqaluttuarsinnaavit?

- Allaat imaannikuuvugut sulisut marluinnaalluta. Meeqqat 24-t inersimasut marluk. Meeqqat tamaaviisa ataatsimoortippagut, nerisitassat ataatsimut ingiteriarlugit tamaasa nerisillugit, uippakajaarnaq. Nalinginnaasunngorluni eqqarsarnissaq: ‘ajornavianngilagut’, uffa ajortoq peqqinnanngitsoq. 

- Taamaakulasangaaratta taama eqqarsaannalernarluni: ‘ajornavianngilaq’. Immitsinnut puigorujussuarluta, kingunerlutsisinnaasoqarluni allaat. Soorlu uippakajaarluni sulinngiffeqarnerit. Timimut akisoqaaq, nungullarnartarpoq. Ikiortissaaleqinerup kinguneranik imminut annikiginalertoornarpoq.

Atugassarititat eqqarsaatigalugit aqagu allanngortitsisinnaasuugit suna allanngortissagaluarpiuk?

- Aningaasatigut nalimmassaaneq. Pisariaqarnerpaamik inissisimavugut, nuunuaqqat ineriartorneranut, tassa meeqqat pisariaqartinnerpaasaat. Massakkumut ullutsinnut aningaasarsiat tulluarnerusinnaapput, sunami tamarmi akitsoriartorpoq aamma. Suliffitsinni assoroorluta aamma inuunitsinni assoroorpugut. Aningaasarsiat naammanngerujussuarput. Assersuutigalugu suliartoruma ilaatigut pingasoqiusanngorlunga ulapittarpunga, immaqaluunniit oqaannaraanni tamatigut taamaattarpunga, tapeqanngiivippunga sunulluunniit. Eqqumaffigineqanngillat. Akisussaafferujussuup tigusaqattaarneranik saniatigut ersittoqanngilaq, taakkuinnaaviusarput akissarsiagut. Equngagami. 

- Inuuniapiloornitsinnut kalluaannginnerussagaluarpoq aningaasatigut qaffaasoqartuuppat. Nalinginnaasumik inuunissamut artukkiinnginnerussagaluarpoq. Periarfissaqarnerorusukkaluarpunga aamma, ilaa timerput sequtserujussuarparput, immitsinnut sipporujussuarluta sulisarpugut. Periarfissat amerlanerusinnaapput, soorlu assersuutigalugu tangiartortinneq, tarnip pissusaanik oqaloqateqarsinnaanerit amigaatiginartarput. Ulikkaartuuikkuttaana aatsaat takuneqarniartugut? Taavalu meeqqamut atuiniarutta, atortorissaarutit sorlu pinnguakujuit assigisaalluunniit uagutsinnut oqilisaataasinnasut utereeqqaarluta pisinnaasarpagut, nukillalaarnartarpoq. Aamma tamakkua nammappagut meeqqerivinnut sipaarniarnerit.