- Kalaallit Nunaat soqutigiuaannarnikuuara

Ateq Hanus Hansen taagaanni Savalimmiuni amerlanerit aalisarnermik ingerlatsisuusoq ilisimassavaat.

Qeqertaqatigiinni angutit pissaaneqarnerpaat ilagaat, taannalu Savalimmiuni avataanilu, aamma Kalaallit Nunaanni, aalisarnermi suliarpassuaqarpoq.

Hanus Hansen Savalimmiuni aalisakkerivissuarmi PF JFK-mi Klaksvigimiittumi pisortaallunilu pingaarnertut piginneqataasuuvoq.

Aammattaaq Savalimmiuni Umiarsuaatileqatigiiffiit Peqatigiiffianni siulittaasuugami savalimmiormiut inuussutissarsiorneranni aalisarnermik pingaarnerpaatitsiffiusumi nukittuujuvoq.

JFK Savalimmiuni aalisakkanik ikerinnarniittunik immallu naqqaniittunik tamanik aalisarnermik suliaqarpoq. Suliffeqarfissuup Barentip imartaani Norgep Ruslandillu pisassiissutaat amerlanerpaat aammattaaq pigisarpai, tassanilu JFK aalisartartutoqaavoq.

Piffissami sivisuumi Kalaallit Nunaanni aallussaqartut

Savalimmiuni suliffeqarfissuup Kalaallit Nunaanni, Hanus Hansenip JFK-llu ukiuni qulikkaani marlunni aalisarnermik ingerlatsiffigisimasaanni, Malik Seafood Nuup ilaani Nuussuarmiittoq piginneqataaffigaat. Taannalu tassani siulersuisuni siulittaasuuvoq.

- Hanusip Kalaallit Nunaat soqutigingaarlugu isertuunngisaannarpaa, JFK-lu ukiuni qulikkuutaani arlalinni assigiinngitsunik aalisartarsimavoq, ilisimannittoq kinaassutsiminik isertuussisoq Sermitsiamut oqarpoq.

Savalimmiuni aalisarnermik ingerlatsisut taakku aamma 2007-imiit 2014-imut Qaqortumi umiarsuaatileqatigiiffimmik aalisarnermillu ingerlatseqatigiiffimmik Arctic Prime Fisheriesimik (APF) piginneqataanikuupput.

Taanna JFK-lu Kim Høegh-Dam peqatigalugu Arctic Prime Fisheriesimik ingerlatseqatigiiffinnillu attuumassuteqartunik 2007-imi pilersitseqataapput. Høegh-Damittaaq umiarsuaatileqatigiiffeeqqamik Iluliaq Seafoodimik, 2022-mi akiliisinnaajunnaartumik, aallarniisutut ilisimaneqarpoq.

Malik Seafood ApS Savalimmiormiunit piginneqataaffigineqartoq umiarsuaatileqatigiiffimmik Arsuk Food ApS-imik piginneqataavoq, taannalu siorna decembarimi Kitaani ukioq manna aalisarneqarsinnaasunik naleqangaartunik saarullittassiissutinik (2.000 tonsinik avataasiorluni pisassiissutit, siorna 14.000 tons-iusut, aaqq.) Naalakkersuisunit pisassinneqarpoq.

Malik Seafood Aps suliffeqarfiit nalunaarsorsimaffiat, CVR, naapertorlugu marlunnik piginneqataasoqarpoq. JFK-p ingerlatseqatigiiffiup pingajorarterutaa piginneqataaffigaa, sinneralu Ragnhild í Skorinip Savalimmiuneersup pigaa, Taanna Nuussuarmi najugaqarpoq.

Suliffeqarfiit Malik Seafood aamma Arsuk Food tamarmik Nuup ilaani Nuussuarmiipput.

Arsuk Foods JFK-p aamma Ragnhild í Skorinip saniatigut piginneqataasunit 40-t missaanniittunit 40 procentimik pigineqarpoq. Piginneqataasut taakku Arsummi najugaqarput.

- Ingerlatseqatigiiffiup ineriartorneranut suli tapersersuisinnaalluta neriuppugut, Hanus Hansen mailikkut allappoq. Ingerlatseqatigiiffik 500 tonsinik pisassinneqarmat umiarsuarmik pisinissaq pisariaqarpoq, piffissamilu taama sivikitsigisumi allamik umiarsuarsiortoqarsinnaananilu aningaasaliisoqarsinnaanngimmat Savalimmiuni umiarsuaq ingerlatseqatigiiffimmut tunivarput, tunisisorlu umiarsuarmut aningaasaleeqataavoq.

- Niuernermi erniat nalinginnaasut naapertorlugit miarsuaatileqatigiiffimmut aningaasanik taarsigassarsivugut. Taamaammat umiarsuaq qularnaveeqquteqarfigaarput, umiarsuaatileqatigiiffillu avataanit aningaasaliiffigineqarsinnaassasoq neriuppugut.

- Piginneqataanerput ajunngitsumik tiguneqarsimasoq, Arsummilu ingerlatsinermut tapersersuisimalluta isumaqarpugut. Ragnhild uialu Marcus ukiuni 19-ini Kalaallit Nunaanni najugaqarsimapput, meeraqarlutik ernutaqarlutillu inuiaqatigiinnut kalaallinut tamakkiisumik akuupput.

Inuusuttuaraalluni aalisartalersoq

Hanus Hansen inuusuttuaraalluni Canadami Newfoundlandip eqqaani eqalussuarniartuuvoq. Umiarsuup naalagaatut ilinniarsimallunilu ukiorpassuarn Savalimmiormiut kilisaataaterpassuini Barentip imartaani aalisartuni naalagaasarpoq.

Hanus Hansen 1996-imi umiarsuaatileqatigiiffimmi JFK-mi, Savalimmiuni illoqarfiit pingaarnersaanni aalisarfiusumi Klaksvigimiittumi, pisortanngorpoq. Kisiannili umiarsuaatileqatigiiffik JFK aningaasaateqarfimmit pisortanit ingerlanneqartumit amerlanerussuteqarluni piginneqataasutut pisiarigamiuk pissaaneqarnera umiarsuaatileqatigiiffittullu inuussutissarsiornera aallartippoq.

Savalimmiuni internetikkut tusagassiivik Frihedsbrevet.fo naapertorlugu Hanus Hansenip 2005-imi unnuap ingerlanerani JFK-mi piginneqataassutit amerlanerpaartaat pisiarisimagai tusagassiorfinnit saqqummiunneqarmat Savalimmiuni inuit tupaallapput. Tamanna tuniniaaneq tamanut saqqummiunneqanngikkaluartoq pivoq.

Kalaallit Nunaanni ilisarisimaneqarluartoq

JFK Hanus Hansen siuttoralugu Malik Seafood aqqutigalugu Arsuk Foodimi 20 procentit inulaarlugit piginneqataavoq. Savalimmiormiu Ragnhild í Skoirini Nuup ilaani Nuussuumi najugaqartoq CVR naapertorlugu Malik Seafoodimi pingaarnertut piginnittuuvoq, sinneralu JFK-mit piginneqataaffigineqarpoq. Uia Marcus Jacobsen Hanus Hansenip illoqarfianit Klaksvikimeersoq, Arsuk Foodimi pisortaavoq.

Arsuk Food 2025-mi aalisariut ningittakkersuut atorlugu aalisarsimavoq. Angallat siorna Savalimmiuneersuunerarneqarpoq, tassanilu ningittakkersuut Kvikk-imik ateqalersimavoq. Arsuk Food maannakkut angallammik piginnittuuvoq. Aammattaaq umiarsuaq taanna JKF-imit Arsuk Foodimut tunineqarpoq.

Skibsbladet naapertorlugu JFK suli umiarsuarmi tamakkiisumik piginneqataavoq.

Umiarsuit allattorsimaffiat tamanut ammasoq umiarsuit danskit, savalimmiormiut kalaallillu erfalasuannik erfalasullit pillugit paasissutissarpassuaqarpoq. Allattorsimaffik ilaatigut umiarsuit piginnittui taarsigassarsiaallu pillugit paasissutissanik allassimasoqarpoq.

Savalimmiormiut Islandimiunut tunisisut

Kalaallit Nunaanni aalisarnermik ingerlatseqatigiiffinni nunanit allaneersut piginneqataasinnaanerannut inatsisit Savalimmiuni inatsimmut assinguvoq, tassani nunanit allaneersut suliffeqarfimmi annerpaamik pingajorarterutaanik piginneqataasinnaapput.

Kalaallit suliffeqarfiutaat APF savalimmiormiu Hentzar Petersen pisortaaneralugu aallaqqaammulli Qaqortumi qullersaqarfeqarsimavoq.

Savalimmiuni JFK-p APF-imi piginneqataassutimi pingajorarterutaat 2014-imi Islandimi ilaqutariit suliffeqarfiutaannut Linuskip ehf.-imut tunivai.

APF-imi Hans Hansen siulersuisuni siulittaasuuneratut savalimmiormiullu Hentzar Petersenip pisortaaneratut, Savalimmiu Hanus Hansen maanna Malik Seafoodimi siulersuisuni siulittaasunngortoq savalimmiormiu Ragnhild Í Skorini pisortaavoq.

- Kalaallit Nunaat soqutigiuaannarnikuullugulu Kalaallit Nunaanni ukiorpassuarni aalisarnermut peqataasarnikuuvunga. Kalaallit Nunaanni suliniuteqartarnerput inatsisinut Kalaallit Nunaanni atuuttunut naapertuuttuaannarsimavoq, Hanus Hansen Sermitsiamut oqarpoq.

Ningittakkersuut Arsugaq

Arsuk Foodip, Malik Seafoodimit affaata missaanik pigineqartup, ningittakkersuut Arsugaq 2025-mi aalisariutigisimavaa. Angallat siorna Savalimmiunut tikiunneqarlunilu tassan Kvikk-imik taaguuteqalerpoq. Arsuk Food maannakkut umiarsuarmik piginnittuuvoq. Umiarsuaq taanna aammattaaq JKF-imit Arsuk Foodimut tunineqarsimavoq.

Arsuk Food ApS siorna upernaakkulli ningittakkersuut Arsugaq, Klaksvikimiit Kalaallit Nunaannut nuunneqarsimasoq, atorlugu aalisarsimavoq. Arsuk Food aalisariutinik JFK-mit pisisimavoq. Skibsbladet naapertorlugu JFK umiarsuarmi suli tamakkiisumik qularnaveeqquteqarpoq.

Umiarsuit allattorsimaffiat tamanut ammasoq umiarsuit danskit, savalimmiormiut kalaallillu erfalasuannik erfalasullit pillugit paasissutissarpassuaqarpoq. Allattorsimaffik ilaatigut umiarsuit piginnittui taarsigassarsiaallu pillugit paasissutissanik allassimasoqarpoq.