KNI-p Danmarkimi niuertarfiutileqatigiiffissuaq isumaqatigiissuteqarfigigaa

Danmarkimi niuertarfiutileqatigiiffissuup Dagrofap ukiup matuma naanerani ingerlatani annertusillugit KNI-p pisiniarfiuteqarfigisaa Pilersuisoq aamma suleqataaffigilissavaa.

- Dagrofa annertuumik isumaqatigiissuteqarfigeqqammerparput, KNI-mi pisortaaneq Jeppe Jensen Sermitsiamut oqarpoq.

KNI-p Arctic Import/REMA 1000-imut taarsiullugu Dagrofa ulluinnarni nioqqutissanik, pingaartumik nerisassanik, Pilersuisumut pingaarnertut novembarip aallaqqaataannit pilersuisunngortissavaa.

KNI-p Dagrofa ukiuni pingasuni niuernikkut suleqatiginiarlugu isumaqatigiissuteqarfigaa. Tamatuma kinguneranik, Dagrofap nammineq nioqqutissatut ilisarnaatigisai Gestus aamma First Price, Pilersuisup Nunatsinni pisiniarfiini 2026-p naaneranit pisiarineqarsinnaalissapput. Nioqqutissat assigiinngitsut taakku marluk ilaatigut Danmarkimi MENY-p pisiniarfiini nunanilu Baltikumimiittuni iluatsilluartumik tuniniarneqartarput.

- Dagrofamut isumaqatigiissuteqarnissi kinguneranik Pilersuisumut pisiniartartut nioqqutissanik ulluinnarsiutinik akikinnerusumik pisisinnaalissappat?

- Nunarsuarmi niuernermi maannakkut ineriartorneq eqqarsaatigalugu, akigitinneqartut qaffarujussuarnaveersaartariaqarpavut. Tamannarpiarlumi pissutigalugu pingaarnertut pilersuisussatut isumaqatigiissutissamik nutaamik neqerooruteqartitsivugut.

- Atuisartunut akit appasinnerpaaffissaannut appasitsinniarsarivavut, tamannalu isumaqatigiissummit nutaamit iluaquserneqassaaq, Jeppe Jensen oqarpoq.

Pilersuisoq nunaqarfinni 53-ini illoqarfinnilu aqqanilinni

Arctic Import KNI-p pisiniarfiinut ulluinnarni nioqqutissanik Rema 1000-inik pingaarnertut maannakkut pilersuisuuvoq. Isumaqatigiissut taanna ukiuni tallimani atuuttuuvoq. KNI-p pingaarnertut pilersuisutut isumaqatigiissut nutaaq pilersuisussanut periarfissatut, ilaatigut Dagrofamut aamma Arctic Import/Rema 1000-imut siorna oktobarimi neqeroorutigaa. Dagrofa neqeroortitsinermi ajugaavoq isumaqatigiissutissarlu qulakkeerlugu. KNI-mili pisortap neqeroortitsisut qassit KNI-p isumaqatigiinniarfigisimanerai oqaatigiumanngilaa.

- Dagrofa Pilersuisumi ulluinnarni nioqqutissanik pingaarnertut pilersuisunngortinneqarpat, soorunami isumaqatigiissut annertussaaq, Jeppe Jensen oqarpoq.

Isumaqatigiissut najoqqutaralugu Dagrofa Pilersuisup pisiniarfiinut nunaqarfinni 53-iniittunut illoqarfinnilu aqqanilinniittunut, ilaatigut Nanortalimmi, Narsami, Paamiuni Aasiannilu, nioqqutissanik pilersuissaaq, illoqarfinni taakkunani Brugseni aamma Pisiffik unammillertigineqarlutik.

Nerisassat nerisassaanngitsullu

Dagrofa nerisassaannaanngitsunik pilersuisarpoq, aammali nerisassaanngitsut assigiinngitsorpassuit, soorlu inuup eqqiluisaarnissaanut angerlarsimaffimmilu atortussat, soorlu eqqiaanermut atortut, saviatsit børstillu tuniniartarpai.

- Isumaqatigiissut nutaaq aqqutigalugu nioqqutissat atuisunit piumaneqarluartut Dagrofamit pisiarissavavut. Nioqqutissat ilisarnaatilittut taaguuserlugit tunisassiat pisiniarfitsinni ullumikkut tunineqartartut amerlanerpaartaraat. Taamaattumik Pilersuisup nioqqutissaataasa ilarpassuisa Gestus-imeersut aamma First Price-imeersut saniatigut nioqqutissarpassuarnik ilisarnaatilinnik assigiinngitsunik akilinnik tuniniaasoqartassaaq, Jeppe Jensen oqarpoq.

Dagrofa Pisiffimmut ulluinnarni nioqqutissanik pilersuisooreerpoq. KNI-p Dagrofa-mut ukiuni pingasuni atuuttussamik isumaqatigiissuteqarnerata saniatigut, KNI-p aamma Arctic Import immiaaqqanik, sodavandinik, viinninik imigassanillu pisisarnissamut suleqatigiinnissamut ingerlatitseqqittussamik isumaqatigiissuteqarfigaa. Isumaqatigiissut taanna ukioq manna maajip aallaqqaataannit atuutilissaaq ukiullu aappaa avillugu atuutissalluni.

- Dagrofamik isumaqatigiissut Arctic Import/REMA 1000-mik isumaqatigiissummit oktobarip naanerani atorunnaartussamit pitsaanerua?

- Inuussutissat ukiuni kingullerni akitsorujussuarnerat maluginiarparput. Dagrofa-mik isumaqatigiissuteqarnitsigut isumarput naapertorlugu KNI-p akikinnerpaamik, pitsaanerpaamik isumannaannerpaamillu pilersorneqarnissaa qulakkeerniarlugu pilersuisussaq toqqarparput, Jeppe Jensen oqarpoq.